Caesarea alimaparanai auapua tharana Cornelius ia veali velena apua. Ia venuavi auna,Palau kalinana ekaliwai magena numa auria ila,lealea auri evenirawai,Palau eveni vuavua veniawai garo mapara rai. Garo magelo magelonai ora gauna no oioi veairi,eia vethaleva vagiao maa vanagiai Palau gena aneru apua eveamaio ia elenai.Aneru na ia evailaiwao,''Cornelius.'' Cornelius na emalele agiawai ia eve kali raavao thaonai neiwao,''Eraagau kamuna?'' Aneru neiwao,'' Goi gemu veni vuavua e gemu veveni lealea auri elerai wara Palau elenai valavu thao veveniri. Evana aunilimalima ono uuria ige thao Joppai auapuna tharana Simon ia gegogoania Petero pige vevai maia,ia Simon gena numai ealunia rawa para laganai.'' Aneru na ia ekaliwaniao mulinai,Cornelius gena numai au ulavunu lualua e gena olea thaonai veali auna apua egogorao. Ewalao olemana maparana evaila rao thaonai euurao gethoao Joppai. Rapa eluvao ora gauna no aula oioi veairi,unagi authoa agina vanua geve aviawai thaonai,Petero eve rageo numa kini na uunai pene veni vuavua. Ia ethakao eririwao gau waua pere gania,namu numa auri roge naru naru wai,thaonai ia maa vanagi apua eiathao, 1iana kupa uuna eithao eveala paao thaonai maua apua emi rivowai,olemana no piliavaa alimaparai emi rivowai,riki ava vaivaina gemi rivo agiao. 2 Gauna thaonai wara gageri vaivairi maganiri uveri irau irau e alimai gevirini gauri,e kupa manuri. 3 Thaonai karo apuana ia evailao:'' Laai,Petero,ono vagi e ono gani.'' 4 Namu Petero neiwao,'' Peene wala ripa,velegaua;repana thau nee vethalevao e nori nama gauna naa ganio.'' 5 Namu wakaro vaga lualuanai ia elenai maeve amaio:''Palau na peala thalevari gauri goi na poono ilagiri ia raraava.'' 6 Eolema vaga oioi ewalao;thaonai wamaua vagana vagi kupa uunai etou lavu ulewaiao. 7 Petero emaavanagina eva vevili gaua vagiao,gauna euamagiawai thaonai Cornelius na uuraao auri thoaoai gerua alio. 8 Geve renagio Simon,tharana apua Petero, enai ealuni pa. 9 Petero na emaa vanagi roeuamagiawai thaonai veaa palauna na ia evailao,'' Ono vethalo,aunilimalima oioi na goi geavunia. 0 Ono laai ono verivo ila ria igo thoa.Poono veva wai repana ila thauna pauuria.'' 1 Pe Petero everivo ole kapuleai eau oioi evaila iwarao,''Thau aukuera muina goavuani.Raagauna mui pogo veamai? 2 Ila negeiwao,''Veali velena apua tharana Cornelius,ia thakwa thakwa auna e Palau kalina na ekalini auna,Jews aunilimalima rana maina gemathalagiani,ia Palau gena aneru veaa na apuana evailao goi unagimu pene uua pono veamai ia gena numai,pe goi elemuna vali namana pene amonagia. 3 Pe Peterona evai ragerao numai.Rapa eluvao gelaaio ila gethoao e wala ava vairia Joppa na mai gethoa kwaru rao. 4 Rapa eluvao ila Caesarea ai gekwarao.Cornelius na ila ethalorawai;ia gena numa auri e auavana vairia mai egogorao gevethalowai. 5 Olema ewalao gauna era,Petero numa thaonai ethoaoao laganinai,Cornelius na erawaliao gagena repanai eui alio pene airupu ali venia. 6 Namu Petero na ia evailaaiao,evaila iwao,''Ono rua laai,Thau maina ipo aunilimalima.'' ²⁷ Petero goi rowage thori thoriwai thaonai aunilimalima na numa geva vonuao. 8 Petero na ila evailarao,'' Mui maina ripamui rova apua noai gau Jews auna apua maaunilimalima vairi pa maalimapara apuarai geve koukouni.Namu Palau na thau eva ripakuo aunilimalima apua thauna paana varaava e paana ilagia mamilona. 9 Gaurai thau unagiku pogo uu thaonai naa vevawai.Pe thauna mui arenagimuini raagauna thau unagiku pogo uu?'' 0 Cornelius eve vanoo lavu uleo,'' Garo vaivai pege vanagi eora veainai,thau geku numa thaonai aveni vuavua wai;thaonai au apuna aithao vilakuai eruao rapua vewaa vewaari eligoo. 1 Ia neiwao,Cornelius, goi gemu veni vuavua Palauna peamonagia,e gemu veveni lealea auri elerai gauri thaorana Palauna goi peve valavu rawalimu. 2 Pe auapua ono uua ene thao Joppai,auapuna tharana Simon vagaana gegogoani Petero.Ia opi eopania auna gena numai ealunia,tharana Simon gena rawapara laganai.' 3 Gaurai vagana vagi goi unagimu auuo.Pe evana,ia maparari auria era Palau vilanai pe, peva ripamu veai veainai thoriri pe amonagiri.'' 4 Petero muruna ethaao neiwao,'' Auna auna vagi,thau avepuunia Palau auapuamo genana na nee thaoni. 5 Veaina mo,alimapara maparanai riai ia kalina na ekalini e ala thakwa thakwa maulinai emaulinia ia Palau na egapi rageani. 6 Mui ripamui Israela auri elerai vali euuao,iana ethori raiao vali(gospel) maino Iesu Keriso thaona na,ia gau maparari geria vele- 7 gewalao gauri maparari mui ripamui,gewalao Judeai,Galileiai ema mao,papasito mulinai Ioane na eilagi lovo lovoao; 8 gewalao gauri,Iesu auni Nazareta Palauna raa eva iavu iwao veaa palauna na e iavu raa egapi iwao.Nama ulavunuria alarawai e satani na eva vi virawai auri evanamathawai. 9 Iesu na ulavunu maparari ealarawai gauri maparari thai maa maina gaiathao,Jews gealuwai kapurai e Jerusalemai.Ia gauupu unai geva gigoao avanai gevagiao, 0 namu Palauna ia evalaiao garo vaga oioinai e euuao pige iatha nori aunilimalima mapararana,namu Palauna evirigi thalo thalo rao aurana-thaina gagani gani agia e ganiu agi koua aumaina waregana elaai wai mulinai. 2 Thai evaila maio aunilimalima elerai piga vara vara agia e ia iavuna raaveaina piga ilagi lovolovoa,ia Palauna evirigiao warega e mauli pene vaithori ria. 3 Peroveta auri maparari ila ia auilagi lovolovona,pe riairi ia elenai geve vauna auna nia ila galama veilagi wai ia tharanai pige rawalia.'' 4 Petero ethori thori wai thaonai,veaa palauna evali geamonagiwai auri thaarai emi eo auo. 5 Peritome (circumcision) oleana ekalesia auri-Petero ila geve amaio auria-ila geve vakalio,repana veaa palauna gena veveni avapaa(gentiles) auria mai thaarai evelavugao. 6 Ila geamonagio thaonai avapaa(gentiles) auri makaro vairai gethori wai e Palau geva rageawai.Thaonai Petero neiwao, 7 '' Aunilimalima apuana nalu galamana mapere vaia eaunilimalima elerai pe,ila papasito pi gere gapia,eaunilimalima na veaa palauna pege rawalia thaina ga rawalia veaina.'' 8 Thaonai iana ila evailarao,Iesu Keriso tharanai papasito igo gapi.Thaonai ila ia genogiao garo lu ila elerai pere alu agiri.