¹ Vali ni abuti taule vesugege Diuia sisila valini ule loi. Abo loui avoe Basova vali kenile aboba valava isiti ta levutivai vau ale ke abo ba ilivelu bele. Vali nikeu loie solisege Diuia Dubu nikovai uvale kea, isi basuiabe loui kisaiavale ata kea, Iesu kavage voeleve ke kuva kaoai nonahamava. Olaeabea sekia Iesu vaitai kavai, mahogovai. ² Abo loui avoe, lai sisila abe vali ni kele lai kavalivelu bele, ata moeagale keivai vavalai lailo lavei. ³ Kateisege Iesu Betani ooee malaha vole Saimoni keu memila lebelasi hatiti kevalu, iale keu oe lovi isi uva. Isege keate voleu botolole senisi hagote ke vai loi ilive leiavai vai Iesu kinele lehosivalu. ⁴ Ige atavolea ke ivai, avolu tuvuai loui avoe keate kou abelau senisi hagote ko vaitai ataele voiai moni kitae agisi ela ata valevile soliale ke vavei. ⁵ Senisi hagote ko abelau wai voiai moni tili handeleti kina agisi monie site ke vavei kea ke loui avolu tuvuai ulu. Aboele late vavalaive, keate ke nohomalu louva. ⁶ Igeto Iesu lavigei avoe, avolu lou kalevave, la vadeuluga keate ke vai toelativa? keu dalu ale keu duave baualau ke alu. ⁷ Laea vali bahata valesite keali ugei, ialelu la vadeu vavelivelu ale ke ba vavegeve. Isi abolai duave ke ageve. Isito dau ba vali bahata laili ulivelu bele. ⁸ Kelugau keate keu dii vavale senisi hagote keta daa emoea valu igeto abo daa vai abavui. ⁹ Keu leleve ula da la lavigelu Otogou nona ata haiveitiale keu uvue keate kou ale keta loui ata haiveve aveve ke duave. ¹⁰ Isege Diudasi Kaliota ata tuelo keu uvule kobelai, tai dubu nikovai uvale ata ke lavigei avoe dale Iesu vai lamei. ¹¹ Ige dubu bulisiti kea ke evisi sisilave ai loui avoe lole ibi lavelu moni amui. Ige eu moni evisi kuva kaou dua ai loui avoe dale oleve kateai Iesu vai vavei, moni vai. ¹² Diuia sisla valini keu loige abo mamoe kavei vau vale kela. Disaiboloea Iesu belai avoe, lole oleve keveo basiova lovi age ii. ¹³ Ige Iesu au ese abutita hanavelu isi lavigei avoe taevelivelu siti uvue tai ivage malaha voleu ee kai vai kabaisi tige ke lovai teve. ¹⁴ Talivelu au ola vaeatige lata tai o kela vaeateve isi o biage ke laviai kosea tisau loui avoe di lovi ivale ou uvukela oleve ke, ige da Disaiboloeali basova lovi ke isi. ¹⁵ Ige aule eue ou uvu kitae vanisita vavuvaga levokikiai uale ke vai, la haivege kele lailoi lovi ave. ¹⁶ Ige Disaibolo abuti kea ke evisi kobekavai tievelu loalea Dielusalema siti kela daiai Iesu luale ke neni age vesulu. ¹⁷ Igeto gutuige Iesu au Disaiboloeali loevelu. ¹⁸ Loi tebolo adale ugulelemai lovi isi usege, Iesu lavigei avoe, leleve ula daa laa lavigelu. La voleule dati lovi ivale keule dalu haiai. ¹⁹ Ige kea ke evisi uvu kitaeai ulu isi igali Galile loi laviai avoe au dala? ²⁰ Ige Iesu lavigei avoe la ata tuelo ko uvule dati tavadisi uvule ada katui beledi vale keule ke ai. ²¹ Ige atau eseule bukau louale ke late aule au kuvate keveo tai. Isito ata ke nohoma, aiaveu vaeava solige duave isito au vadeulugau ulu, isi Iesulu haialu. ²² Ige ea lovi isege Iesu valava vai hoeaseavalu, isi vakoai vavei loui avoe kou dii misila kou, koo ive. ²³ Isi tota kabusi vole vai hoeaseavalu, isi vavei lavigei avoe, koo ive, kou di taola kou. ²⁴ Isi lavigei avoe kou dii taola kou, basu dogave da aleke uvue, di tao kou ata moeaga laigau, kou kosahovolu. ²⁵ Leleve ula, da la lavigelu, da ba tota laili uaini ko ilivelubele vata koveo, ilogoto, ba Otogola laili isi, Dilavau vatava uvue. ²⁶ Aleto labo ke ilu, keu vesuge ane vole louevei to otolovai Oliveta talae tievelu. ²⁷ Iesu lavigei avoe, lako neniale iluvisi, daa kalevai tiative, bukau uvue kateai loulu. Loui avoe, abole mamoe biage ke kavage mamoeale iluvisi tai. ²⁸ Igeto dale kobelai lalai uie tai Galileia vatavae. ²⁹ Ige Bita laviai avoe, ko neniale aa kalevai tiatisi, isege dau baa italivelu bele. ³⁰ Ige Iesu Bita laviai avoe, koto leleve ula da loui alaviai. Mana, vavi kela ale ba da vovohoi loui koseai, ata keu ata volela keu.Ale ke lou abutiasege kokolugu koto abuitiai, isege ale da vovoho, abutita igalita '3' aso. ³¹ Igeto Bita meliai loui avoe be, dale ati voeleai. Daba aa vovoholivelu bele. Ige ke nenia loui avoe, loi nona igalila keu ke loulu. ³² Ea Oliveta kalevai otolovai Getesemenie loevelu ige Iesu au Disaibolo lavigei avoe, kole uve, isege daa daluiavai. ³³ Isi Bita vai Dieimisi vai Dioni valu isi kalevei tige vavave isu kitae age tai lavigei avoe. ³⁴ Dii vavakou isu kitaealu, voeleve ke huhuiu daele loi kitaealu, ialelu kole ui niai uve. ³⁵ Isi tige ege solisege dobai vata kavai Daluiavalu isi Dilava laviage au avoele isu ke vai lelevasege eu doadoai. ³⁶ Au mama laviai avoe, hau keu nenia aele nenive ula, daele kabusiu isuale ko vai ogeta vaeava, isito keu di isivi olie solilu, isito ai ola ula. ³⁷ Isi kuialai laoi ivage ea navaevelu, ige eu Bita laviai avoe, Saimoni au a nalu? Au a niai uesolilu taemi igali ko uvule? ³⁸ Niai ui gomigomia, ige aba toelau loale kele talivelu bele. Munanau isivisivialu, isito vavau homasialu. ³⁹ Iesu tota kuialai tai au lovole kome bokoai vata bisi tota gomigomiai au luta louale ke loui au Mama lavialu. ⁴⁰ Au kuialai loi ivage ea navai ulu niabe keu isu kitaealu. Abo simalalu vadeu loui Iesu laviavei. ⁴¹ Iesu naba tili kele kuialai loi ivei avoe, au lavato navai ula ko alu? ige lai beliu loigeto ba kobekavai?. ⁴² Kobekavave, ige lai tai dalu haiale keala kou daiai lolivelu vuguvugualu. ⁴³ Iesu ke lousege Diudasi naba tuelo keu velevai loige ata moeagaea iavele laluvai lolu, benisi, tave, manu, bi, ke kakavai daiai loevelu. Hau ke dubu bulisiti, elodaea isi Diuia basu avale keala ke vavege agisi ela Iesu kavalivelu gabo agisi lolu. ⁴⁴ Ige Diudasi Iesulu haia lavigei avoe, da tai vatalai uniuniavage avola keu vatalave. ⁴⁵ Ige Diudasiu loi velevai solekata Iesu vileo lolu, loi loui avoe, Tisa, isi Iesu vatali uniuniavalu. ⁴⁶ Isege abo ele Iesu vatalaevelu, isi umuvalu. ⁴⁷ Isege ata voleu Iesu vavale laviale keu au gaia vai ela dubu niovai uale ke, vove vole golemave koisi letulilu. ⁴⁸ Ige Iesu abolai loui avoe, au la ko nenia vavolo atala la kaoai lolu, lai benisi agisi, tavea agisi da kavalivelu lolu? ⁴⁹ Dala ke vali baita laili ui, dubu uvula la haiveva igeto la daa vatala savalu. Isito la ale kou bukau louale kela, lako eveteveteavalu. Ige bukau nona keu loi nenive olisi. ⁵⁰ Ige Disaibolo ke nenia Iesu kalevai iluvisi tiatilu. ⁵¹ Isege vo voleu, ogona vole kitae vai ela au vava viliai eta Iesu lovai. ⁵² Otivaga abo ivai kavage itai tai au ogona matakila amigabuliale keu bodihovoi dobasege eu deu kouata itai tilu. ⁵³ Isege abo Iesu meialemei vai dubu kosi kitae haebulisiti oe tilu, dubu loiabe kitae dubu eloda, Diuia basu loui kisaiavale ata kea keve ulu. ⁵⁴ Isege Bita le keu ogela lavisi sekiai Iesu malihai lovai tiva, tialeu kotavale keveo tai gadiaea niai uale keveo tai minaeabe kele vene koele ugulumai uva. ⁵⁵ Ige ata ke nenia Iesu kavage voeleve ke kaoai Iesu toela loui vavalai kavai, kaoavaga Iesu doadoalu. ⁵⁶ Ata moeagaea abo sele nona vai loi louge to keu nenie solilu. ⁵⁷ Ata volea kobekavai abo sele nonavai loi louiavoe. ⁵⁸ Lo evisege eu loui avoe dale dubu ko lehosivai, adala ale ko, isi valini abutita igalitau le vesusege dale vole koui, adata ba koulivelu bele. ⁵⁹ Igeto nonaeabe keu leleve olie solilu. ⁶⁰ Ige Hai Bulisiti keu minaebekele kobelai lavisi Iesu belai avoe au aele nonabeu ue solilu? vadeula kaiae ata kou alu nona koseale alu? ⁶¹ Igeto Iesu sekiai ulu, nonabe louesolilu. Ige tota Hai Bulisitiu belai loui avoe, au au Keliso, duave voo? ⁶² Ige Iesu laviai avoe kee dala kou. Aleba vaoe iva atau eseule ada vaiteveo vuvune kitaeta Otogole goea adale ugulumai loi. ⁶³ Ige Hai Bulisiti keuke evisi, au ogonala holisi davuai loui avoe, au la vadeu kaoai otiva. ⁶⁴ Laa bahata evige vesulu, keu nona kele Dilava vai toelatilu. La vadeu huhualu? ige ea loui avoe keu voelelugau ke louva. ⁶⁵ Ige atavolea avoele tioavelu isi nive bavui kavaeveva isi lavia avoe Beloveta ko lou olela kou a kavalu. Ige kosive kea abota adata kavaevelu. ⁶⁶ Isege Bita le keu kai kotavale kevea veneu koele ugulumai uva. Isege vaa voleu kea obesiabe kele hauivale keu loi ke ivalogo. ⁶⁷ Vaa ke Bita malihaloho ba loi vuguta lavisi tovevalogo, laviai avoe, 'a keu elaga ata Iesu keti oivale voo vole ala kou.' ⁶⁸ Ige eu vovohoi loui avoeda a louale ke, olela ake louva, da kele malomalo alu. Isi kobelai kotavale kevetilu. ⁶⁹ Isege vaa le keu tota ke ivai kele lelisi uvale ke lavigei avoe, lale kaile ata ko ivalu keu ata ke volela keu. ⁷⁰ Igeto eu amiga vovohoi usege kele leleisi uale kenenia loui avoe, leleve, a keu ata ke voleala keu. Ata, Galileia vole ala kou. ⁷¹ Ige Bitau vovohoiamiga vai tuvule vaeavalu, isi kobelai dubitoalu. Isi loui avoe da atake iva solialela la ke louva. ⁷² Isege kokolugu koto abutialu, ige Bitau Iesu kotoke huhuai, aliou toela ke ai tilu.