¹ Iesu mati au ḡamituhe ruḡa oti Ierusalema kahika ḡahare iauki oti Betefage hakiraḡi, Oliva nimu ḡaika, eige Iesu raki au ḡamituhe abu besugevenu, ² auki kirogevege, “Oti iai vaḡotoni oḡo be ramu enu, iaka negu doniki bera raro rarove behube vara, ḡamikave ḡore; vahege vare iama nisigei oroḡisa. ³ Koita bea iaḡa be roege, iama kirosa, ‘Rohi bauge eraki ḡaharahe viogeima gerege auma vaina ḡarire geisa.’ ⁴ Ḡuma oramu ḡaḡae ḡoinu peroveta koita e ḡare bina riaḡa ḡahiḡa vara, roege, ⁵ “Ierusalema oḡo ketake e boriti ḡahiahe, Eraḡiahe, iai rohite ramu e oroḡima, manauve, renu auka doniki ada ge auki ḡuivanu, renu doniki ḡamika dehiehe gera.” ⁶ Au gamituhea iabaraki au boriti ḡahi gevene ḡumahe kiogevenu; ⁷ Iauki doniki mati ḡamikava nisigei roḡahege iauki ogona idigei iau ada ḡosi gevege, Iesu raki ḡadimi adahe guramanu. ⁸ Koita dadaḡa iabaraki iau ogonave idigei ḡumaḡa tatagei, mati be iabara idi hanaka bokogei ḡumaḡa tatavare gevege. ⁹ Koita dadaḡa au vaḡotoni uriḡahi otege be iabara au itahe oḡiege iauki bara raḡohi roege, “Davadi Moe Maḡe ḡahi iahe! Maḡe ḡahiahe auka Rohi Bauge ihehe ge auki oroḡima! Aumi no vava Moteaha!” ¹⁰ Iesu raki Ierusalema hakivi, koita iabaraki kou kiege heḡiri raḡohi, berabe raḡi roege, “Ona unu hunu?” ¹¹ Koita iabaraki to raḡohi roege, “Ora Iesu peroveta koita era, Nasareta Galileia ge auki oroḡanu.” ¹² Iesu raki dubu ḡadimi time auki hae kiegare ḡahavaia inuhati oia gevenu, mati moni senisi ḡahegare patava renu uguha haevege ḡahava iau guragu iaḡane inuhati iagegei bohu gevenu. ¹³ Auki boriti ḡahigei ronu, “Dirava ra onakime auki ronu, ‘Di iagera imimi iaga vara’; eduge iaka mime iaki ia vaho ḡaha iau hata gabune kia.” ¹⁴ Koita ni veite mati vasi daurete ḡahava iabaraki au ḡasina dubu otege, auki maḡe ḡahi gevenu. ¹⁵ Eduge dubu baugea mati aena kiki ḡahava iabaraki au me maḡe kiege koita maḡe ḡahi gevege eraḡei, mati iauki ihege momona iabaraki bara raḡohi roege, “Davida Moe Maḡe ḡahiahe,” iauki ho ḡahanu ¹⁶ gerege iauki beraḡi ronu, “Ana ihima otavado iau roia?” Iesu raki kirogevenu, “Erege; iana buka aena dahida veitenu, ‘Iakamu momona ia mati karukarea iau avaḡehe hadiba ḡahigei ḡuma maḡe kiogeva mati noḡova tage’?” ¹⁷ Iesu raki ḡare gevare, auki urimi otinu Betani vahi kobabe ei iaḡanu. ¹⁸ Va tahege Iesu raki oḡi ḡoiraḡi Ierusalema otinu. Au ḡumaḡa ge auki ḡubu raḡanu. ¹⁹ Auki suke idibe ḡuma ḡaika eraḡanu, gerege auki erarava tiege maka veite hanaka unaḡe. Gerege auki idi eki ronu, “Aka beta ḡaitana makate ḡoiḡoara!” Tutube veite suke idi era hoḡe raḡanu. ²⁰ Au Ḡamituhea iabaraki eraḡare iau bouge ḡaḡu raḡohi, roege, “Orena kimena suke idi e vaina hoḡe raḡanu?” ²¹ Iesu raki kirogei, “Riaḡa vara daki roma, iai ihihive ia riaḡa ḡahare mati uhu abu veite ḡoiare, se beta da suke idi virei kine naḡate, mati beta oḡu geraki eduge iaka nimu o tage ga ḡahege, ‘Oi rakahoḡi eve uguha,’ auka auvahu rakahoḡi eve uguguara. ²² Ana riaḡa iaḡa bena a ḡaharahe imimiva kima, aka iaḡaniva mimivara.” ²³ Iesu raki ḡoiraḡi dubu otinu uhura, dubu baugea mati koita baugea iabaraki au ḡasina time iauki beraḡanu, “Otavado hedo beigena a me o kiogeima, mati unuhuna ieriri a moimanu?” ²⁴ Iesu raki kirogei roma, “Berabe kobabera daki ia mohigeima; ia makava da boriti ḡahege, gerege dana ia boriti ḡahigeisa unuhu hedokehe gena da me o kiogeima. ²⁵ Oreigena Ioane ieriri marena au babatiso viege, Dirava ai gena se koita iau gena?” Iauki iavahu gure bebe bera gevege iauna kiege eseki roroanu, “No negu roare, ‘Dirava ai gera,’ auka noki rogei gevara, ‘Menu gena ia Ioane riaḡa ḡahiga veite?’ ²⁶ Eduge no mati roare, ‘koita iau gera,’ noma koita iau siḡore raḡohisa; badivara iauka iau uhuḡati gera Ioane ra iauki riaḡa ḡaha auka peroveta koita vara.” ²⁷ Gerege iauki Iesu kironu, “Noka dibana veitera.” Iesu raki mati boriti ḡahigei ronu, “Da tage beta ia boriti ḡahi geige vara dana ieriri oreigena da ḡuma o kiogeima.” ²⁸ “Otavado ana ia anava? Atabe au ḡamuhe mo abu; auki oti ḡami bauge besugime auki ronu, ‘Di moe negubutu oti ḡeḡe me ma.’ ²⁹ Auki besibe vi ronu, ‘daka be otitoara’; eduge auki ihie ananavi ḡoiragare auki otinu. ³⁰ Iau Mame raki ḡami abu ḡahiḡava ḡasina otime auki ga kobuḡa e kironu, auki itonu, ‘da kena otisa, mama’; eduge otito veitera. ³¹ Iau abu iau uhura unuhuna iau Mame rone meva kinu?” Iauki ronu, “Ḡami bauge.” Iesu raki kirogevenu, “Riaḡa vara daki ia boriti ḡahi geima, takisi gogoare ḡahava mati ni muduka raḡare iaba ramu Dirava basileiave uhura ia uriḡatugei otitoara. ³² Ioane iai ḡasina orogone ra ḡuma ieririva ge auki oroḡonu eduge iaka riaḡa ḡahiḡa veitera, edube takisi gogoare ḡahavaia mati ni muduka ḡaha iabara iaka riaḡa ḡahanu; renu ia ihie eraḡane tage iakamu beta anana raḡohi ḡoiraḡare riaḡa ḡahanu. ³³ “Badigomu be mati ihi iahe. Nega beige mata bia be raki ḡeḡe be kinu, auki ḡarava kiare, au make kiki abava tage, renu ḡeḡe nitabata ḡaheva iau niḡa niḡa iagava tage ḡonu. Gerege auki ḡeḡe nitabata ḡahi gevare iau ada uhura maemare auki oḡo ḡaremi mata bei otinu. ³⁴ Ḡeḡe taboro ḡahiḡa negava raki kauege, auki au me ḡahatuhe besu gevenu ḡeḡe nitabata ḡahare iau ḡasina au ḡahune mimiva otinu. ³⁵ Eduge ḡeḡe nitabata ḡahava iabaraki au me ḡahatuhea oiagei, be hodivi hoekare, mati muni tahu ḡahi gevege. ³⁶ Auki ḡaitana au me ḡahatuhe dadaḡa besu gevenu, uriḡoi besu gevene era avie; eduge iauki uriḡoi ḡuma kobuḡa e iau kinu. ³⁷ Netunetu ge auki au moe besuḡanu iau ḡasina, roege, ‘Iauka negu di moe matau ḡahiḡa vara." ³⁸ Eduge ḡeḡe nitabata ḡahare ḡahavaia au moe eraḡane, iauki onaki ronu, ‘Oramu ḡeḡe o biava moera; no ḡami hoekare noma au ḡeḡe noni misa.’ ³⁹ Gerege iauki ḡami hoekare, miare ḡeḡe itaharahe kiravanu. ⁴⁰ Gerege negu ḡeḡe biava oroḡare na otavado auna kikivanu ḡeḡe nitabata ḡahare ḡahava iau?” ⁴¹ Iauki boriti ḡahi ronu, “Auka negu koita daure inuhati ḡahigei hoeki gevare, auna ḡeḡe emi koita be mohigeisa, gerege iauma au ḡeḡe make kiki negahe au ḡahune tage anavisa.” ⁴² Iesu raki kirogevenu, “Iana Buka aenava dahida veitenu: ‘Muni bera iaga ḡovare ḡahava iabara besibe ḡaha muni eramu au ḡaikera; Ora Rohi bauge au kikivera, renu eramu heḡiri erara vaḡa maḡe vara’? ⁴³ Eigera daki iaki rogeima, Dirava basileia vera auka iai mi ḡoiraḡare mati mi oḡore iana madika maḡe kiare e mohigei gevara. ⁴⁴ Unuhu na muni ada desuraḡi ḡohima auka hosaraḡi tina tina ḡoiḡo vara; mati koita be ada gena au desuraḡi ḡohima auka ḡami hoeki kivara. ⁴⁵ Haroro baugea mati Faresia ḡahaia au badigomuve ihine negahe, iauki dibana ḡahanu auka iaukera auki iau gare vima. ⁴⁶ Gerege iauki au ni taḡotaḡo mimiva ronu, eduge koita dadaḡa eige iauki siḡo raḡohanu, badivara iauki roia Iesu rai peroveta koita ḡoisa.