¹ Sanidei vavita vau hodota keate le kea abo senisi hagote ke agisi loevelu IESU vutae. ² Tievealea daiai ivage IESU vutale abo vule vole bosila anakave bavuale keu vovolovai abatau ivile ulu. ³ Ige ea vule ke vae tai olai IESU voeleai nai uale ke ivai isito abo iva solilu IESU vava. ⁴ Isi kele leleisi huhuai usege malaha vole abutiu ogona taete levokai uale keta loi leleisi ivei aboe lolu. ⁵ Ige keate kea vabuiavei abo kome bokoai vata bisi tuholuai ulu. Ige malaha kea lavigei avoe kou alu vutau vatava iale la vadeuluga nita uale ke kaoai oiva. ⁶ Keu kole ue solilu DILAVAu isage kobelai tilu, lale au Galileiae ui lalai louale ke huhualu. ⁷ Au loui avoe ata voleule atau eselu haiage atau toelaeale vai idiu dole kavage aule voeleai isito vali ni abutita igalitau vesusege aule kobelai. ⁸ Kateai louge keate kea IESU koto ke huhuaevelu. ⁹ Isi vutave ke kalevai kuiakavai tialea aveve ke loui IESU Abositolo ileveni ke lavigelu isi ata bahata keta haivelu. ¹⁰ Keate ke iviabeala koea, Meli Magidalini, Dioana isi Dieimisi aia Meli, isi keate moeagaea. ¹¹ Ige IESU mohoho kea koto ke evisi loui avoe lale tilogola ko ai sele nona ko louva, isi kateai kotoeabe evie solilu. ¹² Isege Bitau ke evisi loi viliviliai agisi tilu, tialeu IESU vutala velevalu isi votohovoi guliu vae ivage ogonala IESU buliale ke ulau ulu. Ige kuialai au oe loi ke huhuai avoe, kou oleveo katealu. ¹³ Vali ke igalile IESU vo vole abuti, keu Cliopas u Vepas ti ovole ivi Emauesi kuva kela Dielusalema kalei o kelu tiale egeveu seveni maele late. ¹⁴ Ese ke abutiu kuva kela IESU kavale ke loui vole haivei otiva. ¹⁵ Isege IESU iaeabeo loi tialeu aboele tilu. ¹⁶ Ige abo ivaito lulele solilu olela keu. ¹⁷ Ige IESU lavigei avoe la avoti vadeu loui loiva ige ese kea abutiu lavisi uvualu. ¹⁸ Ige malaha vole Kiliobasi keu laviai avoe ata baita Dielusalemae uale ke nenia hau voleu Dielusalemae loale ke dibalu isito a igaliu ke diba solilu isito IESU labo ke laviaevia iva solisi uive. ¹⁹ Ige eu belagei avoe aveve vadeula keu. Ige ea loui avoe aveve kosealela abo alu Nasaletae malaha vole ivive IESU keu Beloveta ata iale keu DILAVAu siau vavuge au aveve moeaga agei koto siaute louge ataea ke evisi sisilai hoeaseavaeviva. ²⁰ Isito loi Dubu naliale kosi kea isi ou kosi kea ke vai gamani vavege abo loui avoe aule voeleai isi vai idiu dole kavage voelealu. ²¹ Lo memila huhuai kosealu keule ba kosi olisi Iselala ata ko letatavagei. Isito keu voeleale valiu ni abutita igalitau ue solilu. ²² Ige ave vavita loi keate volea kotovole louge lo evisi tetehamalu. Abo ave vavita va hodota tialea vutavela daiaevelu. ²³ Kela daiai IESU vava ivage ue solige kuiakavai loalea lo lavigei avoe lo Anelu abuti ivalu ige ea lo lavigei avoe, IESU kobelaulu. ²⁴ Isege loi ata volea vutaveo tiale kea loi loui avoe lo ivage ue solilu, ige loui avoe keate kea koto lelevela abo ke loulu. ²⁵ Abo koto kateale loui haivuge ue solige IESU lavigei avoe la kea aveve katealele lulele solilu, isi Belovetaea louale ke la solekata evisi koto ke huhue solilu. ²⁶ Belovetaea louale kelate Kelisoule vateu tuvu vai voeleai kobelai tai Otogoe au ataga kalei loale ke vai lale ke huhualu. ²⁷ Kateale loui lavigeito memila Mouseseu koto vole kisaiale isi Belovetaea loui kisaiale keta loui ke haivelu. ²⁸ IESU kateai haivei aboili ke loui tilogo abo oleke vavae loevelu isege IESU olai eve tai. ²⁹ Isito ese le kea ola savai keluai avoe vau loai loalelu loige lai oe tai ige IESU aboili oe tilu. Tai aboili ulu. ³⁰ Iale lovi ilivelu age IESU valava vai hoeaseavai to vakoai vavelu. ³¹ Kateai lovi ie vesuge niabeu alavakitaeage abo ba luleleai. IESU valitievelu isege IESU solekata ue solilu. ³² Ige abo vole lavigei avoe keu kuvau tavae nonale keu veneu vodale kelate. ³³ Abo kateai ke belalaito kobekavai tota Dielusalemae tievelu. Tai ivage Disaibolo leveni kea igali toai usege. ³⁴ Abo loui avoe leleve ula, IESU kobelage Saimoniu ivalu. ³⁵ Ige esele kea ba lavigei avoe lo ivalu isi kuvau tavae sitoli ke neni haivei. Au beledi vai hoeaseavai vakoai vaveale ke loui lavigelu. ³⁶ Abo ke loui belalai usege IESU dobai minaeabe kele lavisi loui avoe lale uge duave. ³⁷ Ige abo ke ivai vabuiavai avoe alu munanala kou. Loi ou uvule lavisi uge lo ivalu isi vabu toela aevelu. ³⁸ Kateasege eu lavige avoe la vadeuluga lai uvu teteai hadahadai ulu, la vadeuluga malomaloaevelu. ³⁹ Isito di adau di genati samaguale ko ivave dau IESU dala kou. Dau alu olie solilu alu kea misiu ue solisi itavau ue solilu. Isito dau kate solilu iale daela holisi ivave isi lulele ave. ⁴⁰ Katea lavigei to au geinata adata agisi haivelu. ⁴¹ Ige abo ke ivai sisila kitae avolu aevelu isi tota huhuai malomaloaevelu. Isege eu belagei avoe au lovi ialebau laele ulu. ⁴² Kateai louge abo kualume valavata buliai vauale. ⁴³ Ke vai vavuge eu ke vai niabeta ilu. ⁴⁴ Isi lavigei avoe da memila laili ui koto koseale loui la lavigelu da aveve bahata Mouseseu memila kisaiale Belovetaea kisaiale isi Samusile kisaiale keale bahata loi leleve olilu ave. ⁴⁵ Kateai louito uvuiabe alavage abo bukau koto kele luleleatilu. ⁴⁶ Ige eu ba haivei avoe Bukau kotou loui avoe Kelisoule vateu tuvu vai voeleai vali ni abutita igalitau vesusege aule kobelai. ⁴⁷ Aule kobelage ata veale ivivele ata haivei tige ataea elaloai kuiakavai DILAVA vileo loige DILAVAule toelaeabe ke uliai. Ige abole luta Dielusalema koveo ata haiveito ba vata bahata ata haivei tai. ⁴⁸ Bukau koto louale keu leleve olige la bahata aveve ke dibage vesulu. ⁴⁹ Isito koveo usege di Mamau louale ke au munanau tuvu lalai hanavage au la agisi melitigei. ⁵⁰ IESU koto ke louge vesusege au Disaiboloeali Dielusalema kale Betani oe tilu. Keve tialeu au ada letatavai au Disaibolo hoeaseavelu. ⁵¹ Hoeaseaveito kalevei Otogoe vaeatai tilu. ⁵² Vaeatisi tisege abo hoeaseavaito sisilata kuiakavai Dielusalemae loevelu. ⁵³ Iale abole vali bahata Diuia Dubu kitae ke vae tai DILAVA hoeaseavai guliguliagei.