¹ Kelate Iesu valivoleo Galileia davala vavae ata haivelivelu tilu. Ige ata moeagaea avoe loevei loi, ui vovovage, Iesu kobelai bouti vole uvue tai ugulumai ulu. Isege ata moeagaea davala gonele leleisi ulu. ² Ige Iesu havivevale ke uvue donau nonale nonai lavigei koseai loulu. ³ Evive vuavale malaha voleu tai au vule laisi ii katulu. ⁴ Au katuvale keu uvue baive volea kuvale lavulu, ige ugu lodinia loi keneni ituhai ige vesulu. ⁵ Isege baive volea vuleu kobole lavulu vatau vuleke vavage badulue solilu vatau saeleale kelu loui solekai lalavalu. ⁶ Isege valiu kaluge vuleu vuvuneage kea gilialu, idumuveu vuleu tatale ualelu louive. ⁷ Isege baive volea idii kotee bekate kea uvue lavulu isi lalavasege bekatelea abota lalavai keneni bavugelu ige kenenia lalavai baie solilu, botou bavugelu. ⁸ Isege baive volea vatau duale lavulu, isi lalavai baiu dua ke otovelu, baive volea teti, volea sigisti isi vani handeleti otovelu. ⁹ Isi lavigei avoe ata vadeu golemaveu uale keu, au golemale nona koo evi, isi amigalu huhualivelu ataea Otogoe tige ata tee. ¹⁰ Kee iae Iesu Auvu usege, olea kele vavavele uale kea isi Tuelo Abositoloeali loi Iesu laviai avoe lolai donau nona kelou. ¹¹ Ige Iesu lavigei avoe, lalai dale Dilavau nona volea mahogovale keloui daiai, isito olea eviesite kelai donau nonate kele Otogo evetevete avage, ataeau nona vai keluga daa donau nona kelouva. ¹² Ataea ivalela, mana abo ivalabo aito neniai tovevai iva solilu vadeula kee. Isitota nona evialela, mana evilaboaito neniai evie solilu, uvuiabeu malomaloalu. Huhuiabeu ue solilu kineu malomaloalu, toelau ivogi bavulu tota kuiakavai loige Dilavau agigeva, toelaeabe vesuiaviva isi agigeve amigalu. ¹³ Ige tota Iesu lavigei avoe, au lata donau nona koo huhualu? Au lale oleve kateai donau nona moeaga ke huhuai? ¹⁴ Vuu kavale malaha keu au loviu iilake kavake late daa nonavale kou Otogou nonala daa lai uvue kee kava. Kelu aduve alva ige bai dua ai usege Biage veu loi ata data vage lai tai. ¹⁵ Ii volea kuvale lavuale keli kosealu alolo atau loi Iesu nonako loui lailo koo haivege lai ke evisi usege, seteneu loi Iesu nonau bai ke agilu lailoi uvue, ige Iesu nonau lailoi uvue ue solilu, kelu amigalu Iesu laviage aele kenikovai ui, seteneu valivelu. ¹⁶ Ii volea vuleu tatale lavuale kea kosealu, kea Iesu nona evisi sisilale valu isi Babatisoai ulu sisila ulale. ¹⁷ Isito evieviabeu idumuve dobai lavisi vatau uvue tiesolialelu loui, ata volea abolai loui kavege abota kobekavai abouli vole kavei, abolai haiage holoea loi ata ke kavege vovolu. Igeke evieviabeu ke gilialu. ¹⁸ Iive volea idi isi kote bekabekate ke uvue lavuale keu kosealu. ¹⁹ Kea koto evilu, isito huhuiabeu vatau haule ulu, monimoeaga ai, bia, kuku, sibo, aiu kotava, eve, ovo, holo, masiva, teba, homasi, dubito, sele aveve keu kaile ata ke bulialogo vai vaeavalu, ige au baie solilu ialelu au baa Otogoe talivelu bele. Kelu toela ke neni kalevalivelu Otogoe tee. ²⁰ Isege ive volea vatau duale lavui lalavale keu kosealu. Aloloavale voleu loi aloloige au ke evisi tai ata aloloige, ata teti, sigisti, vani handeleti kea loi babatisage, keu sisila kitae Otogo uvue. Kelu aa evialeke loui vole haiveitee keule ba baiai. ²¹ Iesu lavigei avoe au laa lameba vaui vai loi maua valae vaeavalu. Vaeavaleuba lameba vakovale lovovekele vakovave. ²² Ige vadeu hogolahale keneniale hogolahalivelu bele. Ou uvule atagai uge, keu kosealu, ataea le abo toela aivai mahogovai isito Dilavau ataga keule baa toelake vai, ataea nile vaeavai. ²³ Iale laa oleu oleu koto evivale kea koto koo hoeaseaieve amigalu. ²⁴ Iesu lavigei avoe daa vadeu louge la eviale kee ave. Laa kealuaga, laleba dii nona koo nenile lulele kitae agive. ²⁵ Iesu loui avoe oleule dii nona koo lulelevevage, Dilavau kelulele kitae vavui isito oleu lulele vaito hauve aa solige Dilavaule luleleve vai leiviai tai. Kelu lai hauve alivelu luleleve moeaga agisi eu vai lailo leivigeitiva. ²⁶ Iesu tota loui avoe ataeau Dilavau adau vuvunele uale keule koseai. Ata voleu au vue tialeu konee ii katuale keu ko late. ²⁷ Keu katui to tilu, isege vavile koneea lalavalu, ige malaha keu konea daiale ke lulele vaa solilu oleve kateai konea daialu. ²⁸ Vata kela ke vai vuvunetige konea daialu. Luta ivive keale daiai loi lavisi vaea tai golemaveule luta daiai loi, igeto baa kone baiu itavavele lalavai loi. Ige uniabe homo keale daiai. ²⁹ Igeto uniabe homo kea giliai lavuge koneu baealu, ige biageveu au naa ta gaia vai loi kone dakoalu. ³⁰ Kelate Iesu tota vole loulu. Loui avoe lailole oleve kateai eveteveteavai donau nona ko loui. Dilavau adau vuvunele uveve kee vakiteo. ³¹ Keu idi vole masitedi idike late baieveu eseieve baua. Lailoi idii geia kelate baieveu eseiveve baua, vata kole idi koo neni bai leivialu eseieve baua. ³² Isito abo kevai laige keu lavialeu namala mataki olisi ulu au doo katuge dove moeaga moeagaea ulu. Vuu idi kee neni leivigei ulu, ige, ugu moeagaea loi dovela uii kaso koui kela unia ueviva. ³³ Idi keu Dilavau nonalakeu vove Iesu vailoi laisi tisege ave Dilavau nona ke neniu vata ko bavuitiva. ³⁴ Ke iae Iesu donau nonabe a solilu, isito aule auvu uluaga aule ke loui au Disaibolo haivegei, vadu au louvale keneni. ³⁵ Valike nila gutule Iesu au Disaibolo lavigei avoe, lai davala koui vaki voleo tao. ³⁶ Ige ea Iesu vai boutita vaki voleo loevelu ata keneni kalevai lolu ige bouti volea aboili loevelu. ³⁷ Isege hebulu toelau loige davalau vulai vaealoi bouti uvue lolu ige ee moeaga bouti uvue lavui ulu. ³⁸ Isege Iesu bouti iae nalu, ige Disaiboloe loi isai laviai avoe, Tisa, au a kateisege loo vatoo vovoliveluga ko. ³⁹ Ige Iesu kobelai lavisi hebulu lavia avoe kaleva isi davalalu loui avoe toleleva. Ige hebulu Iesu nona kee evisi tulisitilu. Isege davalu tolelevai loholiliai ulu, vuloe solilu. ⁴⁰ Ige Iesu lavigei avoe laa vaduluga koo vabuava. Au lai evieviu uosolilu. ⁴¹ Ige Boutile ata loale kee nenia kee ivai vabu bosi ai loui vole lavigei avoe, ee ata vadeula keu hebulu, davalati kotove evilu. Ige hebulu bukiai tisege, davalau kotove evisi sekia ulu vulo solisive. Kelu Iesu le lailoi evievi ke kaoigei kelu amigalu koto evi, ai evievi kela ba aa vai Otogoe tiva.