¹ Dii uvu kakoluvuia seleavale beloveta moeagaea loi vata konenile tievelu iale abo laeloi loui koseige DILAVAu munanau tuvu loele dobala age lo kotove tguvu ko louva, abo kateai louge labeu kotoeabe evigelive isito lota aveveabe ke kaoai ivage au kea DILAVAu munana tuvula agigelu bela munanau toelau agigelu. ² Lale oleve kateai huhuige munana keu DILAVAu munanau tuvu bela seteneu munanau toela. Kosealelu ata badeuia meliai loui koseige IESU KELISOu loale ata olilu koto kateale louale kea DILAVAu munana tuvu agilu. ³ Isito ata olea loui koseige DILAVA voo IESU KELISO loale keu ata leleve oliesolilu, isito munana ula koto kateale louale kea DILAVAu munana tuvu aboele ue solilu. Isito IESU KELISO vai toelativale malahake vilelegabo vuvune ke agilu. La memila evige aveve kateale toela keale ba vata kole loi iale keala ke loiva. ⁴ Isito dii esea, laea DILAVAu ataea iale lale beloveta seleivale kea siauiabe ke lehosivai kosealelu DILAVAu munana tuvute keu laele uale kelu lai uvule vuvuneai uale kelu louive vatau siaute ke lehosivai vuvunea ui. ⁵ Ata kea vatau ataea iale keale vatau aveve kelovai tigei, isi koto louge vatau ataeale ke evisi lovegei tigei. ⁶ Isito lai loea DILAVAu ataea iale olea DILAVAu koto evisi lovai tiale keale lailoi koto evisi isege olea DILAVAu ata olie soliale keale ba lailoi koto evilivelu bele. Aveve katealele lailole ivage oleve ata kea lailo koto evige kea munana tuvu agilu, isege oleve kea lailoi koto evie soliale kea, seleivale ataeala kea, kea laa seleava. ⁷ Dii huhui kakoluvuia, lai volelai olai vole hoeaseavei vole dulugei kosealelu isivi isivi keu DILAVA vileogau lolu, DILAVAu ese olievei DILAVA dibaevelu. ⁸ Isito olea atalai homasiavale kea DILAVAu aveveke iva solilu, kosealelu volelai olavaleke biagela DILAVA. ⁹ DILAVAu au huhui voo igali vai lailolai hanavalu isi olale kevileo lailole ukolikoli mauli vai. Huhui DILAVAu lailo huhuge kitaealu. ¹⁰ Lailoea DILAVAlu olale keu kitae oliesolilu isito DILAVAu lailolai olaivale keu ukolikoli olalegau keu lailolai olai au voo igali hanavage loale lailolai voelealu isi lai loi toelake totoalu. ¹¹ Dii uvu huhui kakoluvuia DILAVAu lailolai ola kitae ale kele lai lota volelai olai vole dulugei voleali udua ai DILAVAu ale kelate aive. ¹² Atabeu DILAVA iva solilu isito lailoea volelai olai vole dulugei hoeaseavei aboili uge DILAVAule lailoili ukolikoliai ui tigei. ¹³ DILAVAu au munana tuvute lailoameale kelega lai ivage DILAVAu lailoili igali toai ulu. ¹⁴ Iale DILAVAu au voo hanavage loo ivai kotove loui ata haivei loui lavigei kosealu, IESU keu vatau ata agiveve kea kosi kitaela keu, aule ata agigei tai otogoe. ¹⁵ Iale olea meliai loui koseige IESU keu DILAVAu vola keu, ige DILAVAule aboili ui, ige ea abota DILAVA luvita igalitoai ukolikoli ugei. ¹⁶ Ige lailota DILAVAu lailolai kitae ale kele lai dibage lailota volelai olai vole hoeaseavei keu biagela DILAVA, iale olea olave avale kea DILAVA luvita igali toaleala kea ige DILAVAu aboili ulu. ¹⁷ Lai aike vata koveo ui IESU aveve kelate ai ata dulugei ata hoeaseavei abolai sisilai tige DILAVAu kotau valiu loige laiba vabualivelu bele. ¹⁸ Lai DILAVA ola vavui olave keneni ai avoele melitavaluaga laiba au tuvuivale kela laiba tuvuveke vabuiavalivelu bele. Isito lai vabuiavaluaga lailole tuvuve agisi kosealelu olea DILAVA tutuke vabuiavai abo uvu vai DILAVA vavui kele avoluvita uluaga abole doadoai ui avoluvita. ¹⁹ Dilavau memila lailolai olai, lailo dulugealeluga lai lota lailoi kakoluvu lai olai dulugeva. ²⁰ Isito isoho ata voleu loui kosealu, daa DILAVAlu olalu au kateai louito au kakololu tuvuai vai toelatige keu sele atala keu. Kosealelu keu au kakolo ivai avolu ola soliale keule oleve kateai DILAVA ivasite kelu olai. ²¹ Katealeluga IESU au basuale kevai lailoamelu isi loui avoe oleu DILAVAlu olale kelate au kakolotalu olai duluai keu IESUla aa keduluava.