¹ Vali vole nile Iesu ata moeagaea avoe loige Iesu haivevaga loviu abolai ue solilu ige eu ke ivai au Abositolo toiavei lavigei kosealu. ² Daa ata kolai uvualu, vali nii abutita igalita uvue daluvita uge, loviu abolai uesolilu. ³ Dale hanavege abo tiluaga voleale kuvau tavae vagalai nibedai, volea ogele lolu. ⁴ Ige disaiboloea ke evisi, loui avoe, lole oleveo lovi agisi, vavege abo valivelu isii, sisilata taaai, aboba kuvau tavae vagalai nibedalivelu bele. ⁵ Ige Iesu belagei avoe, valava vaidatiu ulu. Ige ea loui avoe, seveni. ⁶ Ige Iesu lavigei avoe, galasi adakele ugulelemai uve. Ige ea ugulelemai usege, eu valava seveni kelu au mama laviage mamaveu lovike hoeaseavalu. Ige Iesu ke vakoai, agisi au Disaibolo vavege, ea ke agisi ata vavege abo ke ilu. ⁷ Isege Iesu tota kualume eseieve vole agisi hoeaseavaito vakoai au Disaibolo vavege kea keta ilogo, gogoeabe keta haniai ulu. ⁸ Ata kea lovi ke ivaga aboele neniage abo loviu abuu ke agisi basiketi bosi ula bahata seveni kele agivaga kea ililohoi ulu. ⁹ Malahaea lovi iale ke abo dodavevaga foo taosini, isege hanavege ea tievelu. ¹⁰ Isege ea solekata bouti vai ee vaki voleo tievelu, au Disaiboloeali, vatava vole ivivela Dalamanuta keveo tievelu. ¹¹ Ige Baslisese ata kea loi Iesu seleavai loui avoe au aike vikou hau vole age, loke ivai, loui koseai maa au Dilavau foo alau. ¹² Ige Iesu genuhamai abolai loui avoe, vadeu igaliluga kaile toela ese koea olai vikou vale vole age, abo ivalivelu loui oiva. Daa baa vikou haube alivelubele, abolai ige abo ivalivelu. ¹³ Isi tai bouti vai vaki voleo tievelu. ¹⁴ Isege Disaiboloea momai beledi beta agiesolilu. Ea beledi moeaga agie solilu. Igaliave ulau bouti uvue ulu. ¹⁵ Ige Iesu uvuiabe atahai lavigei avoe, iva dua ave, lamigalai Balisesea isiti "yeast", Heloda isiti talu. Iesu louale keu, ataea sele nonake evige isiti vai valava uvue vaeavage uvui vaealoale kelate seleabe ai uvule ui kitaeiva. Kelu sele nonaeabe evi kaleva. ¹⁶ Ige Disaiboloa Iesu louale ke evisi huhui kitaeai, loui avoe lai beledi moeaga agiesolila age Iesu ke loulu. ¹⁷ Ige Iesu nonaeabe ke evisi, lavigei avoe, la vadeuluga, nona ke huhu moeagava, beledi agie, solialelu au la momalu? huhue savalu? au la evisi lulele solilu? au lai uvu keu loi bavui ulu? ¹⁸ Au lai niu bai ulu, igeto laa iva solilu? au lai golemau ulu? au la, lai golema kela evie solilu? au la huhue solilu? ¹⁹ Daa beledi fai vakoai ata fai taoseni vavege abo ilogo kalevage basiketi vaidati abo odalu? ige ea loui avoe, tuelo. ²⁰ Iesu tota lavigei avoe daa seveni beledi ke vakoai ata foo taoseni vavege abo isi kalevage ualeke, basiketi vaidatilegabo ke agilu? Ige ea laviai avoe seveni. ²¹ Ige Iesu lavigei avoe au lake huhue savalu? ²² Ke iae kalevai Beiseda vatavae lolu. Ige atakea malaha vole nii kelote vole vai Iesu vileo loevelu olai Iesu vatage niveu doa doai. ²³ Ige Iesu niveu keloale ke adavela holisi vi ologo eabe ke leiviai vaitai lavisi nivele tioai au adata behaumai laviai avoe au aa niai valebe ivalu?. ²⁴ Ige eu nii letatavai, loui avoe daa ata ivege idi latea hadai tilu. ²⁵ Ige tota Iesu au adavai nive behaumage, eu ba niage nive keu duage ata ivelu. Isi vale vile ivege nenialu. ²⁶ Iesu vai hanavage au oetilu, isi laviai avoe taunie tivale. ²⁷ Iesu au Disaiboloeali Kaisalia Bilibai keveo tievesege kuvau tavau Iesu lavigei avoe la huhuage ataea dalu loui avoe ata vadeu dala da kou?. ²⁸ Ige ea laviai avoe, au Dioni da Babatiso alau, isege volea loui avoe, au Ilaidia alau, isege volea loui avoe au Bolobeti vole alau. ²⁹ Iesu tota belagei laviai avoe, au keliso alau. ³⁰ Ige Iesu lavigei avoe labeu ke loui ata haivevale. Ige Disaibolo ulaea ke evisi kalevalu lou ata haive solilu. ³¹ Ige iesu au Disaibolo lavigei avoe, atau eseule isu kitaele tai, ige Dubu Elodaea loui homasiavai kavagaule voeleage abole vai abavui igeto, vali nii abutita, igalitaule vesusege aule kobelai. ³² Iesu nona ke neni loui haivege vesulu, isege Bitau Iesu vai tai laviai avoe keu bae katealivelubele. ³³ Igeto Iesu vovolovai au Disaibolo ivei Bita loulu, loui avoe, setene! ogeta lote. Au ai huhui vai Otogoe Dilava vileo vaeava solilu isito vai vatau ataele vaeavalu. ³⁴ Ke iae Iesu ata moeaga keta au Disaibolo ta toiavege abo baita Iesu vileo loevelu, ige Iesu lavigei avoe,ata vadeu daa lovai loluaga, luta amiga vovohoito ba au isu vai kabaisi daa lovai loi. ³⁵ Isege oleu amiga huhuai koseai loui, aia daa hauve kele tilogo voeleiva, ata keule voeleai, vaoe au ba mauli egete valivelubele. Ata keu amiga ula huhuai to Iesu gosibolo nonau dua kovai loui ata haive solialelu. ³⁶ Ata vadeu amiga vai vata kole, vaeavai, vatau isivi lovale keule ivivela vadeu dua aule vai? ³⁷ Ata vadeule au mauli vai vata kole vaeavai sisilai oaloho ivivela aule vadeu dua vai ela au mauli voiai Otogoe tai?. Bela kitaela keu amiga huhua. ³⁸ Iesu louiavoe ata vadeu, ivai matiai dii nona kota loulivelu ai matiage, kaile tebai oivale isi toela avale, ese koea nile, dii nona ko louie solisi matiai uale keule Iesu loivale vali kela au avota atake ivai matiai ui. Kelu ata haive a eviale ke louive.