Enu Kapana Lua lua apuna.

Thai gathoao ila gakaliwani rao,thai rakwa rakwa Cos vanuana kamunai gave kwarao,rapa eluvao Rhodes vanuanai gave kwarao,avana na gavanagio Patara vanuanai. Avanai Phoneiciai pene thao potinai gave rage vanagio. Cyprus vanuana aulimai gena avanai ipo gaiathaoa,thai gava nagio Syria e Tyre ai gave kwarao,repana poti na eurathao rina'ari wanai pene varuluria. Ekalesia ila gave rawalio avanai garo aula oi apuna ga'alu agirao.Vea'a Palauna gena vevaripa thaona na Paulo gevailawai pe'ene lavu ulewai Jerusalemai. Gemai garo wanai gegavu vagio,gemai ririwa avarana evaithao maio,ila maparari magarawari e ma nauri,gethoa kwaru maio geve vathoa maio.Oneai gathao gave uialio,gaveni vuavuao, maparamai gave vagagao.Thai potiai gave la'a rageo ila maparari gelavu uleo. Tyre ai ulavunu eve gavu vagio,gathoao Ptolemais ai.Wanai wala ava Keriso thaonai garawali rao,ila elerai garo apuna ga'alu agiao. Rapa eluvao Caesarea gathoa veniao.Caesareai Philip evanelia auna gena numai gathao,ia Iesu mulinai gethoawai auri aula oioi apuna thaorai apua Philip,ia elenai gave aluo. Eau nauna iaori maparari vai vai ila ge peroveta wai. 0 Garo viravira ga'alu agirao thaonai,Judea na peroveta auna apua eveamaio tharana Agabus. 1 Thai elemai eve amaio Paulo gena peleta etouao.Ia ma'auna peleta na imana e gagena ewalo walo rao thaonai neiwao,''Vea'a Palauna neinia, ' Jews aunilimalima rana epeleta ga'ana pige ligo ligoa,e ilana mulimuli (Gentiles) auri imarai pige u'u vanagia.''' 2 Ethori ga'amonagio laganinai,thai e wanai gealu wai auri Paulo gavailawai pe'ene thao Jerusalemai. 3 Thaonai Paulo eve vano'o neiwao,''Muina ra'agau goalani,goagini e thau kutouku gopere avaluani? Thau ala ma'avuai a'aluo,nori pige ligoku mo,namu Jerusalemai maina pana warega Iesu velegaua tharanai.'' 4 Paulo noai gathori pikao,thai noai gagalavu galavuo,thaonai nagaiwao,'' Palau gena ririwa pene veala agi.'' 5 Garo vira vira gegavu vagio mulinai,gemai toutou gauri gagapirao Jerusalemai gave rageo. 6 Caesarea ekalesia ria vairi maga thoa auo.Caesarea aurana au apua tharana Mnason gevai auao,eau ia Cyprus vanuana auna,ia ekalesia kuinena apua,ia elenai Cyprus ai gathao wai thaonai iana thai evai ragemai wai gena numai. 7 Jerusalemai gakwarao,thaonai Keriso thaonai vewala avana gevai rage maio. 8 Rapa eluvao Paulo ila gathao James elenai,rupu veleria maina auria wara. 9 Verawali thorirai geve rawalio,mulinai ia gena evanelia ulavununa thaonai Palau iavuna mulimuli (Gentiles) auri elerai ra'a eulavunu iwao maparana ethori vethaleva vagiao. 0 Ethori geamonagiao thaonai,ilana Palau geva rageao,thaonai ia gevaila iwao,'' Vewala thagana vira Jews thaorai pege veva auna auna.Rova roana olena olemana ila elerai gauna nara. 1 Goina Jews mulimuli (Gentiles) auri thaorai gealuni vevaripa oveniri,Moses pige valavu lewalewa e ovailari nauri pigene peritome ri,e sene mauliri kuineri maulirai pigene mauli,gauna goi geilagimu ilana. 2 Iana ra'aga pagara alara? Ila ige amonagi goi pove amai. 3 Pe thaina goi iga vailamu veaina pono ala au.Maluane vai vai auria era ila ilagavu apua geala. 4 Eau vai vai ono vairi ilaria igo vethaleva,voiri goina pono oleri,pe ila mai repari mapige golori.Pe aunilimalima maparari pige ripa goi thorimu ila gevailari wara nori auna auna.Ila pige ripa goina mai rova ova geleani. 5 Namu mulimuli (Gentiles) Iesu gegapi rageao auri,ila ga'alo venirao e rova gavenirao era, kaivakuku pigene ai rupu ali veniri,lala pigene napa aunagi,vagi vuni maganiri, e ma'aporaga mauliri pige kali waniri.'' 6 Paulo na auri vai vai evairao,rapa eluvao ia evethalevao eau vai vai mai geve thalevao.Mulinai ila geve thoa oao rupu thaonai,ala vethaleva ari garo pene gugulu e veveni ari garo pige vegapi avanai ila apuri apuri pige rawali. 7 Garo aula oioi apuna gegavu vagio mulirai,Asia Jews rana Paulo rupu thaonai geiathao,u'uma thaori gethori vevili rao thaonai Paulo auniparanai imari geva eo aurao. 8 Gemakala wai,'' Israela aumuio,igo va'avamai.Eauna aunilimalima maparana evariparana iana amauli agirana gauri eilagi ra'avarana,rova,e ekapu.Mawauathai Greek aunilimalimari peve vai mairia rupu thaonai,ekapu gena vea'a pemi vara'avatha.'' 9 Garo gevanagio garorai ilana Trophimus auni Epeso Taoni thaonai Paulo goi geia kourao,ila geria uamagi thaonai eau Paulo na rupu thaonai emi vai oathao. 0 Taoni maparana evereleo,aunilimlima geravu avi avio Paulo gerogoao.Rupu thaona na gekere rakwa raiao,avaga'ama vagana vagi gekana gavurao. 1 Ige vagi warega gana pakunai veiama'a velena elenai vali evekwarao Jerusalaemai vevagi kamukamu pewala. 2 Noai gagovana gena veali auri e veia ma auri egapairao geveravu rivo ole Paulo gevagia wai avanai.Aunilimalima na veali velena magena veali auri geiarao ila gerakwa uario. 3 Veali velena eveamaio Paulo emirogoao,gena veali auri evailarao lekeani lualuana geleke aniao.Thaonai erenagiao goi riai e goi ra'a kepi poala agia. 4 U'uma thaorana vairi gegogo rage wai,thori waua geilagia wai vairana mathori waua geilagia wai.Veali velena evevilio repana galavu kamu vagi thori vathakwana ra'a ene ripa iwatha,gaurai eala iwao Paulo evaiao numa thaonai geve vai oao. 5 Wara warai gemi rua alio veali aurana Paulo gevua la'aiao repana aunilimlima kalirana. 6 Aunilimalima ila mulirai gethoao gegogowai wai,'' Igo gapi gerevagia.'' 7 Paulo numa thaonai gethoa agiawai gana pakunai,Veali velena erenagiao,'' Goi thauna thori wauna mapara vailamu?'' Thaonai Veali velena everenagio neiwao,'' Goi Greek karona maripamu? 8 Goi nori wa aikupito auna,wawa'ani vekaro vekaro omi vawalao,aunilimalima thagana vai vai ovai rai thao kapu leanai geve vagirao auna pa?'' 9 Paulo neiwao,''Thau Jew auku,Tarsus Cilicia na aveamaio.Thau vanua kamu iwavagina apua'ana aveamaio.Anogimunia aunilimalima para thori veniria.'' 0 Veali velena na iavu eveniao,Paulo wara wara u'unai eruao aunilimalima imana na ekaro varathao.Galavu rawana erivo,ila Heberu (Hebrew) karonai ethori venirao.Ia neiwao,