¹ Ka nioido ihuu everaika, nio uriio oroi'ioida tauo poroihiumo nituoka, mabu nio himia araatoo tataha idodiaimo naana memihoiri. ² Aa'o naanai iva'atii moiri nio ihu hepui geemai oroi'ioi haado nuuri pe'idioumo. Ihu hepu geemai ovodaumo uubii bubui pibodooumo, via uriio ata aio'aaka, meree merei maamura abiaraido oroovidio tatahai. ³ Nimo aa'o evera uubii rautu ine'idioumoida, mamaa iraromo naanai idodiai beha pinaaimo, mabu duupiira tiino rai ii'aa modoboi. Nimo inoobodutiu moida Iehova niehui goroi piniidoumo, ihu uubii aamiiai everai. ⁴ Inai Iehova mimirooka mia oroi'ioida, nuuri nuu gi'epu iraromo geemai nimoido haupoha pinimoha. ⁵ Nimo araatoo tataha ododiai beha oroi'ioida ine'idiou moida tauo pinoroihiumo, inai Iesu behaado nuuro nimo tuunioha aipiniveibua manoroi'iou moiri--- nuu eremaabe oroi'ioi miairi nio oroi'ioi tauo peveeaumo. ⁶ Iehovaro Iesu nituoida iovebuaida nimo rautu tuunioha piniveibua, ka nuu pai eraarai oo'aa vatiida inivomi'ei Iesu goroida, ⁷ mabu oroohoi vooudui bunio to'oi goroida nimido nuu odobua tataha mimiro geemai Iesuado haupoha obodii ouka. ⁸ Iehova eremaabee gi'epu oroi'ioiro nio tauo pivaabai Iesuido nio pupuo iraromoi oo'aairi, aa'o pupuo iraromoi nio himia ova'atiumo naanaida ou biaka, inai Iehova orovaabai gi'epu naika nioido, ⁹ aa'o nairi mere ata hobou oromoabu aute. ¹⁰ Nimo Iehovari ova'ati uubika, inidodiai merei Iesu goroida mia naana manai moiri, nuuro tauo tauo hivioida nimo e'idioi noudui everai tauoha patomudioi, ka nimo aa'o gaboida manodaumo. ¹¹ Aa'o nairi nio uumoka nio uriioi vadei uumoo tataha uubiro pe'idioumo duupiito. Nio aipiahooumo ''Iehova kekai uubi'' mabu nio tamai uubi hi'a tuito piahiroumo. ¹² Aa'o hivioida nio Iesu ne'eida aipootaumaimo, Israel uubii goroida vatii ata uubiito pereedeeaumo, oio ooho uubi via Iehova uumoo tataha uubi ihu hepu geemaida. ¹³ Epuuha nio Iehovaado auo hi'a pe'idioumo inai Iesu orairo tauo pivohiiai nuu taitaito. ¹⁴ Iesu nimo mioika. Nuuro netoatii kaa'uubuo povai. Nimo nianaamuito gi'epu tataha manaai moiri inivaheeai ga'ui Iesu duupiiro tauo pehebuti. ¹⁵ Aa'o nai everaika, ibodooiri idodiaimoi bubui nuuro aipima dohomai mabu nuu himia hi'aado oio meree ma imododiai, via mioi ma ovoi. ¹⁶ Iesuro satauroida uubii mamaa geemai tauo pimahuura, nii nianaamu oroi'ioi oo'aa tataha ne'eida Iehovaado ma idabuairi. ¹⁷ Iesu iooida nio auohi'a ie'idioumoi uubiido mioi tauo pimoadue via taitai ie'idioumoi uubiire. ¹⁸ Nimo uriioito Iehova ne'eito gabo ma oo'aairi Iesu behaka. ¹⁹ Aa'o nairi, doo'ou nio Gentael uubii oio ooho uubi biaka via vatii ata uubi biaka. Ia'aaida nio Iehova taana uubii rautu e'idio uubi aamiiaka via Abiai Iehova motoi nioida nio memeba aamiiaka. ²⁰ Nio oroi'ioi ovadueumo uubiire, Iehovari ova'atiimo uubiirei otiidioumo ne'eida potooaumo, via Iesu aa'o ne'eida oovahoro no'a kopiika. ²¹ Nuu nioida moto kaa'ui modoboha ororu'utiika via noro ii'iika Paidubuida otiidi tanamotoiri. ²² Ka nio Iesu nioida e'idiou moiri nio kopiha tauo pididi Iehova e'idio vatiika.