Antioch rupuna thaonai,peroveta e vevaripa auri auria wara.Auri wara,Barnabas,Simeon(Niger) ai gegogoa wai,Lucius Cyrene auna,Manaen (Heroda wala avana rage aona),e Saulo. Ila Velegaua elenai geveni vuavua wai e gewaka wai, thaonai Vea'a Palauna neiwao,'' Eau lua lua igo varua gerevagi ri thauna agogorao ulavunu na pige ulavunu agia.'' Ge veni vuavuao e gewakao mulinai,ila raligoi tha'arai imari geoleau rao iavu gegapio mulinai geu'u rao gethoao. Barnabas e Saulo vea'a Palauna gegapi rageao gethao Seleuciai; wana na palai na geravuo gethao Cyprus mounai. Ila Salamis vanuanai,Palauna thori Jews gealu wai rupurai gevara vara agiawai.Ethoai John Mark mai ethoao ila raligoi eva avarawai. E mou maparana gethoa agiao Palauna thorina elovao avana na gethao Paphos ai,wanai Jews geria mega mega auna apua geve rawaliao,ia peroveta wapa auna apuna,ia tharana Bar Iesu (Jesus). E mega mega auna ia vele apua Sergius Paulus ia mathao nekana ila gekoukou wai.Eauna Barnabas e Saulo eririwarao ia elenai pige veamai repana eririwa ole Palau na thori pene amonagia. Namu Elymas ''mega mega auna'' (ia tharana eveaina geva vanagiao) iana evawairao,ia ne'e ririwao Sergius Paulus na Velegaua pene gapi ragea. Namu Saulo,ia mai tharana apua Paulo,vea'a Palauna na evonuo,emega mega auna eiaia wai 0thaonai neiwao, ''Goi Satani nauna,goi vevara'ava e moira gauri mapara rana ovonuo.Mauli thakwa thakwa olemana maparana olivuani aumu.Velegaua gena tharapara thakwari maparari pio wagegerai po'ono pikapika vagi, auna auna? 1Ono iatha,Velegaua imana evanamona goi tha'amuai,e goi ono apuapu.Gagova gelena goina garo po'ono iatha.''Noai gagovana Elymas tha'anai inova e mu'una emi eo auo;ia emakewai aunilimalima evaila rawai imanai ige rogo ige vaia. 2 Sergius Paulus na eolema eiathao mulinai,ia eve vano'o e eve vauna aunao,repana velegaua gena thori vevaripanai ia thaona eve alapao. 3 Paulo ma'auavana palai ai Paphos gekali waniao,Pamphylia alimaparanai vanua tharana Perga.Ioane ne'e thoao ia elavu ulewaio Jerusalemai. 4 Paulo ma auavana Perga na gethao Antioch,Pisidia vanuanai.Wanai tapati garoanai rupu ai gethoa oao gealu alio. 5 Peroveta auri geria rova georu aluao mulinai,rupu vele rana unagiri geu'uo negeiwao,''Vewala,pene elemuiai vevailiga thorina waua enai aunilimalima geria gauna nara neni,pigo ilagia.'' 6 Pe Paulo erua la'aio imana eu'ula'aiao;ia neiwao,''Israela aumui e Palau gomatha lagiani aumui,igo amonagi. 7 Israela aunilimalima ri geria Palau na ia amari evirigiri Aikupito ai gealuwai thaonai eva u'umari,ia imana egapi la'aia thaona na evai rairia. 8 Rigolo no kapana vaivai apuna kapuleanai enakarao. 9 Alimapara maparari aula oi apuna(7) eva ra'avarao mulinai ilagavu alimana Kana ana (Canaan),ia gera aunilimalima evenirao gevaiao. 0 Eolema ewalao evana rigolo inavu vaivai,kapana imaima pege vanagi(450yrs) Egau maparari mulirai,Palau na vevaithori auri evenirao pene veamai Samuela peroveta auna gena laganiai. 1 Thaonai aunilimalima pene kune agiri velena genogiao Palau na ila Kish nauna Saulo(Saul) evenirao,Benjamin kwaluna thaona na evirigi raiao,ia pene vele rigolo maparari kapana vaivai (40yrs). 2 Palau na ia vele rakina na eala vagiao mulinai,Tavita(David) eoleao.Tavita (David) elenai Palau neiwao,' Thau Jesse nauna Tavita(David) paiatha ia thau nuanuakuai auna,thauna ririwa makairia iana pene ulavunu agiria.' 3 Eau kalakala na thaona na Palau na Isaraela geria vevamauli auna eveamai agiao,Iesu,gena ilagavu gelegele nai. 4 Kapi Iesu pene veamai,Ioane na Isaraela aunilimalima ri elerai wala wai papasito na evara vara agiawai. 5 Ioane Papasito gena ulavunu eva gavu vagiao mulinai,ia neiwao, ' Muina gouamagiani thau riai? Auna nori thau.Namu igo amonagi,auna thau mulikuna eveamaini,auna gagena tamaka ria mai thau nori gelegele pana luva vagiria.' 6 Wala avaku,Abraham nauna maparari,e riairi Palau kalina na gokalini aumui,epe ia gera nama valina iana peu'ua. 27 Jerusalemai,mageria vele gealuni,ilana noai geia iliara,namu ilana peroveta thoriri geva gugulu rana, tapati garori mapararai georu rana ilana ia geilagi ra'avani. 8 Lewana ra'a kepi eva walao noai gerawaliao namu,Pilato (Pilate) gevailao evagiao ewaregao. 9 Ge peroveta agiao veainai, gauri maparari gewalao ia satauro na getou uvaleao vau ovuana (tomb)thaonai geoleao. 0 Namu Palau na ia waregana eva la'ai waiao. 1 Garo vogo thaorai ia goi gethoa wai Galileia(Galilee) e Jerusalema aurana geiathao.Eaunilimalima na ia geiatha, egaroa ia geilagi lovo lovoani aunilimalima elerai. 2 Ia amari eilagavu veniri gauna thaina valina namana gavara venimuini. 3 Ia gera evaguguluao,ila nauri,gaurai Iesu eva la'aia.Salamo vaga lualua nai evealo ole gelegele nai: ' Goi thau nauku,egaroa thau goi amamu.' 4 Warega na eva la'aia repana ia auniparana pe'ene poraga gaurai,Palau ethara parai ethorio:Thauna goi vea'a e vevanama auna auna ri Tavita(David) ailagavu veniao gauri pana venimu.' 5 Ia maina ma Salamo apuathai neiwao, 'Goi gemu vea'a vagi apuna pe'ene poraga.' 6 Tavita (David) na Palau gena ririwa eva gugulu rao ia gena laganiai,ia eai mauo; ia amana lagarai geoleao ia auniparana ekira kirao. 7 Namu ia Palau na eva la'ai ao ia auniparana ne'e kira kirao. 8 Pe gaurai vewala, pigo ripa galama ilagi wai tharaparana apuna vagi wara eaumo thaona na. 9 Ia mo thaona na geve vauna auna ni auri ila egau maparari thaorana pige veole vathakwa,Moses gena rova na mui pe'ene ole vathakwa mui. 0 Gaurai pigo veia ma peroveta aurana geilagiri gauri mui elemuiai noai gewalani: 1 'Igo iatha mui karoverave aumui,thaomui pige vethaleva mulinai pigo gavu vagi;repana eulavunu mui gemi garoai thauna aulavunu agiani,muina pigono vauna auna ulavunu na apuna,lewana ma'au apuana mui elemuiai pere vara vara agia.''' 2 Paulo e Barnabas gethoa rai wai thaonai,aunilimalima na genogi nogi rao,vilari tapati nai ethori mapegere ilagi wairi. 3 Rupu thaonai verawali egavu vagio mulinai,Jews vogo vagi e ekalesia valivuri vogo vagi Paulo e Barnabas,mulirai gethoao geva iligarawai e gepu'u rawai,pige vai gaua Palau gena vewa'a thaonai pige mauli. 4 Mae tapati waiao,taoni aunilimalima na maparana gethoa aviavi ole Palau gena thori amonagina ulana na. 5 Jews aunilimalima rana u'uma geiathao ila vema'auo,Paulo na thori eilagira wai avarai geva muru vewaia wai e geilgi ra'avao. 6 Namu Paulo e Barnabas nua gauai gethoriwai negeiwao,''Palau na thori mui Jews elemuiai pere veilagi rai kune.Paga iatha thaonai mui elemuina goroli gerevagiani,e mauli vanagi vanagi noai ganina mui elemuiai neni,thaina evana avapa'a auri (Gentiles) elerai iga thao agia. 7 Repana thai Palau na evaila maio,neinia,'Thau na mui avapa'a (Gentiles) auri geria mathaa aole muio,pe muina nama pigo thoa agia makapu vairai alimaparai.''' 8 Avapa'a (Gentiles) aurana ethori geamonagiao,ila gevereleo e Palau gena thori geva rageao.Vogo vagi geve virigio mauli vanagi vanagi vegapi ragenai. 9 Palau na thori ethoa lovo lovo ole wa kapu (region) maparana elovao. 0 Namu Jews aunilimalima rana uamagi kamu vavineri e maluaneri ila gevenirao evanua thaonai.Veva ra'ava thori ria Paulo e Barnabas elerai, gemi rage agirao geria vanua (region) thaona na gegiu rakwa rairao. 1 Paulo e Barnabas ila raligoi gageri alimari gevairao evanua auri elerai.Ila avana na gethao Iconium alimapara (city) nai. 2 Thaonai Keriso gena unagi authoa agi(disciples) maparari verele na e vea'a palauna na gevonuo.