¹ Iesu raki ḡaitana badigomua koita gaḡa gevege roege: ² “Va Basileia vara onaki ḡoiḡovera rohi be au moe maḡi mare rigiva kiare naḡatera. ³ Auki au besubesu ḡahatuhe besugei iauki oti au ihiro gevene ḡahavaia au moe maḡi mare rigiva kinei, eduge iauki besibe raḡi ororo veite. ⁴ Gerege auki ḡaitana au besubesu ḡaha be mati besugei, roege, “Da ihiro gevenu ḡahava boriti ḡahigeisa: Eraḡiahe, da rigi o kinera, di ada vasi vasive iaḡani ḡainage damu ḡahi gevenu, renu iaḡa inuhati gera netu raḡanu; oroḡiahe,’ ⁵ Eduge au ihiro gevene ḡahava iabara au totovehe otito veite, bera ḡoiraḡi au ḡeḡehe otinu, bera au meve kikiva otinu, ⁶ be iabara au besubesu ḡahava kamugei, ḡoḡai ḡahigei, renu ḡahi hoeki gevenu. ⁷ Negu iau rohite raki hoḡoi. Auki au besubesu ḡahatuhe inuhati besugei, iama oti ḡa kine koitava ḡahigei hoekigei renu iau oḡe tage iama gabuisa. ⁸ Eige auki au besubesu ḡahatuhe boriti ḡahigei ronu, ‘Rigi meva ramu netuanu, eduge da ḡanai ihiro gevene dakamu beta ihirogei gevare. ⁹ Otiahe oḡo uhura, oḡoreana ia eragevare iama ihirogei iauma rigi demaka oi oroḡisa.’ ¹⁰ Gerege au besubesu ḡamituhea iabaraki oti ḡumaḡa koita maḡea se daure ia inuhati bougevare, iauki nisigei oti rigi me iagava tobo ḡahanu. ¹¹ “Eduge iau biage raki oroḡi iau ihiro gevene ḡahavaia erageisa, edube auki atabe eraḡege auka ogonava nune vara auki kinu, ¹² gerege auki beraḡi ronu, ‘Vasi, esemena a ogona maḡe be kiki veite, renu orena kimena a sirivanu?’ Eduge ata era ga be roro veite. ¹³ Eige iau biage raki au ḡahatuhe kirogei, ‘Au vase mati au ade raro gevare, iama mi itahe vadibua kiravisa, eige auna nivi atete au eḡie iana gi raḡohisa.’ ¹⁴ Dadaḡa vara auki ihiro gevenu, eduge rore kibeḡu gera auki idigevenu, oḡoreana au totove ihine.” ¹⁵ Faresia ḡaha iabaraki bouraḡohi tarata ḡuma bei iauka beraḡisa ronu. ¹⁶ Gerege iauki iau ḡamituhe bea mati Heroda koitatuhe ruḡa besugei au ḡasina otinu, roege, “Hadiba Koita, noka dibana aka ga riaḡa koita vara, mati aka Dirava ḡumaḡe riaḡa vara aki kirogei, renu aka be nune ḡahiḡa veitera; aka anana veite auna koita bauge vanu se veitenu. ¹⁷ No boriti ḡahigeve, orena kimena a anaima. Aena ona riaḡa vanu, noma Kaisara tax moimisa, se veite?” ¹⁸ Eduge Iesu ra dibana iau tarata garea, eige auki kirogevenu, “Iaka avanaḡe ḡaha iabara, otavado beigena ia gure da taraḡisa roia? ¹⁹ Aso negu muni tahaka be mi da ḡaḡiromiahe.” Gerege iauki be mi moimanu. ²⁰ Gerege Iesu raki beragei, “Ona unuhu vari vade mati ihe iana onu?” ²¹ Iauki ronu, “Kaisara iera.” Gerege Iesu raki boriti ḡahigei ronu, “Eige Kaisara ienu iama mi moimisa, mati Dirava ienu iama mi Dirava moimisa.” ²² Iau au gare ihine, iauki ḡaḡuraḡohi; eige iauki ei ḡarehi ḡeahu otinu. ²³ Vani kobuḡa eige Sadukea ḡaha be iabaraki Iesu ḡasina oroḡime, iauki boriti ḡahi ronu koita bera beta hoḡe raḡare mati urimi ḡoiraḡira vara; renu iauki beraḡi, roege, ²⁴ Hadiba koita, Mose ra onakime auki ronu, ‘Ata be ḡamika veite hoḡe raḡare, au ḡoḡe ra au ḡobuve miare, gerege iauna iau ḡamuhe raho ḡahigei erehuta ata hoḡe raḡane au ḡamuhea. ²⁵ Negu oḡo nana iau ate inuhati iatiriḡava gera iauki uiege; ata bauge raki maḡi mare, auki ḡamika veite hoḡe raḡanu, gerege au ḡobue ḡaremanu au ḡoḡe ḡasina. ²⁶ Au ḡoḡe abu ḡahiḡava ḡuma kobuḡa ei, mati abigaḡa ḡahiḡava tage, oti netunetua iau ate iatiriḡava iau. ²⁷ Netunetua, maḡiva tage raki hoḡe raḡanu. ²⁸ Maḡurivi ḡoiraḡira vara, gerege, auna iau ate iatiriḡava unuhu mabare renu? Iaukamu iau bouge maḡini kinu.” ²⁹ Iesu raki boriti ḡahi gevenu, “Iaka otito daure vara iaki raḡoha, badivara iaka Buka aena se Dirava hedoke tage iaka dibana veitera. ³⁰ Hoḡe koita urimi ḡoiraḡare iabara beta maḡite se mabate ḡahiḡa vara, eduge iauka vava aneru naḡate ḡahiḡa vara. ³¹ Gerege hoḡe uhura maḡuri raḡohare, ana buka dahida veitenu otavado Dirava ia boriti ḡahi gevenu, ³² ‘Dakamu Aberahamo, Isako, renu Iakobo iau Dirava vera’? Auka maḡuri ḡahe iau Dirava vera, beta hoḡe ḡahe iau iera.” ³³ Ḡaru ḡahaia iabaraki au gare ihime iauki ḡaḡu raḡohanu. ³⁴ Faresia ḡahava iabaraki ihege Iesu raki Sadukea ḡahavaia kou kiege avigahanu, gerege iauki iau bouge bouraḡohi, ³⁵ mati iau bera aena hadiba koita vara, eige auki tohoḡi beraḡani. ³⁶ “Hadiba koita, aena uhura orena aena bauge?” ³⁷ Iesu raki kironu, “ ‘Ama Rohi Bauge ai Dirava ve ḡaharahe visa, ai soruke inuhati, mati ai suare inuhati, mati ai uhure inuhati.’ ³⁸ Ora sina sinava oroḡi negu aena ketake riaḡa vara. ³⁹ Renu aena ketake abu ḡahiḡava aukamu onu: ‘Ai ḡaika koitave ama au ḡahara visa a avahu ai ḡahara vare naḡate.’ ⁴⁰ Mose aenave inuhati mati peroveta ḡaha iau hadiba ḡumaḡe iabaramu aena o abu ro gevene iau gena iana iahe iahe misa.” ⁴¹ Faresia ḡaha be iabaraki bouraḡege. Iesu raki bera gevenu: ⁴² “Iana orena kimena ia Keriso anava? Auna unuhu moenu?” Iauki kironu, “Auka Davida moera.” ⁴³ Auki kiro gevenu, “Orena kimena Horu Aena Davida uhurehe ga gahe gena au ronu, Rohi Bauge, ⁴⁴ ‘Rohi Bauge eraki di Rohive kironu, “Di vamaḡa kasihe gurama, atete dana ai enana ḡahatuhe idigei ai vasi derikehe ḡosigeisa.” ’? ⁴⁵ Ama Davida ra roma Rohi bauge, orena kime auka au moe?” ⁴⁶ Koita bera mati au berabeve makava roro veitera. Vani eigera bera mati au berabebe vivi veitera.