¹ Iesu lavigei avoe, koto leleve ula, daa laa lavigei. La kole leleisi uvale ko, volea ba vovolivelu bele abole, abo niteta ivasege, Otogole vuvune kitae ule ba daiai loi. ² Ke iae vali nii '6' sigisiu vesusege Iesu, Bita vai Dieimisi ta Dioni ta vai aboili tala vole visoe vaeatievelu. Tialea abouvu ui tisege Iesu amiga lekovealu. ³ Ige Iesu ogonave keu taeai taeai tobai toba, vole ai ulu. Vata kole valevoleu taeteu taeke lateu ue solilu. ⁴ Isege ilaidiau Mouseseti loi Iesu luvita leleisi nonahamai uva. ⁵ Ige Bitau Iesu lavia avoe, lai koveo ualeu duave, oo abuita isi igalita koui, oo voleu aele, isege voleu Mousese vile, isege voleu Ilaidia vile. ⁶ Bitau Iesu ivai teteai nona kaoai vabuta nonale la keu. ⁷ Isege goe kitaeu loi bavugelu isege, goe ke uvule nona voleu loi loui avoe, ese keu dii lutiu bai ese, igalila keu, daa vai lalai hanavalu, au nonage, nonave keneni evive. Daa avolu sisilavale ese igalila keu. ⁸ Abo nona ke evisito lavisi ulu. Mousese la Ilaidia ti ue savalu. ⁹ Ke iae ea tala kitae, kela kuiakavai oe loevisege Iesu lavigei avoe, la vadeu ivale, ke loui ata bahata lavige vale, ivagato, atau eseu voeleai kobelage ba ke loui, ata haivege, abo evisi Iesu vadeu ale ke. ¹⁰ Ige ea vadeu ivale ke loue savalu, abobigalai nona ke vatalalu. Isito voeleai kobelale ke ula belalai loui avoe, vadeula voeleai, kobelale ke eu loulu. ¹¹ Isi Iesu laviai avoe, vadeuluga Diuia basu ai loui ata haivevale, kea loui avoe Ilaidiale luta loi. ¹² Ige Iesu lavigei avoe, Ilaidiale luta loi vadeu toelale keneni koui vesuiavai igeto ba atau eseu loi ito vadeuluga, abo kisaia loui avoe, atau eseule loi isu kitaele aule tai, ige ata moeaga kotove evie solisege, volea avolu lousege, volea homasiavalu. ¹³ Isito da la lavigelu, Ilaidiau loige, ataeau abo huhui vai avoele vaeava solisi to avolu loui, vai toelatisi, aveve toela avole ai, vai toelativa. ¹⁴ Kateai kevaluvisi loi ivage, ata moeagaea, loi Disaiboloeali ugulelemai, Diuia abo basu loui kisaiai ata haivevale ke belalaeavai uva, volelai louive. ¹⁵ Isege Iesu loige ata kenenia kobekavai tai Iesu vai sisilatisege. ¹⁶ Iesu au Disaibolo lavigei avoe, la vadeula la ko belalai volelai louva. ¹⁷ Isege ata voelu ata kea uvue, lavisi Iesu laviai avoe, Tisa, daa dii voo vai aeoga ko lolu. Munana toelau avoele dobage au ba nonalivelubele. ¹⁸ Isi aule vatale dobai gobigobiai, uge aivele sabaveu lavusege, au aiu bai meliai vai monogigiai ui. Daa ai Disaibolo lavigelu igeto, ea munana toela lova solilu. ¹⁹ Ige Iesu lavigei avoe, koto eviesite ataea, vali vaidati da laili ulu? lalai hauai ui? katealelu voo ke vai dae love. ²⁰ Ige ea voo ke vai Iesu vileo loige munanau toela keu Iesu ivai, meliai ese ke kavai vai vatale vaevage gobigobiai uge, aive sabau kosahovoi isute ai ulu. ²¹ Ige Iesu mamaveu loui avoe eseu eseta gau ke alu. ²² Vali moeaga munana toela keu olai ese ke kavage voelelu vai venele kavatuva, isi vai ee le kavatuva. Katealelu au ale lolai uvuai lolai kuvabe ai. ²³ Ige Iesu laviai avoe, ale nenive olisi, koto ko vai lelevetige hau koeale alu neniai, ai evievile. ²⁴ Ige ese ke mamau solekata kekoai, toai avoe da ai nona vai lelevealu. Isito au bae di evievi vai leleveti. ²⁵ Isege Iesu ivasege ata moeaga moeaga kea avoe viliviliai loevige eu ivai munana toela kelu loui avoe, golemate, nona site, munana toela velevai lote, daa aa lavialu, isi tota loi, uvuveo tivale. ²⁶ Ige munana toela keu, ese le ke uvule kekoai avoele gobigobia avoele velevai tisege ese keu voeleai dobai ulu, ige abo loui avoe keu voelela keu alu. ²⁷ Isege Iesu adavela holisi letatavage eu kobelai lavilu. ²⁸ Ke iae Iesu oe loisege Disaibolovea sekiai loi lavia avoe, ba vadeuluga lo munana toela ke lova solilu. ²⁹ Ige Iesu lavigei avoe, kelete aba lovelivelu bele isito Otogo Mama kitae Dilava ke daluiava ai vuvune vele ke lovegeva. ³⁰ Kele abo vatava ke kalevai kobekavai tai, Galileia vavae daiai tievelu sekiaive, ataea ivelivelu. ³¹ Isi au Disaibolo haivelu, isi lavigei avoe, atau ese abole vai atau toela vavei, ige abole vai kavagau voele ai. Isito vali nii abutita igalitaule vesusege aule kobelai. ³² Ige Disaiboloea huhue solilu vadeu nonala kateale ke, isi vabuiavai lavie solilu nona ke tavalu. Voeleai kobelale kelu. ³³ Ea tota loevealea Kabenamu vatavae daialu. Isi oetai ui to belagei avoe, laa kuvau tavae vadeula, lake belalai loeviva. ³⁴ Ige ea ke evisi kotoesavai ulu. Kea kuvau tavae vole lavigei loui kosealu. Ole igaliule ata kitae olisi lai loi uvule. Nona kelabo, ke belalai loeviva kuvau tavae, ivaga Iesu belage, ea vabuiavai sekiai ue velu. ³⁵ Iesu ugulumai to au Disaibolo tuelo ke toiavege ea Iesu vileo loevelu ige Iesu lavigei avoe, ata vadeu, huhuai loi uni oliluaga, keu vaola lavisi ata koea huhuiabe keneniai, abolai hau dua ai tigei. ³⁶ Iesu eseuese ave vole vai loi minaebele vaeavai, letatavai, vai au adau kolole vaeavai lavigei avoe. ³⁷ Ata vadeu eseu ese ko dii ivile hoeaseavale keu dataga keu hoeaseavalu, isi da hanavale ketaga keu hoeaseavalu. ³⁸ Dioniu Iesu laviai avoe, Tisa, lo ivage ata voleu ai ivile ataele munana toela kavei lovegeva, ige lo keluai laviai kosealu, avadeu avale ke kaleva, aba loili loale bele ke agei. ³⁹ Ige Iesu laviai avoe, momai kelualive, ata beuba da avale kolate hau isute ke alivelu bele, isitota badalu kotou toela loulivelu bele. ⁴⁰ Ata vadeu lai lolai, loue solige, keu lailoeletela keu. ⁴¹ Ata vadeu kabusile ee kai vai amuge aa ige, au Iesu atala, ige atakeule au ibila kitae vai, eu ee libi kai amualelu. Kelu ivalivelu ata vadeu vaoto ae loige ee kai vavu, ke ibila ale ba Otogoe vaso. ⁴² Ata vadeu evievi esuese volelu, loui vai toela tige, keu vule vole isute vai gobevele kunabeisi, eta lemugai vai davalale kavatuge voeleale ke late la keu, kelu eseu eseave kelai dubitoalive. Isi kotou toela abolai loulive. ⁴³ Ivage ai adau avai toelale tige, ke koisi letuli, isi valivelu adau bodu, vakive ulata uu. Keu duave olie solilu, ai ada toela keu vakivole duave, keta vai veneu nai hodovue site keveo, tai naiva. ⁴⁴ . ⁴⁵ Kelate ivage ai gena vaki voleu, avai toelale tige, ke koisi letulisi vai kavatu. Keu dua solilu ai genau toela keu, duave keta vai veneu nai hodovue site, keveo tai naiva. ⁴⁶ . ⁴⁷ Ige ke late lai niu baiu toela vadeu ivage, ke leiavai vai kavatu, isito niu bai igalita Otogoe te, keu dua solilu lai niu bai abutita keu la agigei, veneu nai hodovue site keveo tige navaviva. ⁴⁸ Keveo vuiabe keu vovo solilu, isi veneu nai uale keu hodovue solilu. ⁴⁹ Ata koo neni abole veneta madoea tigei. ⁵⁰ Madoea keu duave, isi keu koeve baua. Isito madoea koeveu vesuge, lale oleve kateai koeve vai loi avole vaeavage aule toa koeai. Kelu lale lai vavakeu madoea late olisi uge, ataeale ba laeloi Dilavau nona evisi, lai aile. Kelu loui lai voleali uu dua agei vali baita, madoea late koeai ui kotou dua aveve dua, kea madoea la kea.