¹ Ihu aa'o nairi Mo, Pooro, Iesu dibura mereeka noi Gentael uubiiri. ² Mo ainiraromoka nioro tauo poroovaimo Iehova mia e'idio oroi'io mooido inomohaumoi niori. ³ Iehovaro nu himia goroida oo'aa pleenii mo uumoo tauo pinovai. Ire aa'o nai pinima'ati nio baribariha, ⁴ nioro aa'o titii aaviapodu ka Iesuri mooro gorohi'aida iraaho nai nioro uumoo ii'i oukaumo. ⁵ Epuuha ie'idioumoi uubi aamiiairo nii meree mereei imaadutiumo biaka. Inai doo'ou aa'o nai Uriioiro tauo pimua'oovia nu vadei ovadueumo uubiire via nuuri ova'atiiri iapuimoi uubiido. ⁶ Aa'o gorohi'ai pleenii ihu everaika, uriio oroi'ioi ovadueiri Gentael uubii Jiu uubii rautu Iehova ne'eida blesini kopiha eidai oukaumo; nii atuu dupi kaa'uida memba aamiiaka, via nii Iehovaro Iesuado imaai poromesii goroidaaka. ⁷ Ka Iehova mia eraarai ova'ati modoboida mo uriio oroi'ioi ovadue meree pinii'i. ⁸ Mooido-- poo'aa mo Iehova taana uubii rautu idobuaida mo goro hi'a mereeka-- ihu miai tauo pinomoha, Iesu goro hi'ai naana paipai Gentael uubiido manimoa dueiri, ⁹ mabu aa'o pleenii mooro tuunioha uubiido koriha edeeai nouka-- tuunioha naanai idodiai dubui, Iehova goroida bunio bunioito ibodii tataha iraahoi naanai. ¹⁰ Ihu pleenii tanamotoida poobodii ka Iehova pai eraarai oo'aa vatiida tanamotoi epuu otiidio uubiire via atohe uubire niiro hapuo hapuoida nuuado uumo ii'ii oukaumo Iehova aha iaraahoi uumoo geemai. ¹¹ Ihu nai aiporododiai nu himia oropoi'o tataha oo'ai vouai pleenii iedeeai modoboi, Paidubui Iesu goroida. ¹² Iesu rautu e'idiou moida nimo too aai bia nou kaumo via nuu nimoro orohaito ahoou moiri nimo gaboi geemaha oo'ai ouka Iehova ne'eito. ¹³ Aa'o nairi mooro nio ainimaaka, pauo iraromoumo aute nio temetemei mooro eidairi, aa'o nai nio gee'iida manideeairi naika. ¹⁴ Nuuri mo Aba Iehova oohoida popuito nihiimaika, ¹⁵ tuunioha hepu geemai femliire via nuu pai eraarai oo'a vatii femliire painai imioi dubuika. ¹⁶ Mo ainiruudemeka nio pupuo ma imohairi nuu eraaraito, nu miai geema oo'a modoboi, doo'ou nuu nio rautu ire ve'idioai uriioi gaboida. ¹⁷ Mo ainiruudemeka Iesu nio kaukauida e'idioi ouka pupuo iraromoida, nio hipii viimovodaudu via nuuro nio vimoohia nuu gi'epu iraromoito ¹⁸ nioro kopiha andasten ma aimo Iehova taana uubii rautu, vadei geemaire, tutuuire, ohuire, via uruire, ¹⁹ via Paidubui Iesu nioido gi'epui iraromo everai uumoo ma ii'iumo, nio uumoida auo tauo podau mabu nuu Abiai Iehova mia geemai nioido oo'aairi. ²⁰ Ka doo'ou nimoro araatoo tataha via tiinoito iraromo tataha naanai nimo goroida nuu eraarai geemaha ova'atika, ²¹ ka nuuri Iehova painai tanamotoida ma emaraahuedu via Iesu rautu e'idiou moiri ma emaraahuei nio doo'ou e'idioumo uubiire via didimoida ooi voudui uubiire. Amen.