¹ Igo iatha eraa ulamagi apuna ia amarana evenirao, pe ia Palau naunai pegere gogori, namu auri pe aaluo era. Wagauri pakurai alimaparana ia nee riparana, repana alimaparana ia nee ripatha. ² Geku ulamagi aumui, ia evanamona wara Palau nauna, ree magaai ia raa pevemia iwa. Ia riparia Keriso pene velavu ulewai garoanai, ia Keriso veaina pevemia, iana pe iatha aiatha veaiveaina. ³ Riairi everaramani ia elenai geoleani auri ila, vethalevavagi repana ia vethaleva vagi. ⁴ Maparari gegalamani auri, rova noai geva geleani, repana galamana rova nee vageleani. ⁵ Mui ripamui Keriso eve vamagaio wara, galama pene touvagiri pakunai, repana ia noai galamana auna. ⁶ Riai Keriso thaonai emaulini auna,ia maapene galamawai. Pene galama vanagi vanagi auna,ia Palau peene iatha e peene ripatha. ⁷ Nauku auana peene vai vevilimui. Ala thakwa thakwa auna ia thakwa thakwa,repana Keriso ia thakwa thakwa auna. ⁸ Galama evawalani auna ia satani gena, repana satani ma mana na vega egalamao. Egauri pakurai Palau nauna emagaaio,pe satani gena ulavunu maparari pene lovori. ⁹ Palau thaonai ewalani auna,ia nee galamani,repana Palau vuavuana ia thaonai gemiani.Ia peene galama wai,galama wai repana ia Palau thaona na ewala raini. ¹⁰ Eveainai Palau nauna e Satani nauna gemagainia:Riai nee ala thakwathakwani auna ia nori Palau gena,e wala avana nee ulamagiani auna mai. ¹¹ Evali muina mamana na vega goamonagiao:Ia maauavari pe veulamagi veveni. ¹² Ia cain,veaina piana mauli ia Satani gena gaurai ia wala avana evagi waregao.Raa gauna ia arina evagiao?Repana ia ulavunu maparari wara Satani gena,ia arina gena ulavunu wara thakwathakwai gaurai. ¹³ Wala avaku mamilagimui pigene lea, pene alimaparana egurugu muini. ¹⁴ Ia ripari ia waregana avanagio, mauliai, repana ia wala avari aulamagirana. Pene aua nee veulamagini ia warega thaonai roealuo. ¹⁵ Pene auapua wala avana eguruguani, ia vagivagi auna. Mui ripamui vagivagi auna apua,ia elenai mauli vanagi vanagi nee miao. ¹⁶ Eveainai ia ulamagi aripani, repana Keriso gena mauli eole aliao ia pakurai. Veainamo ia gera mauli mai peole aliri, ia wala avari pakurai. ¹⁷ Namu pene aua alimapara gena nama evamiao, thaonai wala avana lealeai emaulini eripani, nee nua viiani ia thaona vekanagavu, Palau gena ulamagi ia thaonai raa emia iwao? ¹⁸ Gaurai nauku thoriai e matharana piana veulamagi, namu ala laiwa laiwai e aunaaunai peveulamagi. ¹⁹ Eolema veairi thaorana ia aripanai,ia aunaauna, e ia thaori avamagaiarana ia vilanai. ²⁰ Pene ia thaorana evailearana,Palau na ia thaori eiwarana,e gau maparari eriparana. ²¹ Geku ulamagi aumui,pene ia thaorana nee vailearana,ia magera vaigaua Palau elenai. ²² Ia elenai penogia gauna pene veniri,repana ia gena rova aroanaole rana,e gera mauliai avavereleani. ²³ Ia gena rova era: ia nauna Iesu Keriso tharana pe vaaunaauna e maauavari peveulamagi veveni,erova evenirao gelegelenai. ²⁴ Palau gena rova evagelerana auna ia Palau thaonai ealuni,e Palau ia thaonai ealuni.Eveainai ia peripa Palau ia thaorai ealuni,veaa Palauna evenirao thaona na.