1 Isi tota Iesu Diuia Dubue tilu, tai ivage ata voleu adave vaki voleu voeleale keu ugulumai uva. 2 Isege ata voleake nimabisi uva, huhuai avoe ivage Iesu ata keu bulau tuvu kole hoeaseavage abo vai nonale vaeavai. 3 Ige Iesu malaha leke laviai avoe, kobelai lavi ata ko nenia nile ige eu kobela lavilu, ata ke nenia minale. 4 Ige Iesu atake neni lavigei avoe, au kou basu tuvula kou, ata hoeaseavai bulale?, bela kalegau voeleai? ige ata ke nenia kotoe savalu, sekiai ulu. 5 Ige Iesu ke loui vovolovai maligei, lotilu nie keu tuvu siliai ulu . Ige ataeake ivai sekiai ulu. Ige Iesu abolai uvuai malaha ke lavia avoe, ai adake letatavai katu, ige eu au ada letatavai katulu ige adaveu dualu. 6 Ige Balisesea ke ivai, solekata kobekavai tilu, tai loui nona kaoai louge abo Iesu kavagau voeleai. 7 Ke iae Iesu au Disaiboloeali tievelu davala vavae tievelu, ige ata moeagaea lovai tilu, Galileia, isi Diudea ata ke nenia. 8 Dielusalema, Idumea, Galileia, isi Diudea atake nenia. Iesu vadeu aleke evisi loui avoe, lai tai lai loi niteta ivai, ilabo kea kelu lolu, Iesu ivalivelu. 9 Ige Iesu au Disaibolo lavigege eaa avolu bouti eseieve vole valu, ige aboba Iesu tavai hadaeveavalivelu bele. 10 Ige Iesu ata moeaga hoeaseavelu, isege olea isivi kitaeale kea avoe loige, eu vatagegabo doadoaevelu. Isege olea vekea avoe loi vatalalea kea abota doadoalu. 11 Ige munana toela kea, loi ivai loui avoe, leleve ula au Dilavau voo alakou. 12 Ige eu solekata lavigei avoe, daa loui daiaevevale sekiai kalevave. 13 Keiae Iesu tota talae vaeatilu, isi au isivi mohoho toiavege ea avoe tievelu. 14 Ige Iesu ata tuelo ke letataeavege ea loi abositolove olilu, isi keale avoluvita oai tigei. Iesu luvita hauve ai tigei ige Iesu le hanavege abole tai ata haivegei, Iesu nona louive, aloloai oigei. 15 Kelu Iesu au vuvune vavelu, ige vuvunevele munanau toelau ataele uale ke kavei lovegei. 16 Ige Iesu au Abositolo tuelo ke letatavegelu. Saimoni ivi dogave Iesu ivihalela Bita "Saimoni Bita". 17 Diemisi, Diebedi voo isi kove Dioni, kelai Iesu iviu dogave loualela Boanegesi, kea hatau vutoale kateale eseala kea. 18 Isi Endidulu, Bilibi, Batolomeu, Matiu, Tomasi Diemisi Alobiesi voo, Tadaeasi, Saimoni da Dialoti. 19 Isi Diudasi Isikalioti kela, Iesulu haiage abo Iesu kavalu. 20 Isi tota oe loevelu isege, ata moeaga ea avoe loevege, ea lovi ie savalu. 21 Isege Iesu aia, mamave isi kovuvuiabe kea, isi kakoluvuabea lolu, Iesu ivalivelu, ata volea seleai loui avoe Iesu tilogoalu ila age vameliabea loui avoe lai tai vai loi avoluvita ui, valivelu nimabesi ui. 22 Keu kosealu Diuia basu loui kisaiavai ata haivei oivale kee volea Dielusalema kalevai keva loi ata seleavei loui avoe Iesuke setene, munana toela kitae Biesabolo kela au vuvune vavuge kele, ataele munana toela ke nunuvegeva. 23 Ige Iesuke evisi ata toiavege ataea lolu, ige Iesu donau nonate kele nonalu, isi loui avoe, aule oleve kateai seteneu setene nunuva?. 24 Isoho vata igalia vole tasaliai, vole kaveluaga aboba ui egealivelu bele. 25 Ige o voleu minale amifata salialuaga, au ba lavilivelu bele. Keule dobai lavui. 26 Ige seteneu kobelai amiga alialuaga aule voeleai. 27 Isito atabeu ba tai ata tuvute keu ove uvue hauve agilivelu bele isito, abole luta malaha ke umuvai, vai vaeavage, nai ula asege ba tai hauve agiva ove uvue. 28 Koto leleve ula dala lavigege evive, Dilavau ataea toelake neni totoaveve keu luleleteu avoele ulu, aule ataea toela ke totoai. Ataea avolu kotou toela louvaleke neni. Aule vesuiavai. 29 Isito, ata vadeu Dilavau Munanau tuvulu, nonau toela loui koseige, Iesu keu steneu vuvunevelegau au ke hauiva. Isi Dilavau munnana tuvu vovohoge, Dilavau ba atake toela vesuiavalivelu bele, keu ukolikoli toelala au ke alu. Aule voele ulake ai, vato amiga lehosivalu. 30 Iesu ke loulu, kosealelu kea Iesulu loui avoe eu munana toela valu. Isi Dilavau munana tuvuke vovoholu. 31 Isege Iesu aiaveu, kovuvuiabeali loi vatae leleisi ulu, isi louge Iesu loi ivei. 32 Ata moeaga moeagaea ugulelemai vovovalu isege eu minaeabele ulu. Ige ea laviai avoe, ai aiala ai kovuvuiali koea loi lelesi ai inohole ulu, aa ivalivelu. 33 Ige Iesu lavigei avoe, oleala dii aia isi dii kovuvuia?. 34 Ige Iesu maligei vovolovai lavigei avoe, ivave, la koea dii aia isi dii kovuvuia la koea. 35 Isito atavadeuia Dilavau isiviale kea, dii kovuvuia, isi dii amakiniala isi dii aiaveala kea. Kelu lai Iesu luvita mamave hau ai ata haivei Iesu loiva.