¹ Nauku, thau na egau aalo uvalerana mui gemi, pe mui pigono galama. Namu pene auapua pene galama,ia gavurai ia amari elenai thori auna aunaera, auna Iesu Keriso ia thakwa thakwavagi. ² Ia gera galama thori rairi auna,e manori ia mo namu, malimapara maparana mai. ³ Ia riparai, pene ia aripathao, ia gena rova mai pe vavenagiri. ⁴ Au apua pene ilaiwa, ''Thau Palau ripaku'' namu gena rova nee roana ole rana ia wapa auna,e aunaauna ia thaonai noai gau. ⁵ Namu riai ia gena thori thaonai gemiani, aunaauna vagi Palau gena ulamagi ia thaonai eo lavugalani. Eolemai ia pe ripa ia Palau thaonai: ⁶ Riai pene ilaiwa ia Palau thaonai emaulini, ia Iesu Keriso emauli veaina mapena mauli. ⁷ Ulamagi aumuio, thauna nori rova valivuna apua mui aalo venimuini, namu rova kuinena ma maana na go amonagiao gauna. Rova kuinena wara thori muina goamonagiao gauna. ⁸ Veaina mo thauna mui rova valivuna aalo venimuini, ia aunaauna Keriso thaonai be mui thaomuiai, repana muuna wara egavu vagini, e mathaa aunaauna na pe elalani. ⁹ Au apua pene ila iwa ia mathaai emaulinia, namu ia wala avana eguruguani, ia muuna thaonai pene veami egaroa. ¹⁰ Wala avana eulamagiani auna ia mathaai ealuni e gau wauana peena valoua. ¹¹ Namu wala avana eguruguani auna ia muuna thaonai e ia muunai emaulini; ia nori ripana ia arina ethaoni repana, muuna na ia maana ekourana. ¹² Nauku thauna mui aalo venimuini, repana ia tharanai mui galama mui pege veilagi wai. ¹³ Velepara aalo venimuini, repana mui ripamui auna ma mana na vega. Uluvalivu aalo venimuini, repana raava muina pogo thoa vanagia gaurai. Melomelo aalo venimuini repana ia amari kupai goripathao. ¹⁴ Ama paalo venimui, repana eau mamana na vega goripathao. Ulu valivu paalo venimui repana mui mailiga mui, Palau na thori mui thaomuiai emiani,e raava muina gova waiani. ¹⁵ Alimapara e thaonai gemiao gauri pigono ulamagiri. Pene auana alimapara eulamagiani,ia amari kupai ulamagina ia thaonai noai gau. ¹⁶ Ealimaparai gemiao gauri maparari-ila ainipara ririwamagina gauri,maana eiathana gena ririwamagi gauri, mauli eva ralemathani-ila nori Palau elena na namu alimapara na geve amaini gauri. ¹⁷ Alimapara e gena ririwamagi ia egavu vagini. Namu riai Palau ririwai emaulini auna wara pene mauli vanagi vanagi. ¹⁸ Nauku, evana wara ora kapikapina. Goamonagiao gelegelenai, Keriso wapana eveamainia, evanamona Keriso auala ovo ovona vogovagi geve amaio. ¹⁹ Ia thaorana gethoa rai, namu ila nori ia auavari. Pere ila ia auavari ila iaria paara alu koukou. Namu ila gethoarai, ia pe ripa ila nori ia auavari. ²⁰ Namu mui veaa auna, elena na iavu gogapio mui maparamui ripamui. ²¹ Thauna mui paalo venimui, nori mui aunaauna nori ripamui gaurai, namu mui ripamui e repana aunaauna thaonai wapa noai gau. ²² Riai wapa auna,Iesu Keriso ewapa agiani? auna ia Keriso ewapa agiani, repana iana amana e nauna ewapa agirana. ²³ Auana nauna ewapa agiani ia elenai amana noai au. Riaina nauna eilagi raiani auna ia elenai amana mai ealuni. ²⁴ Pigo gapi roana olea gauna wara, mamaanai vega goamonagiao gauna thaomuiai pene mia. Pene muina mamaanai goamonagiao gauna mui thaomuiai pene mia kikilagi, ²⁵ mui amana e nauna thaorai mai gomiao. ²⁶ Thauna mui paalo venimui ganina, orina eaunilimalima veairana gevailea muini. ²⁷ Mui valu pe, ia elena na iavu gorawaliao, auna mui elemuiai ealini,e mui mai auaapua manoai goririwaani pene varipamui. Namu ia gena iavuna gau maparari eva ripamuini,wara aunaauna e nori wapa, evaripamuini gelegelenai thaonai pigo alu. ²⁸ Evanamo nauku, ia thaonai pigo alu pe ia pene vevamagai garoanai ia mailigari e piana opimatha gena veamaiai. ²⁹ Pene mui ripamui ia thakwathakwa auna,ia peripa mauli thakwanai gemaulini auri ila ia thaona na gewalao.