1 Iesu dona volele nona loui haivei avoe malaha voleu auu fuu vole aii avoele kote vole baite ke koisi bukiai agisi loi auu vule kalu kote ke ivila vaini, ke kage vesuge vavavele kala koui vai voleta dai, oo vole koui isi vaini bai vovoalivelu abata vole lovolu ele vaini vate katulivelu. Isi au fuu vai ata vole vavelu isi lavigei avoe dii fuu ko nikovai uve isi kalei oge voleo tilu. 2 Tiale keveo uii tivaga vaini baiu vovoivale kele aa foo vole hanavai avoe talivelu ata ke ivei vaini bai vole kai agigi loo. 3 Ige ese keu loaleu ata kela velevalu,ige ea ke ivai avolu loui kavailovage ada ulata kuialai lolu. 4 Ige tota eu auu hau ese vole hanavai loui avoe talivelu ata ke ivei vaini bai vole bukiai agisilo, ige euu tige abo avolu loui kavai kineve vusage tuvu kitaeta euu kuialai lolu. 5 Ige tota euu vole hanavalu ige vaini fuu le kea kobekavai ke kavage euu foelealu isege vole kavei lovegei vole kavege ea vovolu. 6 Ige abo malaha keu hau ese keneni kavelu igeto, uvuve huhui voo igaliu ulu, ige malaha le keu huhuai avoe, dale dii voo igali kovai hanavage abole ivai ba kavalivelu bele, isito abole hoeaseavai. 7 Kateai au foo igali ke vai hanavalu, ige fuu nikovai uvale kea ke ivai loui avoe, vu kou biage vovela kou lolu, loige lai kavage voeleasege lai vuve koo vaevege lailoealete olisi. 8 Isi kateai loui tevei vove le ke nohoma kavage voelealu, ige abo vai fuu ieae kavatuevelu. 9 Iesu kateai louito, au mohoho ke belagei avoe la huhuage, vuu biage keule loi vadeu ai, ata kele? Aule loi vuve nikovai uvale ke kavege vovosege au vuu kee vai ata vole vavei. 10 Aulaa bukau kotoke dodave solilu? oo kouvale kea ou hade vule vole ke homasiavai loui avoe keu ke olie solilu, isito vule keu ou ivivela laviale vule hadelu vai uluvale kelabo ke homasiava eviva lekovekoveai louvale kela keu loi ou ivivela vule hade melite olisi lavisi ulu. Ige keu Iesu laboke louva, ata melite. 11 Kateale keu Dilavau avevela keu. Ige keu lailoi nile duave bauala keu. 12 Ige atau toela kea kela olai Iesu vatalai isito ata moeaga ke vabuiavelu. Ea huhuaga Iesu donau nonale louale keu abolaigau ke loulu. Isi Iesu kalevai tievelu. 13 Ige atau toela le kea tai nona kaoai, nonave kele vaevei vai tai kavai avolu sobakila ke alu. Isi Balisese ta Helodiesi ke hanavelu. 14 Ige ea loevealea Iesu laviai avoe Tisa lo ivage aa ataea vadeu aleke aa vabuiave solilu isito ale ke loui daiai agisi Dilavau kuvatele otovege keu nenive ula. Ialelu loui au takesi moni sisa vavuale keu duave?, Lole takesi moni vavui? bela kalevai?. 15 Ige Iesu lavigei avoe laea atau toela, eula kuvau tavala nona belalai oivalea, la vadeuluga da seleavalu au moni be baiu laele ulu, vai loige da ivai. 16 Ige abo moni vole bai vai vavuge eu ke vai haivei avoe, oleu munana la moni kole ulu, isi oleu kisaila keu ele ulu. Ige ea loui avoe Sisa. 17 Ige Iesu lavige avoe sisa vile vai sisa vavuve, isi Dilava vile vai Dilava vavuve. Iesu ke louge kea teteu toela aevelu nonave ke evisive. 18 Isege Sadiusisi ata kea loui avoe ataea vovivale kea ba kobekavalivelu bele abo abata kele . Kea kateai louvalelu loui Iesu vileo loevelu isi laviai avoe. 19 Tisa, Mouseseu lolai kisai voleai loui avoe. Ivalivelu malaha voleu ivuaito eseveu ue solisege, malaha keu voelealu. Ige kove keule au kaka ivu ke meialemei au kakalu ese kouevei. 20 Mohoho bahata seveniala ese unila uale keu au keate ke vai to esevebeu uesolisege malaha keu voelealu isi au ivu kalevalu. 21 Ige kove naba tu keu au kaka keate ke meialemelu, isi avoti ui tilogo esevebeu ue solisege malaha keu avota voelealu. Ige naba tili keu ke late alu. 22 Ige ata seveni ke nenia vovoatilu, keate ke luvita esebe vaeava solisito. Ige ivia bele keate keu voelealu. 23 Valini vaola, ataea kobekavale kela ke neniale kobekavai, ige ata seveni kea ivu igalila keu? kosealelu ata seveni kea meialemealelu. 24 Ige Iesu lavigei avoe au aveve katealeluga laa malomaloava. Laa bukau koto evie solilu isi Dilavau vuvuneta laa iva solilu. 25 Abole foo vole kobekavale vali kela aboba vole lohomegelivelu bele, isi ivu vole vavelivelu bele. Isito abole Otogou Anelu late doadoai uii. 26 Isito vovivale vakiteo aau laa Mouseseu kisaiale ke dodava solilu bukae uvue aau botoe uii kisaiale ke Dilava laviai avoe dau Eibolahamu Dilava dala kou isi Isiki Dilava dala kou isi Dieikobou Dilava dala kou. 27 Dilava keu voele Dilava olie solilu, isito ukolikoliale Dilava. Katealelu laea lehosiavala ke alu. 28 Iesu Sadiusisi ata keali nonai usege Diuia ata haivevale ata ke voleu loi uvanai nonaebe evige Iesu nonavale keu leleve ke ulale nonai tiva. Ige Diu malaha keu Iesu belai avoe basu kenenia uvule basu nona keu duave baua isi kitae 29 Ige Iesu loui avoe duave bauala Iselalaea koto ko evive lailo Kosive kitae igalila Dilava Kosive keu lailoi Dilava igali, beta uee solilu 30 Kelu aa Dilava huhualuaga aii lutiu bai keneni aii vava koneni ai ivogi huhui keneni isi ai meli ke nenita Dilava huhua homasiavalive. 31 Ige tota basu nona voletaga kou aai kakolo huhua, nonabe kitaeu ke tavale uee solilu. 32 Ige Diuia basu aii loui haivevale keu loui avoe, Tisa dua aa loui avoe leleve ula Dilava keu Dilava igali beta loi avo late oliesolilu. 33 Kelu aii lutiu baike nenita ula vavu, isi aii lulele ke nenita isi aii meli ke nenita. A biageu amigalu ulavale ke late aai kakololu aso keu basu naba tu la keu aveve keule ovomamoe abo kavei vauale ke leivialela keu. 34 Ige Iesu nonave ke evisi laviai avoe aai nona keu lulele nonalega aa ke nonalu, ige aa keu loito Otogovavalega ke ulu. 35 Iesu dubu uvue ata haiveilogo lavigei avoe Diuia basu loui kisaiai Diu haivevale kea oleve kateilabo Keliso keu Deividiu foo la keu. 36 Deividi biageu Munana tuvu vuvune vele loui avoe Dilava dii kosivelu loui avoe dii ada vaite kove ata ugulumasege daa alu loui tuvuike agigei aii genau valale otovesege aaukitaeabe oli. 37 Deividi biageu koto kele loui avoe dii Kosive ialelu Keliso keule oleve kateai Deividi foo olisi.ige ata moeagaea sisila kitae alu nonave ke evisive. 38 Iesu ata haivevale ke uvue, loui avoe, iva dua ave, Diuia basu ai, loui ata haivavale kea olavale, kote taeteta, abo gogo umuvai eta maketi uvula oisege ataeau ke ivei hoeaseavegei. 39 Isi isiviabela Dubu uvue, voumu dua kela ugulumagei isi, lovi kitae ai ivale kela kosi kitae ivitelai lovi otovevale kela ui aboili loviabe ke igei. 40 Isi ke late abole gobuvuia oke lehosivagei, isi gomigomiavalela o daluiavalela abole egeve baua ke agei, avoe lo kateige ataeau lo ivegei. Kea ke avalelu abole ibilavelu toela kitae abole ba agisi. 41 Ke iae Iesu obeleni otovevale ke vavale ugulumai usege ataeau abo obeleni otoveva moni moeagatea. Abo moni kitae ke otoveva. 42 Isege moni site gobu voleaveu loi au tu '2' beni kela ke vaeavalu. 43 Ige Iesu ke ivai au Disaibolosi toiavei lavigei avoe, leleve ula da la lavigei, gobu kou au moni kitaelau ke vaeavalu. Avolu moni beta oveo ue solilu au lovi iveve ke huhue solilu. Ke nenilau ke otovelu. 44 Ata ke nenia abo moni kitaela abo ke otovelu. Isegeto gobu kehameu avolu oe moni beu uesolilu ke nenilau ke vaeavalu, avolu beta oe ue solilu, moniu vesulu.