¹ Iesu raki garu ḡahaia mati au ḡamituhea gaḡa gei ronu, ² “Iana Aena ḡahaia renu Faresia ḡahaia aumu hedo mohi gevenu iauka Mose ga hane ḡahiḡa ḡahatuhe iabara; ³ eige, iama iau gare ihigevare mati ḡumahe oḡigeisa, edube ia negu iau kiogevare tohogeime, badivara iauka iau ga raḡohare ḡumahe oḡiḡi veitera. ⁴ Iauka iaḡa isukate, mati berebere ra iauki ruhiḡa, mati iauki mi koita be iau ada ḡosigei, eduge iauka beta riaḡahe iau ada kakunehe beta iahegei gevara. ⁵ Iaḡa inuhati gera iauki kiogevenu koita iabara erageisa; edube iau gera iauki idigei iau varikehe mati iau adahe rarogei mati tinabe ketake ḡahi koita iabara erageisa iauka Dirava kamui berebe ḡahava iabara. ⁶ Iauka gabu maḡeva iauki ḡaharahe raḡoha rigi negava mati dubu uhura iauka guragu gabu maḡeva gurahisa, ⁷ Iau urave koita iabara hae kiare gabuhe mataua maḡe ḡahigeisa, mati rosa hadiba koitaia. ⁸ Eduge bea negu ia idigei hadiba koita rogeime, badivara hadiba koita vara kobabera, iaka iai bouge gere gereve iabara. ⁹ Mati ia negu vata ketake o ada be mi rome mama, badivara iai Mame ra kobabera--vava uiare. ¹⁰ Se ia negu ia bebe idigei uriḡatuḡa koita rogeime, badivara iai utiḡatuḡa vera kobabera, auka Keriso ra. ¹¹ Iai uhura be iau mi raho ḡahare auka ia besubesu koitave ḡoiḡoara. ¹² Unuhuna auvahu aumi raho ḡahima, auma manau visa, mati unuhuna manau vima auka raho ḡahiḡa vara. ¹³ “Aena ḡahaia mati Faresia ḡahaia, tarata ḡahaia! Iaka koita iau basileia otito ḡumava iaki koua. Edube ia iavahu ḡaitage uhurahe otito veitera, eduge be iau otito ḡumaḡe iaki kougeve. ¹⁴ “Aena ḡahaia mati Fariea ḡahaia, kava tarata vane ianu. Badivara iaka ḡobu taragei iau iage kohuve idigei, mati ḡuriḡuri eige rogei be iabara ia erageisa; eigera Dirava ra iau kiare gahuara isukate ḡoiḡoara. ¹⁵ Kava tarata vane aena hadiba ḡahaia mati Faresia ianu. Badivara iaka eve mati vata ketake ora iamu ioa ḡahanu iakai koita kobabe maḡuri ḡahisa, renu iaka mi auka ia bei ḡoisa, eige iai ḡaitage iau daure ḡahune tage mi vene uhura ia kira geige vara. ¹⁶ Kava uriḡatuḡa ḡaha daure ia, iana niḡa niḡa veitenu ia gure roia, ‘Unuhuna dubu aena ihehe be ominue varera maka veitera, eduge unuhuna Dubu aenava ominue viege auka au gare riaḡa ḡahiḡa.’ ¹⁷ Iakamu ni kopute mati omoto veitea! Orena ihi rahote, negu golo vanu se, Dubu uhura golo aena ḡahare enu? ¹⁸ Onakime iaki roia, ‘Koita be pata o ḡaika ominue vare ra iaḡa be veitera, eduge au iaḡa be pata ada ei ominue ḡahege auka e badina ḡahiḡa vara.’ ¹⁹ Kava ni kopu ana ianu! Orena ihi rahote, iau mohimohi raḡare enu se aena iaḡa be iau aena ḡahare pata vanu? ²⁰ Gerege unu huna ominue vima pata aena e ihehe, e aukena pata aena e mati pata ada iaḡaniva inuhati iau ominue visa; ²¹ mati au negu Dubu ei ominue vareva, auka Dubu ei mati Dubu e uhura uiare Diravava auge auki ominue vima; ²² mati koita be va ihehe ominue vare, auka ominue vara auki vima Dirava terona vehe mati ḡaikahe unuhuna au ada ḡuramima. ²³ Kava tarata vana aena ḡahaia mati Faresia ḡaha ianu! Badivara iamu demaka maḡe ḡahiḡa madikava tinatina iaki boubou naḡate mi Dirava moima, eduge aena ga baugea iaka matau ḡahiḡa veite: aena bauge o iabara iana idigei koita bea mati vaḡahu ḡahi geisa. ²⁴ Kava uriḡatuḡa ḡaha daure ia! Iakamu iaḡa kusinaike be ai eia uhura ariraḡare iamu kokiva, edube iaka kamela ketake erara veite iara soneva! ²⁵ Kava tarata vana aena ḡahaia mati Faresia ḡaha ianu! Iaka iai tamuta kohue itahara vaḡu ketova, eduge uhurava vara ididi kava ḡumaia mati ḡuma daure ia iabaraki tobo raḡohanu. ²⁶ Iaka ni koputea Faresia ḡahaia! Otavado vanu kapusi uhura e uriḡahi ketoviahe, gerege itaharava tagena maḡe ḡoisa. ²⁷ “Kava tarata vana aena ḡahaia mati Faresia ḡaha ianu! Iaka erehuta hoḡe ḡaha iau midavave itaharava iau regui kae ḡahare, eduge uhura vara hoḡe ita mati miro raki tobo ḡahanu. ²⁸ Ia ḡaitage koita itahe ia eragevare iaka maḡe iabara, eduge iai uhure iaka tarata mati ḡuma daure raki ia toboḡa gevenu. ²⁹ “Kava tarata vana aena ḡahaia mati Faresia ḡaha ianu! Iaka peroveta ḡaha mati Dirava riaḡa ḡahege ḡahava iau abate gevene gabua reḡugei mati herati ḡahigeva, ³⁰ mati iaki ronu, ‘No ni tenetuhe iau ḡuru raḡane negahe ḡoinebe, iau peroveta ḡaha ḡahi gevene noka beta iahe gevenu.’ ³¹ Eige iaki iavahu ia ḡaḡae ḡahigei iaka peroveta ḡaha iau ḡahigei hoeki gevene iau tenetuhe iabara. ³² Oti kiege netu netua tiahe, iai iahuvea sina sinava kinehe. ³³ Inuhu daure ma ḡahanu! Iana negu vene ia besugevare iana orenaki siviḡoro raḡira vanu? ³⁴ Eigera daki negu peroveta ḡahaia, uhuvaka ḡahaia, mati aena kiki ḡahavaia, iai ḡasina besu gevenu. Eduge iaki be ḡahigei hoeki mati satauro ḡahigei, renu dubu uhura be hodigei, iaogei oḡo bei oti oḡo bei, ³⁵ gerege ḡuma maḡe kiogevege ḡahava ḡahi gevene ḡahuara iai ada gera. Abela ḡuma ieriri koita mati Barakia moe Sakaria ia pata aena padahege iaki ḡami hoekanu. ³⁶ Riaḡa vara daki ia boriti ḡahigeima, negu tau o ḡahava iaukena ḡahua misa. ³⁷ “Ierusalema, Ierusalema, iaki peroveta ḡaha ḡahigei hoekigei mati Dirava besu besu ḡahatuhe muni tahu ḡahigei! Dana nega esebu da urai iai ḡamuhe idigei di ḡaika bougeisa, erehuta uguha au ḡamuhe inuhati au akahanehe baku gevare naḡate, eduge iaki besibe raḡanu. ³⁸ Eige iai Dubu vera koita veite mati ahake ḡoigoara. ³⁹ Iakera daki ia boriti ḡahi geima, iaka beta da eraḡi ḡoiraḡohira vara atete ia rosa, ‘Rohi bauge ihehe oroḡare koitava iama maḡe ḡahisa.’ ”