¹ Olea loui koseige IESU keu ata dulugevale ata kitae kea koto kateale loui abo uvu vai avoele vaeavale kea DILAVA eseala kea, isi olea DILAVAlu olale keale eseabe ketalai olai. ² Lai DILAVAlu olai isivive ai talavatuve basuale ke lovai tialeluga lai huhuige lai DILAVAu atalai olalu. ³ Lai DILAVAlu olavale kelu loui basuve keu lailoe isue solilu, lai huhuai ualelu louive. ⁴ Kosealelu DILAVAu ese keale bahata vatau aveveke leiviai lailole oleve kateai vatau aveve leiviai. Kosealelu lailoi evievi kele meliai ui tiluaga lailole vatau toela ko leiviai. ⁵ Olea abo uvu vai IESU vileo vaeavaluaga loui koseai IESU keu DILAVAu voo, koto kateale louale keale vatau aveve ke leiviai. ⁶ IESU KELISO kela dobai loaleu babatisoai voeleage taoveu lotilu, keu babatiso ulalu, loiesolilu isito voeletalugau lolu munanau tuvu lailoi uvue ui koto leleve loui lailo haiveva ige lai huhuige IESU keu leleve. ⁷ Lai huhuige DILAVA vove munanau tuvu otogoe uvale ata abutita igalita '3' kea IESU aveve kele koto igali louva. ⁸ Isi vatale koto abutita igalita kea igali munana tuvu isi ee isi tao kea IESU aveve keneni loui daiai lai lo haivelu. ⁹ Iale aveve katealelu lai huhuige DIALVAu voveu avale keneni lai lo haivege keu leleve ataea koto louale keu bahata ataea koto leivialu. ¹⁰ Iale olea abo uvu vai DILAVA vo vavue soliale kea dibage DILAVA koto louale keu leleve isege olea DILAVAu koto evie soliale kea, DIALVA seleavalu. ¹¹ Kosealelu DILAVAu nona loui au vou aveve keta loui au voo vileo uveve dogave lailoamelu. ¹² Iale olea abo uvu vai vove vileo vaeavale kea uveve dogave ke agilu. Isege olea abo uvu vai DILAVA vo vileo vaeava soliale kea ba uveve doga agilivelu bele. ¹³ Da koto koneni lalai kisaialu olale laea lai uvu vai DILAVA voele vaeavale kele laa huhuige leleve ula DILAVAu uveve dogave lamelu. ¹⁴ Ialelu laiba malomaloalivelu bele isito lailole meliai olavele laviage aule lailoi koto evisi. ¹⁵ Lai vali baita guliguliasege euke eviva, iale kele lai huhuige lai vadeulu olaleke aule lailoamei. ¹⁶ Iale isoho ata voleu ivage kakoloveu toela voleage au aukololu DILAVA laviai ige valivelu DILAVAu duluai, uveve dogave vavui isito kakoloveu toela kitae ai vole hosidievege igalito solige ukolikoli uveve keu avolu toloalu ige avolu guligulialive. ¹⁷ Aveve toela bahata avale kea DILAVA nile toelalu isito aveve toela volea ba avai voele voele kuvala talivelu bele kosealelu lai IESU laviage au toelaeabe totoage lailole ukolikoli mauli agisi. ¹⁸ Lai huhuige DILAVAu esea ba meliai toela keai taevelivelu bele kosealelu DILAVA voo IESU keu ke nimabigei aboili oiva iale kele seteneu ba agigei toelale talivelu bele. ¹⁹ Kalege vatau ataea bahata seteneu vuvunele ui isege lai huhuige lailoea DILAVAu ataea. ²⁰ Lai huhuige DILAVAu vou loaleu lulele lailoamelu, iale kelu lai luleleige DILAVA igali keu DILAVA leleve ige lai DILAVAta vove IESU KELISO keali igalitoai ulu. Vove keu DILAVAe igali vileo ukolikoli mauliu ulu. ²¹ Dii esea da nonau vao louge evive, seleivale DILAVA kele lamiga neniavei udua ave kea laa seleaveva.