¹ Vali voleo IESU Diuia dubu kitae keveo tai kotou dua ke loui ata haivesege Diuia baseu loui haivevale dubu naliavale kosi kitae kea isi ou kosi kitae kea vole laluvai IESU vileo loevelu. ² Loeveale kea IESU laviai avoe lo lavige olela vuvune ke amui, a laviage, a ele aveve ko ava. ³ Ige IESU abolai loui avoe dale data koto vole loui la belagei. ⁴ Oleu vuvunelegega Dioni ata Babatisogeva. Au DILAVAu vuvunelega bela ataea vuvunelega. ⁵ Kateai belage ea voleali ke loui avoe lailole loui koseige DILAVA vileoga ige aule koseai ige la vadeulu Dioni koto evie solilu. ⁶ Isi lailole loui koseige ataea vuvunelegau ke ava, ige ataeale ke evisi vuleta lailo kavei. Kosealelu ataea huhuige DILAVAla au vuvune ke vai Dioni vuvuge belovetave olilu. ⁷ Kotoeaeu ue solige abo IESU laviai avoe lo Dioniu ole vileo vuvune vale ke diba solilu. ⁸ Ige IESU lavigei avoe dale data la haivelivelu bele da ole vileo vuvune vai ele hauivale ke. ⁹ IESU kateai loui dibage kea kotove ke homasiavalu ige IESU ke ivai donau nonale loui ata haivei avoe malaha voleu uaini kai ata vole lavigei avoe laea loi dii uaini vu ko naliave isi tialeu lahani moeaga vatava voleo ulu. ¹⁰ Keveo usege uainiu baialu ige au hau vo vole hanavai avoe talivelu uaini nalavale ke ivai uaini bai vole kai agisi lo, ige vo keu loige uaini nikovai uale kea ke kavai lovage ada ulata lolu au biage vileo. ¹¹ Ige tota au hau vo vole hanavage loige uaini vule hauivale kea tota kelu loui kavai lovage ada ulata kuialai tilu au biage vileo. ¹² Ige eu tota au hau vo vole hanavage loi volea uge vu nalia ata kea avoluvita vole kavevaga eu kuialai ada ulale oe tilu. ¹³ Ige vu ke biageu huhuai avoe dale di lutiu bai huhui vale vo igali ko hanavage abole ivai ba kavalivelu bele, isi au vo vai hanavage lolu. ¹⁴ Ige vu naliavale kea ivai vole lavigei avoe vu ko biage vovela kou lolu, loige lai lemudisi kavage voeleisege vuve kou lailoele olisi. ¹⁵ Kateai louito vo leke lemudisi butuhai tai vu iae kavage voelealu. IESU koto ke louge vesuge lavigei avoe la huhuige vu biage keule ata ke vadeuiavei. ¹⁶ Kelu da la lavigelu aule loale keule ata ke kaveatisi vu ke vai ata vole vavege abole naliai. Ige Diu ata kea ke evisi loui avoe DILAVAu ba loele kateale alivelu bele. ¹⁷ Ige IESU malihei lavigei avoe, isito bukau louale keu baiveu oleve katealu. O kouvale kea vule voleta o kouveve ke homasiavale kela ave DILAVAu o hadetivale konave vule olisi dubu vai hadetisi lavisi ulu. ¹⁸ Lale olea vule ke vuvualuaga aule au itava bokoai voeleai isito vuleu avole dobale keulave ulaule ui. IESU loi vauge douve ulaele ui. ¹⁹ IESU koto kateale louge Diuia basu loui haivevale isi dubu naliavale kea ke evisi avoe lolaigau koto ko loulu isi ele olai IESU kavaevei. Isito ata vabuiavelu ataea vuleta kaveva, IESU vavalaive isi kalevaevelu. ²⁰ Isito vali moeagaeale IESU nimabisi oigei isi abo mohoho bevugei lavigei koseai laele aboili doadoai oigei ilivelu nonave tava keleleige louge lai vai kosi kitae gamaniti vavegabo vai kotale vaeavai. ²¹ Kateai louge memeloeabea tialea IESU laviai avoe Tisa lo dibage a koto loui ata haivevale keu leleve ula. Ialelu loui a ataea koto evie solisi DILAVAu koto ula loui ata haiveva. ²² Iale koto vole loui lo haive au lo takesi moni Lomenia gamani kitae sisa vavuale keu au duave bela toelalu. ²³ Ige IESU seleabe ke dibai lavigei. ²⁴ Avoe au moni baive beu laele ulu abo vole vai vavuge loui avoe oleu munanala iviveti moniu luvu kole ulu. Abo avoe Sisa, Lomenia Gamani kitae. ²⁵ Ige au lavigei avoe ito, ialelu loui gamaniele vavuve. Isi DILAVAele DILAVA vavuve. ²⁶ Kateai louge kotoveu lilikata tige abo ke evisi tetehamai sekiai uevelu. Ataea nita vatalai vai talivelu age abo IESU vatalage ataele IESU vavalai vuleta kavelivelu vabua kalevaevelu. ²⁷ Isege ata volea avoe loevelu Sadiusesea kea loui avoe voviale kea ba kobekavalivelu bele. ²⁸ Iale ata kea IESU lavia avoe lo haivevale ata Tisa Mousese basu uvue kisaiai avoe, isoho malaha voleu keate vole meialemeito eseveu uesolisege malaha keu voelealu. Ige koveule au kakau gobu ke meialemei au kakalu eseve koui. ²⁹ Ialelu lo kotou ioni louge eviso, malaha igali ese seveni mohoho ula. Iale ese unila uale keu keate meialemeito esebe vaeava solisi voelealu. ³⁰ Ige valavele uale keu au kakau gobu ke meialemelu, isito avota esebe vaeava solisi voelealu. ³¹ Ige ese naba tili keta gobu ke ivulu valu, iloho avota voelealu esebe koue solisito. ³² Iale kea bahata vovoatilu, ige keate keta voelealu. ³³ Lo koto kateale a haivuale kele a huhuige ata seveni keale vaoe kobekavage keate keule oleu ivu olisi. ³⁴ Ige IESU abolai loui avoe aike vata kole malahaea keateali vole lohomeva. ³⁵ Isito olea evievita vovoale ke DILAVAule isagegabo kobekavai Otogoe tiale kea ba vole lohomegelivelu bele. ³⁶ Isito abole Anelu late ai vovolivelu bele, kosealelu kea vovoi kobekavale kele DILAVAu ese olisi ui. ³⁷ Mouseseu louale kele lai dibage vovivale keale kobekavai. Lale Bukau koto huhualu, kele DILAVAu veneu idile nale keveo Mousese louge au kosive laviai avoe, Eibolahamu DILAVA Aisikiu DILAVA Dieikobou DILAVA alau. ³⁸ Mousese kateai louale kele lai luleleige keu ave nita uale kea DILAVA isi memila vovoale kea munanaea DILAVA iale kele ave lailoea uale koto vaoe lailoi vavivuia uale kea DILAVAtaga keu. ³⁹ IESU kateai louge vesusege Diuia basu loui haivei oivale ke volea loi loui avoe, lo haivevale ata Tisa, a louale keu duave. ⁴⁰ Abo tota IESU belalivelu ale ke kalevalu vabuavaive. ⁴¹ Ige IESU Diuia lo loui kisaiai oivale ke belagei avoe abo oleve kateai loulu, isi loui avoe KELISO keu Deividi vola keu. ⁴² Ige Deividi biageu buka Samusi uvule kisaiai avoe kosiveu di kosive laviai avoe loi di ada vaiteo uguluma. ⁴³ Isege da alu tuvuiavale ke lohomegei loi ai genau valale otovei. ⁴⁴ Ige Deividiu avota avolu loui avoe kosive iale aule oleve kateai vave keule. ⁴⁵ Ige ata moeaga kea minale IESU au Disaibolo lavigei avoe. ⁴⁶ Iva dua ave lamigalai Diuia lo kisaiavale keale olavale oalivelu kote egete keta abobiga umuve olavale ataea sisilaeabe agei maketila oisege, isi sea o vomu dua kela ugulelemagei dubu uvula isi loviu dua kitae ivale kela ugulele magei. ⁴⁷ Keale gobuvuia o lehosivai seleavei hauiabe vavoloigei. Ataea minale guliguliai egeta butuhagei, abo kateale avale kelu DILAVAule ibila toela vavei IESU loivale kela.