¹ Iesu vakivoleo tiale kekalevai kuialai autaunie lolu, ige Disaibolo vea lovai loevelu. ² Ige bulau vali niiu loige Iesu tai aboili dubuiabele haivegei, ige ata moeagaea nonaveke evisi tetehamai loui avoe, olevegau keu lulele kevalu isi olelake haivulu, ige au tota, hau ivai vikoai teteavale keta au adata alu? ³ Isi au keu kabenita ta melita vove kovuvuiabe, Dieimisi, isi Diosese isi Diudasi, isi Saimoni? isi amakiniabe la kea lailoili ulu, isi keake loui Iesu homasiavalu. ⁴ Ige Iesu lavigei avoe, Beloveta beuba atavea hoeaseavali velu bele ove tauni ataea, isi, ologove ataea isi ove uvu ataea, baa nonave evilivelu bele. ⁵ Isi kateai hau kitae aveve kee kalevaito au ada vai ata moeaga sitea hatitiale kee vatagege hatitiabe keule vesugei. ⁶ Iesu nona kea kee evie solige Iesu kee huhu kitae alu. Isi aule tai oo igaligali kela oai haivegei. ⁷ Ilogo au tuelo Disaibolosi toiavege ea avoe loige au vuvune kee vavelu munanan toela kavei lovegelivelu isi ata abuti butiai hanavelu. ⁸ Isi lavigei avoe la tiale kole hau beta tievivale lai bedoea ke ulata be doeai teve, lovibe agivale, baiki, isi moni vai lai beletile kunabevale. ⁹ Isito sadolosi ula katuve lai genale, isi kouti abuti katulive. ¹⁰ Isi lavigei avoe laa tiluaga tai ovadeule uluaga kele uve, ilogoto ba kalevai ovoleo teve. ¹¹ Oo vadeu lai nona evige bela evie solige latiluaga laigenau voto vai anakaeabele hamai lelevave gogoeabe ke lai genale ualeke. Ige keu nonaeabe vole kitaela keu abolai vaoe. ¹² Ige ea aloloai ata moeaga haivei lavigei avoe laa avale toelake kalevai kuiakavai Otogo nona evisi lovai teve. ¹³ Ige ea aloloai munana toela ke lovegege ata tilogote kea doadoasege, hatitiale ke Iesu ivile oile taa vavaeabe ke vavui behaumage kee nenia doadoalu. ¹⁴ Kini Helodata ke evige Iesu ivi keu loi kitaealu ige ata volea loui avoe Dioni da Babatiso voeleale kela keu kobelai au vuvune kele gau ata kea vuvuneke agisi ele hau kee ae viva. ¹⁵ Isege ata volea loui avoe keu Ilaidiala keu, isege ata volea loui avoe keu beloveta ata volela keu. ¹⁶ Igeto kini Helodake evisi loui avoe Dioni da Babatiso daa kavage voeleale kela keu kobelai loi ulake aihauke ava. ¹⁷ Keu kosealu Heloda au ko Bilibi keate meialemelu. ¹⁸ Dioniu loi Heloda laviai avoe basu la kevusaiai kou ivute aa meialemelu. ¹⁹ Ige Bilibi keate Helodiesi keu Dionilu tuvuai ulu. ²⁰ Igeo Helodau vabualu, Dioni keu ata evievite atala, isi ata tuvute Dilavau nona leleve kelouiai haivevale atala. Kelu Dioni vabuiavalu. ²¹ Igeto vaa vole duau abolai lolu keu kosealu Helodiesi keu uale valive niu lolu ige Kini Helodau au keatele ke lovive ai au ata kitaea avoele hauivale kelai nona hanavage abo loi gutu kele aboili lovi ke isi ige Galileia vatavae ata ivi kitaete kea abota loi lovi isi. ²² Usege Elodiasi vaa lee keu loi sisilaeabe ai loi niabe kele kavualu, ige Kini Helodau au aboili gutu lovi isi ualeake ivai avolu sisilai usege Kini Helodau vaa lee ke laviai avoe aa vadeulu isiviale ke louge dale vai amui. ²³ Kini Helodau Dilavau ivi loui au basu ai loui avoe aa dii vatava kole vadeulu loualeke dale vai amui. ²⁴ Ige vaa lee keu tai au aia loviai loui avoe kiniu dalu nona kateale loulu. Iale dale tai vadeu loui laviai koseai daa kolu isivialu. Ige aiaveu lavia avoe tai laviai kosea daa Dioni da Babatiso kee kineu bailu isivialu. ²⁵ Ige vaa lee keu solekata kuialai kini vileo tilu. Tai laviai avoe daa isiviai aike Dioni da Babatiso ke kineu bai vai aike idiu vakile melegi alekelevaeavai vai damuve. ²⁶ Ige kotokeu Kini vileo isu kitaea ulu, igeto eu memila loualelu loui au kakoluvuianile kalevage toelalivelu loui. ²⁷ Au Solodia voleu avoele lavisi niai uvale ke hanavage tai dibula uvue Dioni da Babatiso ke gobe koisi letulisi kineve bai vai loi idiu vakile abo melegi ale kele vaeavalu. ²⁸ Isi vai loi vaa kee vavulu ige vaa keu ke vai tai au aia vavulu. ²⁹ Oge Dioni Disaiboloea, ke evisi loi dibula uvue Dioni vava vai tai abata lovoi avoele semenisiale ke uvue vaeavalu. ³⁰ Ige Abositoloea ke ivai kuiakavai loi Iesu laviai elu vadeuabo ale ke neni loui haivulu. ³¹ Ige Iesu lavigei avoe la ulaea aike koveo love ataeau uesoliale vatava koveo. Luu vai uve ata moeagaea tai loige lai neniai lovi ie solilu kelu loi sibeleave. ³² Ige ea ke evisi tai bouti vai tievelu abouvu ataea ue soliale vatavae. ³³ Igeto ataea ivege ea tige abota kobekavai vatale tievelu ata moeagaea vole laluvei ke lovegei tialea aboele daiaevelu tauni le uvale atake nenia memilai daiai usege ea ba loi daiaevelu. ³⁴ Ige Iesu ata moeaga ke ivei abolai uvuai loui avoe ata koea mamoe lateala koea biageabea uesoliale late. Isi hau moeaga haivelu. Haivei tivaga valiniu vesulu. ³⁵ Iesu haivei tivaga valiniu vesuge Disaiboloea loi Iesu lavia avoe vatava kou botola kou ata hanavege abo tai, valiniu vesulu. ³⁶ Hanavege abo tai ovolea uale keveo aboele lovi kaoai voiai iisi. ³⁷ Igeto Iesu lavigei avoe bee laea lovi vavegabo isi, ige ea Iesu laviai avoe au lole tai tu handeleti monile beledi voiai agisi loi vavege abo isi? ³⁸ Ige Iesu lavigei avoe beledi vaidati laele ule, tai ivave, ige ea loi ivage beledi fai isege emiko abuti. ³⁹ Ige Iesu louge ata kenenia vatale ugulelemalu. Galasi adale. ⁴⁰ Volea handeleti, fifiti kele. ⁴¹ Isege Iesu beledi fai keta emiko abuti keta vai Otogoe niai au Mama lavialu isitoba valava vai vakoai au Disaibolo vavege ea ke agisi tai ata ke vavelu kualumeta ke late alu. ⁴² Ata ke neniake ievivaga gogeabe kea haniai ulu. ⁴³ Ige Iesu louge abo beledi ta kualumeta isi kalevale keneni agisi basiketi tuelo odavaga kenenia ilohoi ulu kualumeta odavaga. ⁴⁴ Lovi iale malaha ula abo dodavevaga fai taoseni, isito keate ta mohohota ta mahoho dodave solilu. Diuia aveve kateale avaleai louive, eseuese keta abo dodave solilu. ⁴⁵ Kele solekata Iesu au Disaibolo boutile hanavage ea avolu unie tievelu Beseida vatava vaki voleo. Isege eu ata keneni hanavegelu. ⁴⁶ Eu avota talau visoe vaea tilu au mama lavialivelu. ⁴⁷ Gutuasege boutiu davala minala tiva, isege ee igaliu vakivoleo ulu. ⁴⁸ Isi ivesege Disaiboloea davalau minale hebulu loi kitaeage neniai tie solilu, vau alavalivelu vuguvugui sege folokoloki vavita,Iesu davala adala lavisi lolu, loi isiviai leivigei tai. ⁴⁹ Isege Disaiboloea ivai vabuiavai loui avoe alu munanau lolu. Isi kekohamalu. ⁵⁰ Isege Iesu solekata lavigei avoe vabuaevevale doadoai uve, dala. ⁵¹ Isi Iesu loi boutiabele kadivalu, isege hebulu vesulu, ige Disaiboloea kee ivai huhui kitae aevelu. ⁵² Ea vadeu beledile Iesu ale ke huhue solilu uvuiabe malomaloalu. ⁵³ Ige ea loi daiai vatava vole Genesaleta keveo abo bouti vai vaevaevelu. ⁵⁴ Isi abo boutile otolovai loige ata kea solekata ke ivegelu. ⁵⁵ Isi kobekavai tai atake neni lavigelu ige ea abo haluluviale atake amaeabele otovei agisi Iesu vileo loevelu. ⁵⁶ Ige Iesu oeabeo tige oo sitiabeo tige ataeale abo hatitiavale keneni agisi loi kuvale otovege abo ui Iesu loige ogonave ivike vatalale ke neniale doadoai.