¹ Kateaito loevealea davala vaki voleo daiavelu vata vole Gelasenis vata keveo. ² Ige Iesu bouti kalei dobai loisege tilogoavale malaha voleu aluia vutae uale keu velevai lolu, munanau toela avoele uale keu. ³ Malaha keu vali baita aule aluia vuta keve ugei abo seini ta umuvai vai vaeavage kobelai seiniabe ke bukiai katui talivelu alu vuta kela ugei. ⁴ Abo vali bahata kote melite kela ke umuvai seini kitae keta kee umuvage keneni bukiai katuva. Atabeu baa au meliteta bake lemudisi umuvalivelu bele. ⁵ Vali bahata aule vavita gututa kekoai ui vule gonateke agisi amiga bisi bukia taota ui kekoai ugei. ⁶ Kee ai ulogo ivage Iesu ogevolela velevai loige kobelai viliviliai avue tilu. Tai au kome bokoai vata bisi tuholuai Iesu hoeaseavalu. ⁷ Isi genuhamai toai avoe, dale vadeu igali ati ai Iesu, au ataivite kitae Dilavau voo aalau. Da alavialu daa vai tuvutilive. ⁸ Ige Iesu lavia avoe, ata kee vilele velevai lote au munanau toela alau. ⁹ Ige tota Iesu belai avoe ai ivila ole, ige eu louavoe, dii ivila ligioni, loea ata moeaga. ¹⁰ Ea Iesu laviai avoe momai vata kole loo hanavelive. ¹¹ Isege kenenita talau visoavele ovoo vole abo vaveale moeagaea ulu. ¹² Ige ea Iesu laviai avoe, loo hanavege loo tai ovoo uvue isi otolovai eta butugei agisi tai. ¹³ Ige Iesu hanavege ea ata kee kalevai daiai loi tai ovooea uvue tilu isi tai talale otolovai kevatai davalale otolovai tilu ige ovoo tu taoseni kea vovolu. ¹⁴ Ige ovoo vavei uvale kea keivai iluvisi sitiu uvue tai loui avoe hau kitaeu lee koveo ulu. Ige ata moeagau ivalivelu tilu. Iesu vadeu ale kee evisive. ¹⁵ Ige ea loale Iesu vilela daiai ivage munanau toelau vale ataleal keu ugulumai uva ata keu ogona katuive, isi kineve duale keu ugulumai uva. Ige aboke ivai tota kevabuiavalu. ¹⁶ Ige ovoo biagea malahale keta abo ovoo nonake loui ata bahata ke haivelu, Iesu iviabeta ale keneni galave kelouvaga vesulu. ¹⁷ Ige ovoo biagea Iesu laviage vatavaeabe ke kalei tilu. ¹⁸ Tai boutie kadivasege malahale keu loi laviai avoti taliveluage Iesu keluai laviai avoe. ¹⁹ Au tai ai oe velevai nona keneni loui ai ata haive, kosiveu aele ale kee, isi alu uvuai a hoeaseavale ke loui ai ata haive. ²⁰ Ige eu kuialai tai vadeu Iesu avolu ale ke loui alolo vole kitae louiata haivei tiva. Tialeu vatava vole Dikabolesi ata keneni haivei oiva, ige ata kenenia ke evisi huhui kitae aevelu. ²¹ Isege Iesuvea bouti vai vaki voleo daiasege, ata moeagaea loi vovovai ulu davalau vavae. ²² Isege nimabigevale ata kitae ivivela Dailus keu dubu nikovai uvale ata, keu loi Iesu ivai au kome bokoai vatabilu. ²³ Loui avoe, Kosive, dii vaa eseveule aike voeleai, kelu loii a ada vai tatavele vaeavage a doadoai, valivelu uii. ²⁴ Ige Iesu avoti tilu, isege ata moeagae ke lovegei tai leleisi vovovai ulu. ²⁵ Isege keate voleu taou hatiti valeu tuelo iesi. ²⁶ Keate keu au uvevete dua ke huhuai au mon ke nenila doketa voigei mulamula ivaga vato keu tai toela kitaeele tilu. Doadoa solilu. ²⁷ Ige keate keu Iesu avale nona ke evisi ata moeaga kea uvule loi Iesu ogona ivi vatalalu. ²⁸ Keate keu huhuai avoe dale ogonave ivi vatalaluaga dale doadoai. ²⁹ Huhuive keu loi avoele isuage solekata loi Iesu ogona ivi vatalalu isege tao keu veesulu. Ige eu doa doalu. ³⁰ Isege Iesu au vavau omami kevage vuvuneveu avoele uale keu bodihovoale kelate alu. Ige Iesu ata moeaga kea uvule vovolovai avoe, oleu dii ogona vatalalu. ³¹ Ige Iesu Disaiboloea lavia avoe ale ata moeaga ko ivelu ila ai loui kosealu, oleu dii ogona vatalalu. ³² Igeto Iesu lavisi maligei lotilu olela kee alu. ³³ Ige keate keu huhuige eu nenialu isi vabuai, tete kitaeta loi vavavele nona leleve keula loulu. ³⁴ Ige Iesu lavia avoe dii vaa aii evievi keu avai duatilu. Sisilale tee, isi aii isu keu loi vesula kealu. ³⁵ Ige Iesu ke lousege ata volea Dubu lida kea loi kosike lavia avoe ai vau voelealu. Momai Tisa vai isutilive. ³⁶ Igeto Iesu eule nonaeabeke evisi kosike laviai avoe, momai vabualive isito vai lelevetee. ³⁷ Ige Iesu olae solilu ataea avoluvita tai kelu loui. Bita vai Diemisi vai, Dioni valu, Diemisi kove, isi aboili loevelu kosike oe. ³⁸ Ige ea loalea dubu lida kosike oe loige ata moeagai loi alio kavale keu toelalu, genuhamai kekohamava. ³⁹ Ige Iesu ou uvuetai lavigei avoe lavadeuluga alio kaviva. Ese keu vele solilu isito nalau kealu. ⁴⁰ Ige keake evisi koelehamalu, Iesu loui avoe keu nalau keava. Ito voelealela. Ige Iesu keneni agisi vatae otoveito, vaa kee mamave vai aiave vai, au aboili tiale ata tilia ke agigei ou uvue tilu, eseu naiuale keveo. ⁴¹ Isitai ese lekee adavela holisi laviai avoe "Talita Koum", keu koseilakeu, vau eseave, daa alavialu, kobela. ⁴² Isege esele keu solekata kobelai lavisi tilu lahaniveu tuelo. Ige atake nenia tetehamai vikoai avoe hauvolela kou. ⁴³ Ige Iesu lavigei avoe koo loui daiaevevale, sekiai kalevave. Isi lavigei avoe vale vole vavugau isii. Hau kitaela Iesu keava. Kela lailoi toela vai avoe loige au ke vesuiavai.