¹ Petero ma Ioane goina aunilimalima gethori venirawai thaonai,rupu veleri e rupu geiamatha wai auri e Sadducees geve amaio ila elerai. ² Ila geve raulea vagio repana Petero e Ioane goina aunilimalima gevaripara wai e Iesu gena laai wai waregana gevara vara agiawai. ³ Ila raligoi geligo rao tipura numai geve ole oarao pene thao rapari eluvao. ⁴ Namu aunilimalima vogovagina evali geamonagiao thaonai gegapirageao;geve vauna aunao aunilimalima no thagana imaima. ⁵ Rapa eluvao geria vevai veleri,rupu veleri,e vekuneagi auri geve koukouo Jerusalemai. ⁶ Annas rupu velena kamuna wanai auna wara,e Caiaphas,e Ioane,e Alexander,e rupu velena kamuna wala wala na maparari. ⁷ Petero e Ioane ila nunuarai geva alu alirao, gerenagi rao,'' Riai gena iavuai,pa riai tharanai,eulavunu muina goalani?'' ⁸ Thaonai Petero,veaa palauna na evavonuao,ila evailarao,'' Mui aunilimalima gokune agirana,e vanua veleri, ⁹ pere thai egaroa pogoro avu iaiamai vi vi auna vanama vanama na pakunai,raaga pakunai eau eve vanamao, ¹⁰ iga vamagaia vilamuiai e Israela aunilimalima ria maina,eau mui vilamuiai eruao auniparana nama iwa vagi Iesu Keriso auni Nazareta tharanai,auna muina go satauroa,namu Palau na waregana eva laaia. ¹¹ Iesu Keriso ia vauna,mui numa au alana goilagi raava,namu ia eveoleo rupu vauna kamuna. ¹² Nama auapua elenai nee miao,ekupa kapulenai maa thara apua nee miao ethara namo ia pene vamauli ri.'' ¹³ Petero e Ioane geria nuagaua geiathao e gevalavu rawalio ila ipo aunilmalima, noai gethaoneka, ila gekali leao, gemi valavu rawalio Petero e Ioane wara Iesu ria gethoa kou wai. ¹⁴ Repana kau kau auna enamao ila ria gerua kouo, pige thori vewai avana egauao. ¹⁵ Kaosela alu kouna mulinai veunagi auri geva thoa rai rao,ila maauri geve vaila wai. ¹⁶ Ila negeiwai,'' Eau lua lua iana raa paara ala iwari? Repana ilana vekalilea ulavununa apua pege vawala,Jerusalemai gealuni aunilimalima rana rau vagi pege ripatha;ia piana ilaiwa wapa. ¹⁷ Namu vevaripa apua eolea evali pigene ole lovo lovoa aunilimalima thaorai,rova eveniri etharai auapua pigene thori venia.'' ¹⁸ Thaonai ila gegogo oathao,rova gevenirao Iesu tharanai vevaripa e thori thori apua pigene ole waia. ¹⁹ Namu Petero e Ioane geria vevano lavu uleai gevail iwarao,''Ari apuna thakwanai Palau vilanai mui iga vagelemui pa Palau,muina igo vevaovoa. ²⁰ Thai pigana rakwa uari gaiarao e ga amonagirao gauri thori thori rai.'' ²¹ Venua rage thori mulirai Petero e Ioane geva thoa rao.Ila geria thori mauli avari geavu avao eau lualua iavu pige vavuari,repana aunilimlima mapara rana Palau geva ragea wai repana maarana geiathao. ²² Eau vevanama maveva kali agina erawaliao auna gena rigolo maparari kapana vai vai. ²³ Geva thoa rairao mulinai,Petero e Ioane geria aunilimlima elerai rupu vele rana e au kakamurana thori gevaila rao thori gevara vara agirao. ²⁴ Geamonagio thaonai,ila karori geve rage ole uamagi apunaimo Palau elenai negeiwao,''Velegaua kupa,alimapara e rawapara goina oalarao,e thaorai gemiani gauri maparari. ²⁵ Goi veaa palauna thaona na othorio goi gemu veala veni auna muruna na,thai amamai Davida,' Raagauna avapaa (Gentiles) auri geparuni,e aunilimalima gau noai ganiri gevalavu rana?' ²⁶ Goi noiwao, 'Alimapara veleri geregari gealu kouo,e vevai auri gekoukouo velegaua e gena Keriso gerua vila agiarao.' ²⁷ Noria maina na,Heroda e Pontius Pilate,avapaa (Gentiles) auria e Israela aunilimlima ria ila gekoukouo evanuai goi gemu veala veni auna maveaana goina ova iavuao Iesu gerua vila agiao. ²⁸ Ila ge koukouo pe goi imamuna omaneao e ouamagi thalo thaloao pene wala. ²⁹ Evanamona,Velegaua,geria nuavevarage ono iari e goi gemu veala veni auri iliga ono veniri pigene thori guguva guguva. ³⁰ Imamu ono go rairi vi vi pige nama e vailia pige wala goi gemu veala veni auna maveaana Iesu tharanai.'' ³¹ Ge veni vuavuao mulinai,ila gealuo kapuna maparana eve lugu veluguo,thaonai ila maparari veaa palaunai gevonuo e Palau gena thori mailiga rana gethori agiao. ³² Maparari geve vauna aunao wara thao e palari apunai auri.Apua nee ila iwa wai iana erawalia wai gauna ia maauna gena,ila garia gau wauna mo. ³³ Wa iavu iwavagi thaona na veala veni auri Iesu Keriso gena laai wai gevara vara agiawai,thaonai veuga ila thaarai ethava auao. ³⁴ Maparari apua gau waathai nee rapuo,mageria numa pa alima gevoi agirao moniri geve tou mairao 5 veala veni auri gageri reparai gemi ole alirawai,veaolea geiarawai veainai ge ware aurawai. ³⁶ Joseph, veala veni aurana gegogoa wai Barnabas (ganina vevailiga nauna), ia levite, Cyprus auna apua, ³⁷ gena alima evoi agiao monina eveamai agiao vealaveni auri gageri reparai emi ole aliao.