¹ IESU kateivaga Diuia sisila vali vole Basiova keu vuguvugualu vali kele abo ba valava beikini bauda ta vauale ke abo ba ilivelu bele isito mamoe ula kavei isi DILAVA hoeaseavai. ² Isege Diuia Dubu naliavalea isi Diuia basu talavatu loui ata haivei oivalea kea olaesavalu, atae nita IESU kavaeei ilivelu loui kuva vole kaoaveva. ³ Isege seteneu Diudasi Kaliota keu uvue deluai tilu, IESU mohoho tuelo kea uvule. ⁴ Ige keu tialeu Dubu Bulisiti keta ata kitae keali nonai kuva kaoai olale IESU vai vavei. ⁵ Ige ea sisilai kotove vai lelevetilu isi olale moni beiai vavuevei. ⁶ Ige Diudasiu moni valivelu huhuai IESUlu kuva kaou duai lavigeito tai doadoai ataeali mikisiai ulu, ige ataea ke iva savalu isito eu moni bai agilu. ⁷ Iale Diuia sisila vali keu loige abo olai mamoe kavei Basiova lovi keai isi sisilai. ⁸ Iale vali kele IESU Bita ta Dioni ta hanavei avoe taevelivelu lai Basiova lovi iveve ke age lai isi. ⁹ Ige ea IESU belai avoe lole oleve keveo alouale ke ai. ¹⁰ Ige IESU lavigei avoe taevelivelu ivage o kele malaha voleu eu bagule e kai vai tige ke lovai teve, ilivelu au tai au ole lavige. ¹¹ Belai kosea, lo haivevale Tisa keu loui avoe oleveo ou uvu kele dale di mohohoeali Basiova lovi isi. ¹² Lale kateai belage aule la lohomegei eue o ke uvu vole bosi vai haivege kele lailoi lovi ave. ¹³ IESU kateai louge ea tievelu tai au ata louale ke ivai laviage IESU louale keneni avelu isi Basiova lovi avelu. ¹⁴ Lovi iveve valiu loi gutuige IESU au Abositolo tuelo keali loi ugulelemalu. ¹⁵ Ige IESU lavigei avoe dale vateu tuvu kitae vai, ialelu da olale laili ugulumai Basiova lovi ko isi. ¹⁶ Isito da laa lavigei, da ba tota laili lovi ko ilivelu bele. Ivaga DILAVAu vatava dogau uvue laba isi. ¹⁷ Koto ke louito kabusi ke vai hoeaseavalu isi vai au memelo vavei loui avoe ko igaligaliai vole vaveive. ¹⁸ Da la lavigei, daba tota laili uaini koseale ilivelu bele ilogo DILAVAu vatava dogave ke uvue ba laili isi. ¹⁹ Kateai louito valava vai hoeaseavai vakoai vavelu isi loui avoe di misila kou da lamelu, lale ko isi da huhuave. ²⁰ Ige abo lovi ige vesusege au kabusi vai vavei loui avoe ee kou di taola kou. Iale di taou lotige DILAVAule di tao kele vole dagave lalai ai. ²¹ Isito da koto vole louge evive, lai kole ui lovi iva, iale la voleu dalu haiai da vai atau toela vavelu. ²² Ige dale kele voeleai, kateale keu DILAVAu ola la keu isito malaha keu dalu haiale ke nohoma. ²³ IESU kateai louge abo kobekavai abo volete belagei avoe lai loele ole igalila ke alu. ²⁴ Abo kateaito bahata volelai louvaga voleu loui avoe dau lai ata kitae. Dala kou, ige voleu loui avoe aa bele dau lai kitae. ²⁵ Kateivaga IESU lavigei avoe vatau kosiveu abo vuvunele au atate ke nimabigei ui. Olaeabeu mohohoeabea iviabe letatavai loui koseai loi kosive kitaea. ²⁶ Isito laea ba aveve kateale alivelu bele da olale laea aveve koseale age duave. La olai kosive olivelu aluaga memila amiga letolevai vole dulugei vole hoeaseaveve. ²⁷ Vatau kosiveale ugulumai u ulai ui lousege mohohoeabeale lovi agisi loi vavegei. Kateale le lale ivage oleve keu kitae isege oleve keu eseve isito dau kate solilu, dau lai kitae da la hoeaseavei la dulugeva. ²⁸ Isito vali bahata aveve toelau dae loisege laea daluvita uva. ²⁹ Iale di mamau ataeale adave uvule uveve vuvune vai damuale kelate dale vuvune vai lamei. ³⁰ Ige lata vali kela daluvita igalitoai lovi isi, telonale ugulelemai vuvune kele Iselala gala tuelo ke malihei aveveabe kaogei ivai. ³¹ IESU koto ke louge vesusege au Saimoni Bita laviai loui avoe Saimoni da koto vole louge evi. Seteneu DILAVA laviai olale ai aveve ke neni kaoai, keate voleu laisi sesiale kelate aule ai aveve ke kaoai ivage au ole ala keu toela ata o atau dua. ³² Ige da alu guliguliage ai evievi keu ba bahata dobalivelu bele, ilivelu vali voleo aveve toela kele kuialai lolivelu tai ai kakoluvu agigei goada tige abota abo evievi kele meliai ui. ³³ Ige Bitau laviai avoe kosive abole avai dibulae tige dale ati tai dibulai. Abo a kavage abole data kavage da voeleai. ³⁴ Ige IESU laviai avoe Bita da louge evi. Ave vavi kole ale kokolugu koto solisege ale da vovoho abutita igalita aso isi loui kosea da ata ke dibae solilu. ³⁵ IESU tota au memlo ke nenilai loui avoe da vali voleo la hanaveale kele laea moni bosea samaka agie solilu kele la nenive bela la sotialu lalai ue solilu ige ea avoe nenive. ³⁶ Ige IESU tota loui avoe isito aike lai monita boseata agive isi isoho la oleu gaiaveu ue soliale keu au dabau ogona vai voiai moni ke vai vai ela gaia voia. ³⁷ Iale dale la lavigei bukau uvule louale ke voleale daele loi koto keu loui avoe ataeale huhuige keu atau toela vole iale abo memila loui kisaiai vaeavale keule daele loi. ³⁸ Ige abo IESU laviai avoe kosive gaia abutila kou, ige eu loui avoe nenivela keu. ³⁹ IESUle vali bahata oliveta talae tai keveo ivaigei iale au ke louito Dielusalema kalei Olivetae tilu ige memelovea lovai tievelu. ⁴⁰ Abo tai daia sege IESU lavigei avoe guligulialive, aveve toelau laele loige kele doadoai uve laba kele otolovalivelu bele lai evievile. ⁴¹ Kateai loui lavigeito kalevei auvu tai kome bokoai vata bisi guligulialu. ⁴² Isi loui avoe mama aa olaluaga vateu tuvu daele lolivelu ale ke bavu, ai ola ula ale olage dale vateu tuvu ke vai. ⁴³ Koto kateale louge Anelu voleu Otogoe dobai loaleu vai goadatilu. ⁴⁴ Ige IESU tota guliguli avavaga vaotoveu loale keu tao kitaeta lavulu vatale. Lailoi toela isulau ke vaive kelu amiga vai IESU vavuso tao ke ibilalu. ⁴⁵ IESU katealoho loi ivage memeloabea uvualoho navai uevelu. ⁴⁶ Ige lavigei avoe la vadeuluga navai ueviva kobekavai guliguliai ulivelu toelau loige meliai uve avoele otolovaeviva. ⁴⁷ IESU kateai lavisege ata moeagaea daiai lolu ige IESU voo vole Diudasi naba tuelo keu ata ke lohomege abolai unila lolu loi IESU vatalai vai uniuniavalu. ⁴⁸ Igeto IESU Diudasi laviai avoe Diudasi au da uniuniavale kele daa vai atau toela vavelu. ⁴⁹ Ige IESU Disaiboloea IESU laviai avoe au lo gaiata koievei. ⁵⁰ Isege Bitau gaiata dubule hauivale ata vole melove Malokasi ke golema vaiteve ke koisi letulilu. ⁵¹ Ige IESU lavigei avoe kalevave isi Malokasi golema vatalage doadoalu, maholilu kubie solilu. ⁵² Ige Dubu naliavale kosivea ou kosia isi Dubu anaka naliavale bukatea loi iESU luvita uge, IESU lavigei avoe au la huhuige dau vavolo avale ata olila age la benisita visu ta bamu agisi da kavalivelu lolu bela la vadeulu? ⁵³ Dau vali bahata lai Dubu kitae ke vaetai laili uva igeto la da vatala solilu isito vali kou lai valite nila kou. Laea vaviu ese lalaea iale la vavi kole loalea olai da vaevei keta duave. ⁵⁴ IESU koto ke louge vesusege abo IESU vatalai adave umuvai tievelu Dubu naliavale kosi kitae ke oe tievelu isege Bitau ialiialiavai sekiai malihai lovei loiva abo vadeage ivalive. ⁵⁵ Isege abo olage vene beisi olai usege Bitau sekiai loi aboili vene lolai uva veneu koe kele. ⁵⁶ Isege veneu nai atagage vaa voleu nive ke ivai loui avoe malaha kou IESUti oivale malaha kela kou. ⁵⁷ Kateai louge Bitau loui avoe ba dau ata ke diba solilu olela aa ke louva, Bitau vabuai amiga vai mahogovalu. ⁵⁸ Ke iae malaha voleu Bita laviai avoe aa kou IESU vo vole ala kou. Ige Bitau loui avoe da ata ke diba solilu. ⁵⁹ Abo u voleave asege malaha voleu Bita tovevalogo genuhamai loui avoe, leleve ula, ata kou Galileia ata volela kou. Nonave tava keu Galileia kotolegau keu nonalu, lo ke ivage keule IESUti oigei. ⁶⁰ Ige Bitau vovohoi loui avoe a louale keu da olie solilu kateisege kokolugu kotoalu. ⁶¹ Ige IESU vovolovai Bita malihage Bitau iESU louale ke huhualu. IESU laviai avoe kokolugule koto abutita igalita asege ale da vovohoi loui kosea da ata ke diba solilu. Kateai lousege kokolugu kotoige IESU vovolovai Bita malihage. ⁶² Bitau ke huhuai uvu kitaeai loi velevai tai lekela alio kitae avaga gobeveu gasai ulu. ⁶³ Ige IESU naliai uale kea evasiavai kavaeaveva. ⁶⁴ Ogona vai nive umuvai usege volea kavasege volea lavia avoe, au Belovetalu loui ata ke ivive lou olela keu a kavalu. ⁶⁵ Abo avolu kotou toela moeaga loui vai toelatisi evasiavaeaviva. ⁶⁶ Vau alavasege Diuia kosi kitae ke nenia vole laluvei loevelu ou kosi Dubu naliavale kosi kitae kea Diuia basu loui kisaiavai haivei oivale ataea kea vole bevualogo ata moeagaea IESU vai kotae velivelu tievelu. ⁶⁷ Isi belai avoe lo lavige o lolai lou. Au a huhuige DILAVAla a hanavage a Keliso olilu igeto eu lavigei avoe dale laa lavigeto la ba evilivelu bele. ⁶⁸ Isi lavigei avoe dale koto vole loui la belage la ba da lavialivelu bele. ⁶⁹ Isito ave kole koseai tiale atau eseule DILAVAu vuvunele adave vaite keveo aule ugulumai. ⁷⁰ Ige ke nenia IESU lavia avoe au au DILAVAu vo alau? Ige eu lavigei avoe avola la ke loulu, ke dala kou. ⁷¹ Ige ea vole lavigei avoe lai ba vadeula kaoai otigei, avola biage au aiteta louge lai bahata aivele evievelu.