1 Vavita vau alavasege Dubu Kosivea, Elodaea, Diuia basu kisaiai loui haivevale, kanisoloea Diu ata bahata ke nenia loi nonahama, Iesu umu vai meiale mei vai Kini Bailate vileo tievelu. 2 Ige Bailatiu, belai avoe au, au Diuia kini alau? Ige Iesu loui avoe mana avola ake loulu. 3 Ige ivi bulisiti kea Iesu, tavae nona moeaga aevelu. 4 Ige Bailateu tota Iesu belai avoe a vadeuluga ata kea nona moeaga ai tavale louale ke be alavige solilu. 5 Igeto Iesu koto solilu, ige Bailateu, tetealu. 6 Ige abo lovi, ivale kela dibula ata vole igali ataeau ivie louale ke, abole vaveage loi. 7 Iale vali kela malaha vole ivive Balabasi keu gamaniali vole kavei voeabe, vole kavage voelealu, ige abo vai dibulalu. 8 Ata moeagaea loi Bailate laviai avoe a memila lolai ale ke late, lolai aso. 9 Ige Bailateu lavigei avoe, au la, olage da Diuia kini vai lamei?. 10 Bailateu huhuai loui avoe, ata koea Iesulu tuvui labo ai vai daeo, loevelu. 11 Igeto tivi bulisitiabe keu ataele vekeai ulu, loui avoe loui koseave, Balabasi vai loame. 12 Ige Bailati tota lavigei avoe, Isege dale vadeu ai Diuia kini ko vileo?. 13 Ige ea avoe vai Satauloeava. 14 Ige Bailati loui avoe, au vadeu toela alu, ige Bailateu tota lavige avoe, au vadeu toela alu? Igeto ea genuhamai toai avoe, vai Satauloeave. 15 Ige Bailateu ata agisi sisila tigelivelu, Balabasi vai vavelu. Isito Iesu vai tuvaliavale ata vavege, ea Iesu meialemei vai tai visukaeavalogoto ba vai kavalivelu tilu. 16 Kateai Iesu vai gamania oo kitae ke uvue tilu, isi tuvali ata moeaga toiavege loevelu. 17 Loevei kosi kitaea katuvale, ogona taote ke vai ela kolovulu, isi kote bekabekate ke kaealoho vai kinevele sanekalu ketevelu. 18 Isi abo kosive lai louvale kelate avolu loui avoe, Diuia kosive kitaeale duave?. 19 Isi bedita kinevele kavai avoele tioai, abo kome bokoai vata bisi tuholuai hoeaseavaeviva. 20 Isi koeleavai, avolu loulogo toba ogona taote ke lebodiai to ogonave vai ea kolovulu. Isito ba meialemei vai kavalivelutilu. 21 Tiale kea kuvau tavae, Sailini malaha vole Saimoni keluvita avoele lolu Alekisalenida ta kove lufasi va mama, keu botoe tiale loisege abo ke ivai laviage eu Iesu idi dote ke vai kabaisi tilu. 22 Kateai Iesu meialemei vai loalea vata vole ive Gologota kela daiaevelu vatava ke iviu kosealu, kineu lolo. 23 Kela daiai, ee vole toela vai vaini ta levutivai, vai Iesu vavulu. Avoe au igau vateve tuvu vesuai. Iesu ke homasiavai, iiee solilu. 24 Ige kele abo Iesu vai ididote au kabaisi tivale kele kavaevelu. Isi ogonave Solodiaea agisi otovei ele kasiava, oleu kasi kele meliale keule ke vai. 25 Vavita valiu niu naini okoloki vasege abo Iesu vai idile kavalu. 26 Vai kavaito kisai vole ai vai kineve tatale isu ivile vaeavai loui avoe kou Diuia kosi kitaela kou. 27 Isi vavolo ata abutita vai idiu dole kavelu, voleu Iesu ada vaiteveo, isege, voleu adave ageveo. 28 Aveve abe keu bukau uvue abo louale ke vai lelevetilu. Louiavoe, aule atau toela, abuti minale aule voeleai. 29 Isege ata moeagaea kuvala tai loi ivai tuvikivikiai, loui avoe, Aha, au ala loui avoe dale Dubu kitae ko kosaluaga valini abutita igalitau vesusege koui vesuiavai. 30 A nona kateale loualelu baito idiu dole dobai loo. 31 Ige Dubu kitaea isi, Diuia basu loui haivai oivale kea Iesu evasiavai avolu loui avoe keu ata volelau ke hoeaseaveva isito au ba amiga isalivelu bele. 32 Isi vole lavigei avoe, keu amiga vai loui avoe dau Diuia Kosive kitae Keliso dala kou, iale dobai loige loo aa ivai ba loi uvu vai aele vaeavai. Ige kelate atau toela abutita keu kotou toela katealeta avolu loui lavialu. 33 Ige valiu minale tuelo koloki, vaitai tilia koloki keuvule valiu niu gusuai vata bahata bavulu. Iale to ba tilia koloki vasege valiu kalulu. 34 Isege Iesu au kotole genuhamai toai avoe, 'Eli Eli Lama Sabakatani', koto keu kosealu di Dilava Di Dilava aa vadeulu daa kalevai tilu. 35 Ige ata volea leleisi uale keake evisi, loui avoe, evive keu Ilaidia lugau ke toalu. 36 Ige malaha voleu ke evisitai hau vole matelesi late savai uale ke vai, vaini ee bisi idita kititisi letatavai, vai aivele vaeavage au isi. Isi loui avoe baito lai niai ivai Ilaidia le loi vaveage au dobai loi. 37 Kateisege Iesu genuhamai kekoaito voelealu. 38 Iesu voeleasege Diuia Dubu uvule abo ogona vai minale basumale ke minale eula davuhovoi tai kaila velevalu isi ogona abutita olilu. 39 Iesu kateai kekoaito voelealu ige tuvaliavale kosive voleu valavele lavisi uale keu ke ivai loui avoe leleve ula ata kou Dilava vola kou. 40 Kateisege keate volea Iesu luvita Dielusalema kalevai loale kea keivai ogela leleisi nimabisi ue viva. Ke a minale Meli Magidaleni, Meli, Dieimisi ta kove Diosese, isi salumu kea aia. 41 Iesu Galileia loige, keala lovai avolu vita oiva isi keate moeagaea avolu vita Dielusalemae loevelu. 42 Valiu loi gutuige, bulau loi vuguvugualu ige. 43 Dioseba Alimatia biage keu atau dua, keu kanisoloea ata vaite, Dilava huhuivale ata. Keu meliai loi tai Bailate laviai avoe, Iesu vai damuge davai tai abavui. 44 Ige Bailateu teteai loui avoe au Iesu voelealu. Isi au solodia vole belai avoe au Iesu voelealu. 45 Ige Soludia keu Iesu voeleale ke loui laviage eu ke evisi Dioseba laviai avoe vaite. 46 Ige Diosebau tai ogona taete vole voiai vailoi Iesu buliai vai tai au vulele abata lovoale ke vaitai abavuevelu. Isi vule vole bosi levovoai vai abatake vaa bavulu. 47 Kateisege Meli Magidaleni, isi Meli Diosese ai kea Iesu abavuale malihava.