¹ Dii kakoluvuia DILAVAlu sisilave da lalai tota nonake igalila ko kisaiai hanavalu, daa memila kisaiai hanavale kela da lalai hanavalu ige lake evisi huhuave. ² Koto keu kosealu aveve toela avale kele ogeta loteve momai kotoeabe evigelive kosealelu kea atau toelaeala kea, kea olai lai vudiu vate boisi laa agigei toelatigei. ³ Isito vate boiale kele lai ba DILAVAu ata olivelu bele isito lai loea munanau tuvu vuvunele DILAVA hoeasea vaeaviva. IESU KELISO luvita igalitoale kele lailole DILAVAu ata olisi sisilai daa ola soliale lai DIUIA aveve kelate ai koseai loo koage DILAVA loo agigei. ⁴ Ata kea abo DIUIA avale kele meliai kosealu loo koseige DILAVAu loo agigei isito daa olaluaga dale aveve kateale ai ata leivigei. ⁵ Kosealelu dii aiau daa vaeavage daa ualeu bula igaliu vesusege dii mamau daa veuiavale vate letulilu dii aiau daa vaeavage dau DIU ata leleve dau BENIDIAMENI vakiteo lolu, dau BALISESEA ata olisi DIUIA basuiabe keneni alu. ⁶ DIUIA basuale kele daa meliai ekalesia kavei vateutuu moeaga vavelu isi huhuai kosealu daa koseige DILAVAu nile lilikata tai. ⁷ Daa memila DIUIA aveve ke aive kele milialu isito daa aike keneni kalei IESU avevete ke ava. ⁸ Daa DIUIA aveve keula kale solilu isito daa huhuige vatau aveveke bahata kitaeolie solilu ige daa ke kalegei olale dii ata kitae IESU KELISO kevai lelevetisi aveveve kele luleleai keu ivile daa vatau hauko ivage momolu late isi keagisi katulu isi daa olai IESU KELISO aveveve kele meliai ui. ⁹ Isi daa olai melia IESUti igalitoai daa memila DIUIA basuale kelovai kosealu dale koai damiga vai duatisi daa memila katealu isito daa aike di uvu vai IESU vavuale kelu damiga hoeaseavai DILAVAu nile isi lilikate olisi ui. ¹⁰ Daa ola kitaeale IESU KELISOu aveveve keivai huhuai au voeleai kobelaleke vuvuneveta ivai ilivelu data au vateu tuvu vale kelate data vateu tuvu vai voeleale kelate data voeleai. ¹¹ Ige DILAVAule ba au vuvunele daa isage dale kobelai mauli ukolikoli vai. ¹² Daa aike ukolikoli maulike vasolilu isito IESU memila daa vai olale daa ukolikoli vai katea leluga daa ke huhuai olaleke valiveluga daa kelu hauva. ¹³ Dii kakoluvuia daa aike ukolikoli mauli vasolilu isito daa aike hau voe igali huhuava daa memila avale kehuhue solilu isito vaoe vadeu loale keula daa huhuai avolu meliava. ¹⁴ DILAVAu IESU KELISOele daa toiavale kele daa melialogo au valivelu ivivela ibila dua damui. ¹⁵ Laa olea lai evievile meliai uale keale lata daa huhuivale kelate lata huhuai meliavelu laele agive isege olea huhue solivale keale baa DILAVAu aveveabe keleba haivei. ¹⁶ Isito lai memila vadu dua evisi avoele meliai loivale kele lai meliai tigei. ¹⁷ Dii kakoluvuia daa vadeu avale kelate lata ave ige oleu daa avale kelate age lata ivai au avale kelate ave isi lovai tigeve. ¹⁸ Laa huhuige IESU idiu dole voeleale keata moeagaeake homasiavalu ola solilu kotove evilivelu abo aveve toela ai vai toelativa daa memila koloui laa lavigealela daa tota aliota loui laa lavigeva. ¹⁹ IESU vai toelativale ata keale DILAVAule ba kavage abole ue solisi kosealelu kea DILAVA guliguliava solisi abo vavau ola aeviva abo matie solisito abobiga ula letatavai vavau ola keula aeviva isi vatau aveveke ula huhuai ueviva. ²⁰ Isito lailoea kate solisito otogoe tiveve ataea lailoi KOSIVE IESU KELISOu otogole dobai loiveve kela lai ko nikovai uva aule loi lailo agigei otogoe tai. ²¹ Aule loluaga lailoi vavau toelako lekoveage lailoi vavakou vavave atagai ualeke olisi atagai ui au au vuvunele vale vile koneni age aule duai ui isi lailoi vavau toela keta lekoveage aule vavave atagai uale kelate ai atagai ui.