¹ Ata kea bahata kobekavai IESU vai Lomani Gamani kitae Bailati vileo tievelu. ² Keveo tievealea kosi kitae ke laviai avoe, lo malaha ko aveve kaoalogo ivalai vai aeo loevelu. Kou loi vatau ata agisi toela tigei, abolai loui avoe labea momai takesi moni Sisa vavuevivale Lomania Gamani ke isi loui avoe dau lai kosi kitae KELISO. V 3 Kateai louge Bailateu IESU laviai avoe au au Diuia Kosive ala kou, ige IESU loui avoe mana avola a ke loulu. ⁴ Kateai louge Bailatiu Dubu naliavale kosi isi ata ke lavigei avoe, da avoele aveve toela kaoige ue solilu, iale dale oleve kateai kavai. ⁵ Ige abo melitavai Bailati laviai avoe keu memila Galileia vatae tai haive toela ai loui ata dikaiavelu. Iale aike keu Diudea vatae kelate ai ata agisi toelatigelu. ⁶ Ige Bailatiu kotoeabe ke evisi loui avoe au keu Galileia atala keu. ⁷ Ige abo loui avoe ito, mana ige Bailatiu lavigei avoe Kosive vole Heloda keu Galileia vatau kosive keu aike loaleu Dielusalemae ulu iale kovai avoe teve. ⁸ Ige abo IESU vai Kini Heloda vileo loige Helodau IESU ivai avolu sisila kitaealu. Kosealelu vali moeaga IESU vadeu avale ke abole louge eu evigei. Isito atave eu iva solialelu louive eu olavale IESU niveta vale vole age au ivai. ⁹ Katgealelu au iESU aveve kaoai belavaga IESU nonabe loui lavie solilu. ¹⁰ Ige Dubu naliavale kosivea isi Diuia basu talavatu loui haivevale kea IESU vavale budiai loui avoe keu aveve toela moeaga avale atala keu. ¹¹ Ige Helodau au tuvaliavale ata ke agigei IESU evasiavai vai toelatievelogo kalevai nao kitaea kolovuvale ogona ke vole vai ela kolovui meialemei vai kuiakavai vai Bailate vileo tievelu. ¹² Aveve kele Helodau Bailateti kakoloalu memila vole homasiavale kea toba voleali kakoluvualu. ¹³ Abo IESU meialemei vai Bailatie tige Bailatiu toige Dubu naliavale kosia ou kosai isi ou ataea loevelu. ¹⁴ Ige au lavigei avoe laea malaha ko vai daeo loi loui kosealu ata kou loi ata moeaga agisi toela tigeva. Ige da avoele toela ke kaoige toela be iva solilu eu doadoalu, atau tolola la vai kotole vaeavai oaeveva. ¹⁵ Ige Helodau IESU toelabe iva solisi tota hanavage lolu, isi loui avoe ata kou aveve toelabe da iva solilu kavage voelealivelu. ¹⁶ Iale di memeloeale visukaeavai toba hanavage tai. ¹⁷ Hanavage tiveve keu kotou kosealu abole lagani igaliu vesuge abole dibula ata igali hanavage aule dogoai au oe tai. Basiova lovi isi sisilave avala vali kela. ¹⁸ Bailateu koto ke louge ata bahata kea loui avoe vai kavagau voeleai isito lo olale Balabasi ke hanavage oe tai. ¹⁹ Balabasi keu ata kavege vovivale atala memila o kele keu atau toela ke agigei aboili Gamani lehosivege abo umuvai vai tai dibulae vaeavaevege au keveo ulu. ²⁰ Ige Bailateu olai IESU hanavage au tai isi tota toai avoe dale IESU hanavage aule tai. ²¹ Ige ataea bahata genuhamai toiavai avoe vai idiu dole kavage voeleai, satauloeavave. ²² Ige eu tota lavigei avoe au vadeu ala age da aveve toela avoele kaoige uesolilu. Iale dale oleve kateai kavai isito di memeloeale visukaeavai toba hanavage au tai. ²³ Kateai louge ata moeagaea loui avoe vai idile kava, ige Dubu naliavale ata kea abota meliai kotove kavalu. ²⁴ Ige Bailateu lavigei avoe nenive dale lai ola ai. ²⁵ Isi malahaleu ata kavei Gamani talai louvale atale ke vai vavei to IESU vai abo avolu olale kelu vai vavelu. ²⁶ Ige abo Sataulo idi ke vai IESU vavuge vai tievealea kuvau tavale Sailini malaha vole ivivela Saimoni ke vilele daialu. Au vuie loisege isi louge keu IESU Sataulo idi vai kabaisi IESU lovai iavela tilu. ²⁷ Isege ata moeagaea lovai tivale ke uvule keate moeagaea lovai avolu uvuai aliokavai tisege. ²⁸ IESU aboe vovolovai lavigei avoe Dielusalema keatea momai dalu uvuai alio kavagelive, isito lamigalai uvuai lai esetalai uvuai alio kavave. ²⁹ Kosealelu valiu toelaule loi iale vali kela ataeale koseai loui, keate olea ese soliale kea duave, isi eseu gi amu vavue soliale kea duave. ³⁰ Vali kateivalela ataeale tala kitae isi tala eseieve kelu loui koseai bokoai loo kavage lo vovoi. ³¹ IESU loui avoe dau idi isate kelate, isege laea idiu giliai lavisi uale kelate ieale abole aveve toela kitae daele ale kelate abole aveve toela kitae laele ai. ³² Kateai louge tuvaliavale ataeau loi IESU vaevei dibula ata abuti keta lohomegei agisi ata kavevale vatavala daiavelu. ³³ Vatava ke ivi kineu lolo abo kela daiai IESU vai idile kavai dibula ata abuti vole vai adave vaiteo kokoai vole vai adave ageveo kokoaevelu. ³⁴ Ige IESU noinoiai avoe Mama, toelaeabe vesuiava nohovuia lulele solilu, abo vadeu avale kele isege tuvaliavale ata kea IESU ogona agisi kasiai igaligaliai agievelu. ³⁵ Ige ataeau ivasege Diuia kosive kea IESU evasiavai vole lavigei avoe keu ata vole hoeaseavei to au ba amiga mauliavalivelu bele. DILAVAu ke makage Keliso oliale bele au amiga mauliavai dobai loi. ³⁶ Kateai lousege tuvaliavale ata kea abota evasiavai eu toela vai vavulu. ³⁷ Isi loui avoe a Diuia ata kitae oliluaga amiga neniavai dobai lo. ³⁸ Kateai kineve tatale kisai vole ai loui avoe kou Diuia loia kitaela kou. ³⁹ Ige abo dibulae vai kavale ke voleu kotou toela vole loui laviai avoe loui IESU belai avoe leleveta a Keliso oliluaga amiga amauliavai lota mauliave. ⁴⁰ Kateai avolu louge voleu vaki voleo uale keu avolu loui avoe koto kateale avolu lou kaleva ale DILAVA vabuiava solilu. Lati loeale avoluvita vovoi. ⁴¹ Lati loea aveve toela avale ata lati lola koea. Iale aveve toela ke ibilave lati vateu tuvu ko valu, sito malaha kou aveve toela be asolilu isito vateu tuvu kitae vai kavalu. ⁴² Au kateai au kakololu louito IESU lavia avoe IESU, a kosi kitae olisi ai vatau doga ke vai loluaga da huhua. ⁴³ Ige IESU avolu loui avoe da a laviage eviso, lati loea aike ukolikoli vatavae uge vesulu. ⁴⁴ Isege valiu niu tuelo okoloki vasege vau loalu ige gusu kitaeu ualeu tili okoloki valiu tota kalulu. ⁴⁵ Valiu gusuasege vavi kitae ata bavusege Diuia Dubu kitae ke uvule abo ogona volela ou uvu tuvute ke bavualeu eula lavisi dabuhovoi tiale kaila velevage ogona abuti olilu. ⁴⁶ Isege IESU baita loui avoe di mama da aike voeleiva di munana va. Kateai louito voelealu. ⁴⁷ Ige tuvaliavale ata kosi keu aveve ke ivai DILAVA hoeaseavai loui avoe leleve ata keu atau dua. ⁴⁸ Isege ataea loi igali toai leleisi ui ke malihai ueveloho kalevai uvu kitaeta abo oe tilu. ⁴⁹ Oe tisege IESU kakoluvuia isi Galileia keate volea IESU lovai loale kea ogela leleisi ke malihai ueviva. ⁵⁰ Isege malaha vole ivie Dioseba keu Diuia kanisoloa meba vole keu ata dua evievi ata, kalau dua avale ata. ⁵¹ Keu au kanisolo kakoluvulai sisila solilu, ea IESU vai toelativaga keu Diuia kanisolo ata kitae. ⁵² Iale keu IESU vava vai abavulivelu tai Gamania kosi kitae Bailate ke laviai avoe dale IES vaitai abavui. ⁵³ Ige Bailateu louge eu tai IESU vai ogona taeteta buliai vai tai vuleu va amigalu lovoale kele abavulu. Abo memila atabe abavue soliale kele. ⁵⁴ Kateisege bulau lolivelu vau loai loiva. ⁵⁵ Isege Galileia keate kea Dioseba luvita tialea au IESU vava vai abavuale ke ivaevelu. ⁵⁶ Ivaevei kalevai abo oe tai senisi hagote ke agisi bevrai otovei bulale uevelu, bulau talavatulu louive.