Namu Saulo,Velegaua gena veala veni auri nuari eva ragerawai,rupu velena kamuna elenai ethao everenagiwai Damaseko(Damascus) rupuna mageria aloalo pa,thoanai pene vairi pene rawaliri etharaparai pene veamai agiri Jerusalemai. Ia tharapara na ethao Damaseko(Damascus) emithoa veaviao,emi kalileao mathaa apua kupana emi rivo ole; ia eouvaleo alimai karo apua eamonagiao ia evailathao,'' Saulo,Saulo,raagauna goina thau oala raavakuni?'' Saulo evrenagio,'' Goi riai,Velegaua?'' Velegaua neiwao,'' Thau Iesu,goina oala raavakuni; namu ono laai ono vethoa oa vanuai,e goi pana vailamu veaina pono ala au.'' Saulo gekwaruao auri papari geve apuo,karo geamonagiao namu au apua noai geiathao. Saulo erua laaio, maana ealapathao ia nee veiao;pe ia imanai gerogo gevaiao Damaseko(Damascus) ai geve vai oao. Saulo garo oioi maana geapu apuo nee veiao,ia nee ganiganio e nalu maina nee niuo. 0 Damaseko ai ekalesia auna apua tharana Ananias.Velegauna maavanagiai eva ripaao,''Ananias.'' neiwao,''Onoia,Ethau, Velegaua.'' 1 Velegaua na evaila iwao,'' Ono laai,vuvuara tharana rakwa rakwanai ono vethoa rai e Judas gena numai pono verenagi Tarsus auna tharana Saulo auna era pa,repana ia eveni vuavuani. 2 Maavanagiai auapuna tharana Ananias peiatha eve amaini ia thaanai imana pene ole auri pe ia mapene veiawai. 3 Namu Ananias neiwao,''Velegaua,aunilimalima vogo vagina eau thorina geilagiani ia vagivagi auna e goi gemu veaa auri vogo eva raavarao Jerusalemai. 4 Ia rupu velena kamuna na iavu eveniao goi tharamu pige ilagi lovo lovoa auri iana pene ligori.'' 5 Namu Palauna ia evailao,'' Thoa,ia thauna pavirigia,thau tharaku pene vua laiwa laiwa,avapaa (gentiles) auri e vele kakamuri e Isaraela nauna vilarai; 6 thauna ia ana varipatha ia vi vi arikamuna pene vuatha thau tharaku pakunai.'' 7 Pe Ananias ethoao,numai evethoa oao.Imana thaanai eve ole aurao,neiwao,'' Vewala ava Saulo,tharapara na oveamaiwai thaonai elemuai eve vamagaio auna Iesu Keriso auna na thau peuuku pe goi maamu pige veala paa e veaa palauna na pono vonu.'' 8 Vagana vagi unavi veairi Saulo maana na geo vagio,ia eveia waio,ia elaaio papasito egapio; 9 e eganiganio iliga erawaliao.Damaseko ai ekalesia auria ila garo viravira ealu agirao. 0 Saulo nee vethalo Iesu valina rupu thaorai ewapaa agiwai,neiwai Iesu ia Palau nauna. 1 Ia geamonagia wai auri geaovo aovo wai negeiwai,'' Enori auna Jerusalemai Iesu tharana gevaoa wai auri evagirawai? Ia enai peve amai aunilimalimari pene gapiri rupu velena kamuna na peuua.'' 2 Namu Saulo ia eiavu kolokolo ole,iana Iesu eiagiawai ia Keriso gauna na mai Jews Damaseko ai gealuwai mae ole vele keirao. 3 Garo vogo geva nagio mulirai,Jews na valavu apua ge uamagiao Saulo pige vagia. 4 Namu ila geria valavu gealao gauna Saulo na eripathao.Vanua thoaoa thoaoana pogi e garo geiamarawai pige vagia thara paranai. 5 Namu gena ekalesia na pogi thaonai kana uuna na patiketi ai geva alu auao kokena geva laa uvaleao. 6 Ia Jerusalemai eve amaio,Saulo vealaveni auri elerai ethao,namu eila maparari ia kalinana gekalio,noai geve vauna aunao ia vealaveni auna apua. 7 Namu Barnabas na evaiao vealaveni(apostles) auri elerai ethao agiao,evailarao Saulo na Velegaua raa eia iwao thara parai e Velegauana ia ethori veniao e Damaseko ai Iesu tharanai nuagauai ethori thorio. 8 Saulo ilaria gekoukouo,Jerusalemai gethoa oawai e gethoa rai wai.Nua gauai Iesu tharana evara vara agiwai 9 e Grecian Jews ria geilavevauuo;namu ila geve aoleawai Saulo pige vagia. 0 Wala avana eolema geripathao ia Caesareai gethao agiao avana na geuuao ethoao Tarsus. 1 Mulinai,rupu Judea,Galileia,e Samaria thaorai maino ewalao e gekamuo;e Velegaua kalinai gekalio e veaa palauna gena veala naka naka thaonai,rupu uumana evogo. 2 Alu emi namao,Petero rupukapuri maparari ethoa ia alirawai,ia maina ethao Palau gena aunilimalima veaari Lyddai maeve iathao. 3 Wanai auapuna tharana Aeneas,eve rawaliao rigolo maparari aula vaivai ropiai emao agirao,repana ia kaukau. 4 Petero na evailao,'' Aeneas,Iesu Keriso na goi peva namamu.Ono rua laai gemu maomao gauri ono kokori,''ma manai vega elaaio. 5 Lyddai e Sharon ai gealu wai aurana geiathao ila geria mauli velegaua geveniao. 6 Evanamona Joppai ekalesia apua tharana Tabitha(ganina ''Dorcas'').Evavine ulavunu nanamari vogo ealarawai,e lealea auri enuavi rawai. 7 Garo apua eviiao e ewaregao;geva rikuao,ovua thaainai(upper room) ai geva mao ao. 8 Repana Lydda vanuana e Joppa vepaari nori rau,ekalesia geamonagio Petero Lyddai,au lualua gerao geve ravu agiao,''Ethoa poono vawai mai.'' 9 Petero elaaio gethoao.Emi kwarao thaonai geve vai rageao ovua thainai(upper room) ai wanai wapu maparari epinai geruao geagiwai,maulinai ligoligo rapuari,imana gau alari evenirao gauri ia geva ripawai. 0 Petero na ila maparari ovua thaona na euurai rao,euialio,e eveni vuavuao thaonai eva ai waio aunipara elenai,neiwao,''Tabitha,ono laai.'' Thaonai maana evathalirao,Petero eia rawaliao ealu laaio. 1 Petero imana euuveniao evarua laaiao; Palau gena veaa auri e wapu egogorao ia maulina eveni rao. 2 Evali ethoa lovo lovo Joppa magugulunai uuma vogovagina velegaua elenai geve vauna aunao. 3 Eolema pakunai Petero garo vogovagi Joppai ealuo Simon elenai ealuwai.