¹ Daa laa lavigei au lalai uvu vai KELISO vavula ko ai melialu aule au ola lamei laa hoeaseavei lale munanave tuvu vage laili ulu lale volelai uvuai vole hoeaseavei vole dulugevei uve. ² Lale aveve kateale age dale evisi lalai sisilagei kosealelu daa olale laa uvu igali, huhui igalile hauai volelai olai kele uveve dua ulale ugeve. ³ Momai lamiga ula huhuai lamiga letatavalive isito momai loui koseivale dau ata kitae dalau isege volea eseve momai huhui kateale aevevale isito lamiga letolevai volelai aveve dua ula ave. ⁴ Labea momai lamiga ula huhuagelive isito vole huhugei vole dulugei vole hoeaseavave. ⁵ IESU KELISOu avale kelate lata ageve. ⁶ IESU keu DILAVAla isito au DILAVAu vuvune agialeke huhue solilu isito kekalei lolu ata datalu lolu. ⁷ Keu au olale keneni kalei vatae lolu loale keu kosi kitaea aveve kele loie solilu isito eseu esea aveve kele lolu amiga letolevai ata late ataeali uva isito keu DILAVAla. ⁸ IESU keu katealu amiga letatava solisito DILAVAu ola alu abo atau toela idiu dole kavevale kelate ai vai idiu dole kavage voelealu lai loi toela ibilalu. ⁹ IESU kateai au mama ola age mamaveu isai vai tilu otogoe isi ivive letatavage ivi kitae ataeale ivive kele guliguliagei. ¹⁰ Katealelu DILAVAu olale vali vaola atake neniale IESU ivi kele guliguliai ivive hoeaseavai otogoe uvale vatae uvale kumoe uvale keneniale kome bokoai vatabisi IESU hoeaseavai. ¹¹ Keale bahata hoeaseavai loui kosea IESU KELISO keu kosi kitae abole kateai mamave DILAVA keta hoeaseavai. ¹² Dii uvu kakoluvuia da memila laili usege laa dii koto evivale ke late lale ave dii koto evive daa ave laili ue solilu isito laeale kobekavai DILAVA vabuiavai ukolikoli mauli agiveve ke huhuai lai mauli kalikaliavave, o hoeaseavave ige au duai ui. ¹³ Kosealelu DILAVA kela vali bahata laili ui laa hoeaseaveva au meli lameva isi olale laea kotove evisi olave ai tigeve. ¹⁴ Momai ogoloai volelai loui tuvu kalevai to voleali uveve dua ula ageve. ¹⁵ Katealelu lale vali bahata aveve dua age DILAVAu ba laele toelabe ivalivelu bele ige atau toela avale ata keale laa ivei lai ataga ke ivai ige laea leleve DILAVAu ese lalaea mulimuli ata kea nile. ¹⁶ Lai uveve dua koto ke loui ata haivevalelu loui vali vaove keu loige lai ba IESU KELISOu nile leleisi matialivelu bele isito dau laele hauai laa haivevale kele daba matialilu bele IESU nile isito dale lavisi sisilai ui. ¹⁷ Abole daa kavage daa voele ige kta duave daa huhuige laea lai uvu vai DILAVAAA vavui lovive ai hoeaseavai uge keu duave, iale da voeleige lai evievi keule kitaege dale sisilai. ¹⁸ Katealelu daa olale lai bahata sisilai. ¹⁹ Lailoi kosive IESU olage da TIMOTI hanavage ivave au loige aule tiluaga tota kuialai loi lai hauivale nona ke loui daa haivuge dale evisi sisilai. ²⁰ Ata beu daa duluavale keu ue solilu isito TIOMTI ke ulau laa huhugei olai laeo tai laa dulugei. ²¹ Ige ata volea IESU KELISO lovi ko huhue solisito aboelete ula huhuai ava. ²² Isito laa huhuage TIMOTI keu hau dua avale ata keu dii voo late lole avoti ui kotou dua loui ata haivegei. ²³ Daa huhuige daleba hanavage laeo tai isito daa ola solilu solekai hanavalivelu isito dale luta abo daele vadeu ale ke haivuito ba hanavai. ²⁴ Lailoi kosiveu olage datale ba aike loi. ²⁵ Isito da huhuige keu duave dale lai loi kakolo EBABALODITASI keu memila laeo loale ke da tota hanavage laeo loiva. ²⁶ Keu loaleu daa duluduage lo avoti ata haiveva ivaga eu hatiti toela alu voelealivelu vekealu. ²⁷ Isito DILAVAu avota datalu uvuai mauliavalu laa hatitive evisi avolu uvale ke evisi lolivelu laa ivegei. ²⁸ Katealelu da ave hanavage laeotiva au loige ivai avolu sisilage data valivelu dii uvutatale uvui vale keu tolelevai. ²⁹ Au laeo loige ivai avolu sisilaveai hoeaseavave keu DILAVAu atala keu ata kateale hoeaseveve keu ata kitaela keu. ³⁰ Laea loi daa dulua solilu isito KELISOu hau avale kela laa hanavage lolu loi daa duluai haua loho hatiti toela ai voelelu vekealu, katealelu lale ata kateivale ke hoeaseaveve.