¹ Dii esea dalalai ko kisaiai ola solialela laa aveve toela ai, isito ata vadeu aveve toela age ata melite lailoi kaka IESU KELISO avolu au mama DILAVA laviage au ba vai avoele kotau nonabe loulive bele. ² IESU voeleale kele DILAVAule lailoi toela uliai IESU keu lailo ulalaigau voele solilu isito vatau ata konenilai gau loi voelealu toelaeabe isu vaive toela ibilalu. ³ Iale lailole DILAVAu basuale keneni lovaluaga leleve ula lailoea DILAVAu ata olilu. ⁴ Ige isoho ata voleu huhuai loui kosealu dau DILAVAu ata dalau isito DILAVAu basuale ke lova solige ata keu seleai oivale atala keu ke vilele koto leleveu ue solilu. ⁵ Isito olea kotove evisi lovale kea avolu olale ataeala kea. ⁶ Isege olea loui kosea loea DILAVAu atateala koea, iluaga au tiale kelate ai teve ige ataeau ivage DILAVAu abouili ulu. ⁷ Dii kakoluvuia daa lalai koto ko kisaiale kou kotou doga olie solilu isito la memila eviale kela da lalai tota kisaiava. ⁸ Isito da kotoko lalai kisaiavale kou kotou dogave iale ataeale IESU ale ke evisi laa aleke ivai luleleige koto kou leleve IESU loige vaviu aveve keu vesuge ataga kitaeu velevalu. ⁹ Iale olea loui koseige dau atagau ata isito au kakolo vai toela tige ata keu vavile ulu gusule. ¹⁰ Isege olea abo kakoluvulai olai duluge valekea atagale ulu katealelu ata keu au kakolo evievikeba lehosivage au dobalivelu bele. ¹¹ Isegeto oleu au kakolo vai toelatiale keu vato vaviu gugule ulu aveveveu vaviu gusu late atau vaviu gusule tiale kelate. ¹² Dii esea DILAVAu IESU ivile lai toela ulialage daa lalai kotoko kisaialu. ¹³ Kosivea memila ui loivale kea lahuhuila age dakoto ko lalai kisaialu isi malaha dogavea la meliai setene aveve ke kosai katuge ila age daa lalai koto kokisaialu. ¹⁴ Di esea laea lailoi mama ke huhuilage daa lalai koto ko kisaialu kosivea memila la ui koto ko evisi huhuage da lalai koto kela ko kisaialu isi malaha dogavea la meliai DILAVAu nonako huhuai setene vuvune lehosivai meliai ula age daa lalai koto ko kisaialu. ¹⁵ Labeu vatau valevile ko huhuaigelive avolu olabe alive, akeage DILAVAu olatebeu ba aele ulivelu bele. ¹⁶ Kosealelu hau kenenia vatau avevete ula iale ataeale vavau isivike ula agei niu toela huhui toela ai abobiga letatavagei loui koseai loea ata ivitea aveve katealeu lailoi mama DILAVA vileo loie solilu isito aveve kateale ke vatau avevela keu. ¹⁷ Vatau vale vile ataeau avolu olavale keu vata kou tai vesuge keneniale tai vesui, isegeto olea mama kitae DILAVAu ola avale keale vali baita ui tigei. ¹⁸ Dii esea valiniu loi vuguvugualu ige laa memila evige IESU KELISO vai toelatiale ataeale ba loi isito ave vali kole KELISO vai toelativale kelete moeagau loige vesulu kelega lai huhuige IESU loiveveu vuguvugualu. ¹⁹ Atakea leleveta lailoi ata olie solilu ialeluga lailo kalevei tilu isito kea lailoi atate oliluaga abole lailoili ui isito ata volelai loui tievelu. ²⁰ Isito laea katesolilu kosealelu munana tuvuteu laele uge laea koto evisi lovalu. ²¹ Laa koto leleve evisi lovalage daa lalai levaleva ko kisaiai hanavalu laa huhui koto leleve kele seleu ue solilu budiavale kevesulu. ²² Isito ata seleavevale keule loui koseai IESU keu DILAVA voo olie solilu iale ata keu IESU vai toelativale ata keu kateai IESUta mamaveta gogonialu avoe loiesavalu. ²³ Ata vadeu IESU homasiavai gogoniale keu mamavetagau ke homasiavalu isege ata vadeu IESU koto evisi lovale keu mamaveta gauke lovegei tilu. ²⁴ Ialelu loui memila lavadeu eviale ke momaeavalive, huhuai uve isi valivelu IESUta mamaveta luvita igali toai ui tigeve mauli egete. ²⁵ IESU biageu memila ukolikoli mauli egete lailoaveve ke louge vesulu. ²⁶ Daa lalai koto ke kisaiai olale laa koto ke evisi huhuai ata seleavevale kea olai laa seleavege laa nonaeabe evisi, sele nona. ²⁷ Isito IESU au munanau tuvu lalai hanavege lai uvue uale kelu aboba laa haivelivelu bele kosealelu IESU munana tuvu koto bahata laa haivelu iale koto keu sele nona olie solilu. Isito koto leleve iale munanau tuvu nona ke evilivelu valivelu IESU luvita igalitoai uve. ²⁸ Iale di esea avoluvita igali toai uvu ilivelu vali voleo au loige lai baa matialivelu bele isito lai lole vudivele meliai lavisi. ²⁹ Laa huhuige IESU keu ata vaite isi ata melite iale oleu aveve dua ale kea ata vaiteala kea DILAVAu eseala kea.