¹ Ningo te nango, eha ka iri keto javo jikoro vihoja re? Ningo te nango kikiva mane hioror ningota pambutuja eto nongo ta eto nango ta vuretuja, embo emi ami eora, angato ningo ta eto nango ta vuretuja, embo eni ami eora, angato nango aore? ² Nimo nuha avo nangota kikiva, kajari nangota jo ai mhija, embo meni betapa ami ereketo ki ora. ³ Kikiva emi kuhiuja, avo meni Otofu ai eto vuviaja, ango hiere pambija avo. Kikiva avi, ongo ami kajae rate, embo pamone betapa amita jo ai kajarira. ⁴ Avo eto nangota humora pemibe avo meno Otofu eto Maha Otofu hena ai mihija. ⁵ Ningote, nango, embo eni senikati mane horem bati ora, Maha Otofu amita pure ue. Avo eto, Maha Otofu ami ei, amita pure ora. ⁶ Maha Otofu ami nango aja amita pura embo eto amita pure eha ara ue, kikiva ai kaje ra avo mane rate ahihi Otofu ami tara. ⁷ Maha Otofu ta lo hiere ta pure evi, koro hamo ai kajari, ami ambureri vuviaja. Aita vuvu re ri amo usasa pere eto Isirae embo meni ami Mose ta tiri pe avo ki ae kambae ora, ami ta be avo, Mose ta tiri avo usasa ami ariri aja. ⁸ Maha Otofu ta usasa amo deka eto pajirou, ahihi Otofu ami pure urou mo. ⁹ Avo eto lo ta pure amo embo koto ai hiuja eto au embo usasa humbati ora, avo ra, wasiri akari ami be do eto, usasa afurukau! ¹⁰ Be do eto, usasa evi lo amika vuviaja, avo ivo inono mane ahihi Otofu ta pure usasa vuvihaja ami ka amika vuvihaja. ¹¹ Donda betapata mihae atuja avo Otofu ka, hanana pemi be datofo mehe tuja. ¹² Iji emiko te nangota humora ari pemibe ami au nango ivo be eto ukati ora. ¹³ Nango Mose ite maane ra, bo ariri ari ami hiri pe afurukeuja, eto eto Isirae embo pamone ami tiri pe amita ai mane kom ara ue eto, Maha Otofu ta usasa isasa eto mihae uja avo. ¹⁴ Rate enena ta ohembari avo pei karaja. Eto iji eha emika mihija, heu kaera, meni Otofu nuha be heukati uja. ¹⁵ Rate iji eha emi kote, Mose ta lo avo enerekoro re, bo ufo tapa ami embo ta jo afuru ke uja. ¹⁶ Rate, embo avo Iesu ta overekati uja, avo bo ariri be avo heu kati uja. ¹⁷ Eha emika te, Iesu avo ahihi ra eto ahihi Otofu dei mihija ai re, osa osa, hanana ra. ¹⁸ Eha, nango betapa Maha Otofu avo keti ore, bo ariri tiri pe peikae mihija ai re emiko, Maha Otofu ta osasa ami nango afere keija, jo ai horeto, usasa eni angari heka tapa eto heka eni angari Maha Otofu ahihi te.