¹ Daa koto ko louge evive lailoi mamau lailolai olale ke baito ke huhuave olave keu lailola kitaeve baua esevebele. Kelugau lailo agigei au ese toalu iale kelega lai eseve olilu ige vatau ataeau DILAVAu aveve dibae soliale kelega abo lailoi aveveteta diba solilu. ² Dii uvu kakoluvuia lai aike DILAVAu ese olievelu isi vaoe lai loi uveve ke lai huhue solilu lailole oleve kateaiui, isito vaoe au loige lailoleba ivai aveveveba ivai luleleai avolate olisi. ³ Iale olea IESU loiveveke inohovele uluaga abo uvu ke hoeaseavage IESU uvu late duai ui. ⁴ Isito olea aveve toela avale kea DILAVAu nona leguvalu aveve toela vadeu aa alekeu DILAVAu basualela aa ke kosalu, igaliave aa ale kele keneni laa aa ke bokoalu. ⁵ La dibage IESU vilele toelabeu uesolilu iale kele vatae loaleu ataea aveve toela totoalu. ⁶ Iale olea IESU luvita igalitoai uale kea ba vali baita vaveve toela alivelu bele isito olea vali bahata vaveve toela avale kea kele lulele solisi IESU ta diba soliale keala ke ava. ⁷ Dii esea ataeau sele nona louge momai kotoeabe ke evivale ata oleu aveve dua ale keu IESU KELISOu avale kelate aluaga keu IESU lovai avale kelate ale keu duave. ⁸ Isito oleu vali baita aveve toela ale keu seteneu aveve latelauke ai, ata agisi toelatigeva kelu DILAVAu vou loi setene aveve kelau ke lehosivai katulu olale toelave keu vesui. ⁹ Iale ata vadeu DILAVAu ata oliluaga auba aveve toela kealivelu bele, kosealelu keu DILAVAu aveveu avoele ualela keu au ba toela aveve alivelu bele. ¹⁰ Isito lailole oleve kateai DILAVA eseteta seteneu eseteta dibagei. Ata vadeu aveve dua asolisi au kakolo dulua solisi au kakoluvulai ola solige kele lai ivage keu seteneu esela keu. ¹¹ Abo memila tai laa haivege laa eviale koto kela kou, lai volela isiviai vole dulugei. ¹² Memila KEINIu ale kelate lai akalevai keu seteneu ata olisi au ko kavalu keu vadeuluga au ko kavage voelealu, kosealelugau. Kosea lelugau koveu avale keu duave isito eu avale keu toelalu kelegau kobelai au ko kavalu. ¹³ Iale di kakoluvuia vatau ataea kateai lalai tuvuai laa agisi toelatige momai keivai tetehamalive. ¹⁴ Lai memila kateilai voleali mekimekiava isito lai aike lailoi kakolulai isiviai dulugei aboili ui kele lai luleleige lai vovivovi kuva ke kalevai ukolikoli mauli kuvalaga lai tiva. Isito ole au kakolo dulue solisi vai toelatiale keu voele voele kuvalaga au ketiva. ¹⁵ Isi ata vadeu au kakololu tuvualuaga keu ata kineta kavale kateilau ke alu, ige ata kineta kavale keu ba mauli ukolikoli valivelubele. ¹⁶ Lai volelai olai vole dulugeale keaveve lai valu oo dibalu IESU KELISOu lailolai olai voeleale kelega lai aveveve kevai au ale kateai vole dulugei voleali uge duave. ¹⁷ Isito isoho ata voleu hauve moeagau ulu isi au kakolo vole ivage hauveu ue solilu ige au ke ivaito au hau bele duluesolilu avolu uvuaive keu toelalu aveve kateale aito loui avoe dau di uvuvai DILAVA vavulu. ¹⁸ Dii esea lai volelai olavale kele koto ula lou kalevai isito lai vole dulugei hau vole vavei kele loui koseai leleve ula lo lalai olalu. ¹⁹ Aveve katealelega lai ivai koseai loi aveve koea nenive iale lai lole DILAVAu nile vabue solisi DILAVAu nile leleisi. ²⁰ Isito isoho lai huhuige lai DILAVAu nile nenie solilu isito DILAVAu laloi aveve keneni ivalu iale aule lailo hoeaseavei agisi meiltievei. ²¹ Di kakoluvuia isoho lailoi uvu kateale huhui moeaga asolige lailole DILAVAu nile vabue solisi tai nivele lavisi. ²² Lailole vai sisilatisi lovai olaveke aluaga vadeulu lai olaleke aule lai loamei. ²³ Basuve keu uvuie kosealela lailo lai loulu eu olale lai lailoi uvu vai vove IESU KELISO ke vileo vaeavai IESU lailo lavigeale kelate ai volelai olai vole neniavei aboili sisilai vole dulugei ui. ²⁴ Olea DILAVAu basuale ke evisi loui vole lavigeale keale DILAVA luvita igalitoai ui. Ige DILAVAule aboili ui, DILAVA au munanau tuvu lailoameale kele lai ivage DILAVAu lailoili ulu.