¹ Iesu aau Disaiboloeai Delusalemae loevelivelu loalea Oliveta talau valale ologo vole abuti Betabedi to Betanio kele daiato Iesu au Disaibolo abuti hanavelu. ² Isi lavigei avoe laea avoti talivelu ivage abo ovo vole doniki, atabeu ele uguluma soliale keabo vai idiu tavale basumage uale ke vaveai vai dalu love ³ Ige ata volea laa belagei loui koseige laa vadeuluga ke vaveava, igelavigei koseave Iesu loula age loo vaveai vaitai vavui ige abole ke evisi solekata hanavage lale vai love. ⁴ Ige esele kea tiale ivage abo doniki dogave kevai oou anaka vavale hadele basumage lavisi ulu. Ige eake ivai tai vaveasege ⁵ Ata volea leleisi uale kea ke ivai lavigei avoe laa vadeuluga doniki ke vaveava, ige ea lavigei avoe Iesu loula age loo vaveai vai tai vavui ⁶ Iesu louale kelate eaa loui lavigelu.Ige ata kea lavigei avoe nenive vai teve, ige eaa doniki ke vai loi Iesu vavulu ⁷ Isi abo dabau ogona ke agisi doniki tatale dedige Iesu kele ugulumai tisege. ⁸ Ata moeaga abo ogona agisi avolu vatale dedisi tisege Iesu tataveia dai tisege idiu sii moeaga abo bokoai avolu dedisitisege ⁹ Ata moeaga avolu unie tisege ata moeagaea vaoe leleisi lovai loi genuhamai kotoai loui avoe selo loi Dilava hoeaseavave Iesu Dilavau ivile lolu. ¹⁰ Duave kitae baua ave sisila kitaeu lolu lailoi Mama Deividi keu vatau uvule selo Dilava hoeaseava isi ivive loui letatavai hoeseavave. ¹¹ Ige Iesu loi Dielusalema uvue tilu isi tai Dubu uvue tai valevile ke iveito valiu vesuge kaei au Disabolo tuelo keai Betaie tievelu. ¹² Tievealea Beteni navaevelu isi tota vavita kuiakavai losege Iesu vagalalu. ¹³ Isi niai ivage oge volela idii vole figi keu lavisi ulu, ige Iesu vagalalelu tai ivai baive bukiai isi. Kelu tai ivage idii figi keu vanave ulaea ulu, baivea uue solilu. ¹⁴ Ige Iesu idii ke laviai avoe ata beuba vaoe ai bai ilivelu bele. Iesu ke lousege Disaibolovea nona ke evilu. ¹⁵ Eaa tota kuiakavai Dielusalemae loevelu, ige Iesu tai Dubu uvule maketiavale ke lovegei moni senisiavale teibolo keta lekoveai moniabeta agisi kosalu. Isi ugu bune voiavale sea keta kosalu. ¹⁶ Isi lavigei avoe loi tota Dubu kole voivoi kalevave. ¹⁷ Haivei avoe abo kisaiai loui avoe dii oo kou gomigomi ola kou. Atako neniale ele gomigomiai igetola vai vavolo ouu uvu toalu. ¹⁸ Dubu nikovai uvale kea, isi Diuia basu loui kisaiai haivei oivale kea kotove ke evisi kuvakaoa vai kavagau voeleai. Kosealelu ata moeagaea kotoveke evisi tetehamalu isi lovai tiliveluage ata kea kuva kaoai kavage voeleai ¹⁹ Katevaga vau gutuage eea Dielusalema kalevai kuiakavai tilu abo loale keveo. ²⁰ Ige eaa vavita tai ivage figi idii keu baekuai sakavai lavulu. ²¹ Bita u Iesu idii figi kelu louale ke vuvuai ualelu loi idii ke ivage keu sakavage Iesu laviai avoe Tisa idii leke iva aa avolu louale kela keu sakavai bokoai lavulu. ²² Ige Iesu lavigei avoe lai evievi vai Dilava vileo vaeavave. ²³ Katealelu nona leleve ula daa laa lavigei aai evievi uge ale tala ko mataki laviai koseige, tala auu soai tai Dilava uvula duba. Isi aa ke louive malomalo solisi auu lutiu baita vai lelevetige tala keule aii huhui ke ai soai tai davalale doai keu Dilavau aveve late laa keu. ²⁴ Katealelu daa laa lavigei valevile ke nenilu Dilava dauiava ige aii evievi kele ba aa laviale ke vaso. ²⁵ Aa lavisi gomigomia luaga aa olelu tuvuauaga Otogoe Mama lavia ige aule ata ke toela totoai. ²⁶ Isito ba avadeu ale, aelete keta aule ba totoai kelu aa vadeu ata vole vai toela tiluaga toelave kelu Otogo biagelu gomigomia ige aule toelave ke totoai toba aeleta totoai. Ige ba avoti doadoai uve ²⁷ Iesu tota aau Disaboloeali Dielusalemae loevelu, ige Iesu tai dubu uvue tilu, ige dubu nikovai uale kea Diuia basu loui kisaiavale kea isi dubu eloda kea Iesu vileo loevelu. ²⁸ Loi Iesu belai avoe aa oleveoga vuvune ko valu, isi aveve kolete aii tiva. Isi olela vuvune ke amulu? ²⁹ Ige Iesu lavigei avoe dale data laa belagei,ige lale da laviageto badata laa haivei,oleveoga daa vuvune ke valu, isi ela hauiva ³⁰ Dioniu babatiso avale keu auu otogoegau ke valu?daa laviave. ³¹ Ige eea nona ke vai belalai loui avoe lailole loui koseige otogoe, ige eule loui koseai ige laa vadeuluga nonai eviesolilu? ³² Isi lai lole loui koseige atale,ige ata moeagaea loui avoe Dioni keu beloveta ata kitaela keu. Kelu lai lole loui koseige ataeale ke evisi lailo kavei, kelu ke kalevave momai laviavale isi kosea loo ke huhue solilu. ³³ Isi Iesu laviai avoe loo malomalolu aa lavialivelu. Iesu lavigei avoe databa laa lavigelivelu bele ole vilelega daa vuvune ke vai ele hauiva. Ige eaa kalevai tievelu,isege Iesu avota auu mama hau ai tilu.