¹ Iesu kateaito Diuia Dubu kitae ke kalei tisege vove voleu, loi laviai avoe, Tisa. Ale Dubu ko ivalu abo vule kou duala dubu ko kouvaga duai ulu. ² Ige Iesu laviai avoe, au, aa oo kitae ko ivalu? Vaoe vule kouba tota vule vole tatale ulivelu bele, abole ba ke kavai kosai katui. ³ Iesu tialeu Oliveta talau kobole ugulumai Dubu le ke nii leleveai uva. Isege Bitau, Dieimisiu, Dioni, Enidulu kea sekiai, avoe loevelu. ⁴ Isi belai avoe Tisa, baito lo haive, vali vadeu uvule a louale keule loi. Isi lo haive, oleveo aveve kele lole, tovanave ke ivai, hau kela kou loiva. ⁵ Ige Iesu lavigei avoe lamigalai neniave, ataeau la seleaveva, isi la lohomegei agisi toelale tiva, voele kuvala tilogo voeleiva. ⁶ Ata moeagale ba dii ivile loi, la seleavei, loui koseai, dau Iesu dala kou, isi la agigei tolovele tiva. ⁷ Isi laa evige oge volela abo tuvaliai vole kavege, ke evisi vabuiavevale, keule loi igetoba vaola iviveule loi. ⁸ Vatava vole atateale kobekavai, vatava vole atateali, vole kavei, isege hamule katui vatava moeagale, isege, vagala kitaeule loi, ige loviu ue solisi. Ige keu uvu kitaela keu iviavai lolu, abole toela kitae ivale tae vei. ⁹ Katealelu lamiga neniaveve, ataeale ba la agigei tai, kanisoloea nile otovege aboili kotave isi abole Dubu uvue laa visukaeavei, isi la agisi tai gavana ta kini ta, nile otovege, leleive dii ivile isi dii nonatalu. ¹⁰ Isito Otogou nona kou vata ko nenile tai ata bahata haivei. Vai voleta da isege biageu loi. ¹¹ La Dilavau nona ko loui tisege, abola vatagei agisi kotalu, tige malomaloai loui kosealive, aia, dale vadeu loui. Isi ke huhu moeagalive, isito lauma helaga ule ba, ai aile nonai, nona keu Lauma Helaga nonala keu ai aile lolu, ige abole a hanavage tee. ¹² Valike nila ese igaliale ba volelai haiage atau toela keale, ba loi kavagau, voeleai, au kolu o kakalu, ige mamaule au eselu ke late ai, isege eseale kobekavai abo mamata aiatalu haiage ataea loi kavegabo vovoi. ¹³ Ataeale ba laa ko neni homasiavei, di ivile. Isito oleu kele meliai uale keule ivivela Otogoe tai. ¹⁴ Vali ni vaovela aveve toelau loi, au lavie soliale kele lavige, ba ivave. Ige oleu kisai ke vai dodava luaga lulelea. Isege olea Diudea vatae uale ke, nenia, iluvisi talau visoe tiative, ¹⁵ Isege oleu ou tatae uale keu ba dobai loitai au ou uvue, valebe valivelu bele. ¹⁶ Isege oleu vula uale keu ba loi au oe dabau ogona valivelu bele. ¹⁷ Isito uvu kitae, oleu au esti uale, isege ese gite amuvavuale kelete nohovu, loviu ue solige, abole abo ese ke kavei vaui isii. ¹⁸ Kelu mama kitaelu gomigomiavave o lavia ige toela katealeuba valike nila lolivelu bele, isito valiu duale toelau loige, ivai iluvisiteve, uvaga aa kavage voeleiva. ¹⁹ Aveve toela kitae ule ba loi, vata ko iviavai Dilavau avalela katealela la abo ke louva. ²⁰ Toela keu loige ataiebeu ba ulivelu bele, isoto evievi atalai, Dilavaule ba toela valiu nii ke koisi letulige, vuguai. Ige ata volea valivelu uii. ²¹ Katealelu ivage ata volea, a laviai koseige, iva, Iesu Keliso la kokeu o avola le ke, kotoeabe ke evivale, ala bo ke seleavaeviva. ²² Kosealelu, sele sele Iesu isi Beloveta keale ba loi, a seleavai, isi ivai teteivale ke ta ai Dilavau ata seleavei lohomegei tai, abobigalai kelu. Nenia, abo a seleavage, aboe tiva. ²³ Kelu Iesu loui avoe amigaluiva dua aso, da memila a laviageto ba keule loi. Kelu nen dua aso ataeau a seleaviva. ²⁴ Iesu loui avoe aveve toela katealea le loi vesuge, valiu niule gusuai. Ige batau ba atagalivelu bele. ²⁵ Ige Otogole didi ke neniale lavui, ige otogo keu hadai vuvune kitae ai ui. ²⁶ Ige abole bai ivasege atau eseule Otogole dobai ke valoi, ataga kitaeta, isi vuvune kitaetaule loi. ²⁷ Ige Iesule au Aneluia tai agigei loi Iesu vileo, ige Iesu agigei Otogoe tai. Kelu lati nenialivelu Otogoe taevei, Iesu luvita. ²⁸ Ke iae Iesu au Disaibolo lavigei avoe, lale idi vigi kee ivai avoele lulele vave. Vigi idi keu vanave ke neniale vovolavatisi lavui, isi tota vanave keale lavai kobiage baiveu baealu. ²⁹ Iale ke late lale aveve toela kea loige lake ivaluaga, loui kosea, di loiveveu vugugugualu, anaka vavale loi ulu, aule to aike velevai loi. ³⁰ Iesu loui avoe, nona leleve ula da loui la lavigei aike vata kole uale ko nenia ba vovolivelu bele, isege da louale ke neniale daiai loi. ³¹ Vali kela Otogota vata kotaule ba vesui, isege to di nona kou ba vesulivelu bele. Ukolikoli nona. ³² Iesu loui avoe, da loiveve ke ata beu huhue solilu, Otogo Anelu taea isi Iesu avoe data isito dii mama ulau ke huhualu. ³³ Iesu lovi avoe da loiveve vali nii ke, la huhue solialelu nava kalevave, isito kobekavai, niai uve. Kelu guliguliai, inohovele uve. ³⁴ Iesu loui avoe da loiveve keu ko late. Ata voleu oge voleo talivelu au oo kalevalivelu, au hau ata vole vai vaeavai laviai avoe, au dii oko nikovai uso, isi vole hau igaligaliai vavei loui avoe laea dii hau kole hauai dii inohole uve, hau koneni nikovaive. Isito au kuialai loiveve vali ke nii lavigei solilu. ³⁵ Katealelu lale lamiga neniavave oleve taimi ke uvule ou biageu loiva. Au oe, isoho gutule loiva o vaviu minale o kokolugu kotoisege o vavita vau alavasege. ³⁶ Au loluaga, toelavela keu, a ivige, a nai uva, niai ue solilu. Kelu nita uu, nalive. ³⁷ Dale vadeu loui la lavigei, daa laa lavigei, niai uve. Gomigomile, melia u, guligulile meliai uve. Iesu inohole.