¹ Iesu vatava ke kalei tota kuialai Diodana ee ke koui Diudia vatavae tilu, isege tota ata moeagaea avoe loevelu ige Iesu ata ke haivelu Au avale kelate aive. ² Ige Balisesea avoe loi seleavai laviai avoe, au nona keu basula keu, malaha voleu au ivu kalevage. ³ Ige Iesu lavigei avoe,nona vadeu Mousese la lavigelu? ⁴ Ige ea loui avoe, Mouseseu loui avoe, ata vadeu au ivu kalevaluaga, kisai vole ai, vai vavuito ba kalevagau tai, au atateo. ⁵ Iesu lavigei avoe, keu lai huhui isu kelugau, ke loulu, isi kisaiai vai vaeavalu. ⁶ Isito, iviavai loi valela Dilavau, ata ale ke malahata keateta gau ai otovelu. ⁷ Katealelu, malaha keule au mamata au aiata kalevai loi au ivu vai uii. ⁸ Ige ata abuti keule loi ata igali olisi ui, misi igali olisi, ige abo bae abuti olisi ulivelu bele, isito misi igalila keu. ⁹ Katealelu vadu Dilavau vai basumale ke, ata voleuba ke vavealivelu bele. ¹⁰ Ke iae, ea ou uvue usege, Disaiboloea Iesu lavia avoe, baito lolai neniai nona ko lou. ¹¹ Ige Iesu lavigei avoe, ata vadeu au ivu kalei tai keate vole meialemege keu avoti tebalau ke alu. ¹² Kelate, keate voleu au vela kalevai tai malaha vole meialemei, avoti uge, kea tebalabo ke alu. ¹³ Ige ata voela abo ese agisi Iesu vileo loige Iesu ke hoeaseavelu, isege Disaiboloea ke lovegei avoe, lai ese agisi teve. ¹⁴ Igeto Iesu ke evisi abolai sisila solilu, isi eseu aia lavigei avoe lai ese agigei dae love, lovege kalevave, keleteave, kea Otogo eseala kea. Abole Otogo uvue tai. ¹⁵ Nona leleve ula, da la lavigei, ata vadeu kaile eseu eseave koea huhuite kelate ale keale, Otogoe tai, isito kosia huhuite ale kea ba talivelu bele, Otogo uvue. ¹⁶ Isi eseuese ke mugagei agisi au adau kolole otovei ke hoeaseavei aboili gilua logoto ba kalevei agisi otovege ea tilu. ¹⁷ Iesu kobelai talivelu asege, malaha voleu viliviliai loi genave valale au kome bokoai, vatabisi laviai avoe, lo haivevale ata dua 'tisa', dale vadeu dua ai u kolikoliai ui. ¹⁸ Ige Iesu laviai avoe, a vadeuluga dalu loui kosealu. Atau dua atabe duau ue solilu. Isito Dilava mamake igaliu Dilava dua. ¹⁹ Au, a Dilavau basuale ke huhualu, ata kavage voelealive, tebalive, vavoloalive, vole seleavevale, isi volea vale vile kelu daele daelealive. Ke ata ke vilela keu isi ai mamata, ai aiata koto evisi hoeaseavege, uveveage ke iva dau age. ²⁰ Ige malaha keu Iesu laviai avoe, Tisa, daa mohohota uvale kela, da ke nenialu, a louvale ke. ²¹ Ige Iesu malihai avolu isiviai laviai avoe, a ale ke nenia duave, isito valevoleave, igali, aa asolilu. Ialelu talivelu ai hauke neni agisi tai voiai moni agisi vale site ke vavei. Aii uvu vai Otogoe vaevaito ba li daa lovai tee. ²² Ige malaha keu nonake evisi uvu kitaealu, eu huhuige hau isute moeaga moeagau avole ulu. ²³ Iesu vovolovai au Disaibolo maligei, lavigei avoe, hau moeagate kea Otogoe tiveve keu, aboele meliai o toloai ulu, abo ba, talivelu bele. Hau moeaga huhuaive. ²⁴ Ige Disaiboloea nona ke evisi huhui kitae aevelu ige tota Iesu lavigei avoe, esea Otogoe tiveve keu toloai ulu. ²⁵ Ovo vole kamela keu bae nila keu vale velevai talivelu bele aule avoele gigiai. Ke late vale vile moeagate kea ba Otogo uvue talivelu bele. ²⁶ Iesu kateai louge Abositolovea ke huhuage aboele isuai ulu, ole igalile Otoge tai ukolikoliai ui. ²⁷ Iesu ke loui lavigei au Abositolo maligei tota lavigei avoe, ataele aule keu isuai, isito Dilava vileo au ba isualivelu bele, isito aule nenive ula. ²⁸ Ige Bitau Iesu laviai avoe, Kosive lo bahata loi hau keneni kalevaito, a lovai lolu. ²⁹ Ige Iesu lavigei avoe, koto leleve ula, daa laa lavigelu, atabeu di koto koo loulivelu tiluaga au oo au mohoho, mahoho, au mama, au aia, au ese, au ivu, au vatava kalevai dii nona ko loui ata haivei tai. ³⁰ Olea nona ko evisi to, kalevai tiale ke agigei loi, tota ata dogave ta agisi loale ke. Isi, dii haukole vateutuvu vale keule vaola Iesu loivale kela ukolikoliai, uale ke vai Otogoe tai. ³¹ Isege olea unila tiale keale ba vaola loi, isege vaola loale keale loi ke leivigei unie tai, kelu ai evievi kele meliai uu. Ataea Otogoe tige ata tee. ³² Iesu kateai louito au mohoholai unila lolu Dielusalema kuvala tisege mohohoea bea ivage Iesu tige uvuiabe keu hada hadai ulu, ige avolea aboili loale kea vabuaevelu. Ige Iesu loi au mohoho tuelo ke lohomegei agisi loi vadeu avoele loiveve ke loui lavigelu. ³³ Isi loui avoe ivave lai ave Dielusalema ega lai kotiva, lailole tai Daiasege abole atau ese vai, Dubu nilovai uvale 'Bulisiti' isi Diuia basu loui kisaiavale kea adae vaeavige abole kavage voeleve kuva kaoai vai Diu oliesite kea adae vaeasege. ³⁴ Abole avole loui, avoele tioai, visuta visukaeavai, vai tai kavage voeleai, ige abole vai abavuge vali nii abuitita, igalita keule vesusege aule kobelai, Iesu kuvau tavaegau nonake loui lavigei tieviva Dielusalemae. ³⁵ Isege Dieimisiu au koo Dioni, Diebedi esea, kea loi Iesu laviai avoe, Tisa, lo vadeulu louale keneni lolai aso. ³⁶ Ige Iesu lavigei avoe, la vadeuluga la olalu ige da lalai aii. ³⁷ Ige ea laviai avoe lo olale ai ataga uvu keveoaluvita ui vole ai ada vaiteveo ui isege voleu ai ada ageveo ui. ³⁸ Ige Iesu lavigei avoe, la huhue solilu la vadeu lake louva, au lale valivelu daa ee iale ke lata isi? isi da Babatisoale kelate au lale lata Babatisoai? ³⁹ Ige ea loui avoe mana, lole aa kabusile ee iale ke lole ke isi, isi aa Babatisoale kelate lole Babatisoai. ⁴⁰ Isito oleu dii ada vaiteo ugulumasege, dii ada ageveo ugulumale keu daele bele ba da laamei, isito keu ata olelai abo otovealeke ba vavei. ⁴¹ Ige Iesu mohoho teni, kea ke evisi abolai uvueabea tuvuai ulu. Ata abuti kelai Dieimisi ta Dioni talu. ⁴² Ige Iesu ba ata abutike vai tai ogeta lavisi, lavigei avoe, vatau ata kole oleu huhuai koseai dau loi ata koea kitae olisi, keule ke vuvunete kaoai to ba loi ataea unila lavisi ba au vuvunete kaoai to ba loi ataea unila lavisi ba au vuvune kele dai ba lohomegei tai. ⁴³ Isito keu lalai kate solilu. Isito ata vadeu huhuai loi ata kitae oliluaga, amiga letolevai, ataea huhui ke lovai tiale, keule vaoe loi lai, unila laa lohomegei tai. Keu lai kitaela keu. ⁴⁴ Ige ata vadeu lai kitae oliluaga, keu lalai hauai lai isivi keneni lalai aito ba vaola loi lai kitae olisi, ba la lohomegei lalai unila tige, ba lovai teve. Keu lai kitaela keu. ⁴⁵ Kelu atau eseu loi vata ko kitaelu loiesolilu, isito loi abolai voeleai lohomegei Otogoe talivelugau lolu. ⁴⁶ Kea loevealea Dieliko la daialu, isi au Disaiboloeali Dieliko kalevai loisege ata moeagaea ivegei aboili tilu. Isege Batamaeas Timaeasi voo keu niveu keloale keu kuvau tavae ugulumai monilu ata toiavei avoe dalu monibe vave. Keu ui ata imiliavei usege. ⁴⁷ Iesu kuva kela loige abo loui avoe Iesu Nasaleta biage kela kou loiva, ige eu toai avoe Iesu Deividi voo, dalu uvua. ⁴⁸ Ata keu kateai toige, ata moeagaea keluai, laviai avoe, ke kaleva. Igeto eu vekeai toai avoe, Iesu Deividi voo, dalu uvua, isi ba genuhamai meliai toalu. ⁴⁹ Ige Iesu toive ke evisi lavilu, isi loui ata ke lavigei avoe, ata ke laviage loo. Ige ata kea nii kelote, ke laviai avoe, Iesu lavisi alu loui avoe loo. Keulu solekai kobelai laivis tai iva. Eu alu loulu. ⁵⁰ Ige nii kelote keu ke evisi kobelai au dabau ogona keu au tavale leiavai vai vaeavai Iesu vileo lolu. ⁵¹ Ige Iesu laviai avoe, a vadeuluga louge daa alu alivelu? Ige nii kelo keu Iesu laviai avoe, "kosive", dii nii alavage da niai. ⁵² Ige Iesu laviai avoe, tee, ai evieviu aa vai neniavalu. Isege niveu solekata alavalu, ige eu niai kuva ivai Iesu lovai aboili tilu.