¹ IESU tialeu o kitae Dieliko. ² Kela velevai tisege o kele takesi agivale ata vole ivive la Sakaiosi keu keve ulu. Malaha keu hau moeagate. ³ Iale keu olai IESU ivai isito ata moeagaea lelesi nive bavulu, eu ata vegueve. ⁴ Iale keu tai unila idi luau kela vaeatilu eu huhuige IESUle kuva kela loi. ⁵ Ige IESU kuva kela loi ivage Sakaiosiu luau doe uge laviai avoe lelikai lo, dale ai oe ati lovi isi. ⁶ Kateige sisilata Sakaiosiu dobai loi, IESU meialemei vai au oe tilu. ⁷ Ige ataea ke ivage aboele toelage loui avoe vadeuluga atau toela keti IESU lovi ilu. ⁸ Ige ea lovi isege Sakaiosiu kobelai lavisi IESU laviai avoe, Kosive eviso dale di hau ko aliai hauiabeu ue soliale ke vavei isi da ole seleavei moniabe vavolota agivale ke dale abutibutiai vavei. ⁹ Ige IESU avolu loui avoe a louale kele DILAVAu a valivelu ale keu valiu nila kou velecalu iale au ave Eibolahamu esea lainiabe kevole olilu. ¹⁰ Iale atau eseu aveve toelale tai tebuavale kelau ke kaogei agilivelugau lolu. ¹¹ Ataeau IESU koto evisege au tota donau nona vole loui haivelu kosealelu ataeau huhuai avoe IESUle aike Dielusalema velevage lai lole DILAVAu adau vuvunele ui. ¹² Kateisege IESU kotou ioni vole loui lavigelu olale ataeau DILAVAu adau vuvunele uveve kele luleleai. Isi loui avoe kosi voleu olai tai vatava voleo vata ke kosive vileo vuvune vaito kuialai loi au vata naliai. ¹³ Iale keu au hau memelo teni lavigei avoe love ea loige moni uani taoseni kina igaligaliai vavei lavigei avoe ko agisi hauai tatavele moni vole ave kateai lavigeio kalevei tilu. ¹⁴ Isi tisege vatava ataeau avolu ola savai abo atate vole hanavege ea tialea malaha ke laviai avoe lo ola savalu malaha keu loi lo nalievei a haivuge kosi kitae olisive. ¹⁵ Kateisege malaha le keu vuvune vai to kuialai au siti ke nalialu. Isi au memelo teni ke toiavege ea loevelu ige eu belage avoe da moni lameale kela la hauai moni vaidati aglu. ¹⁶ lge ata unila moni vale keu loi loui avoe kosive aa moni damjuale kela da hauai moni teni taoseni kina da agilu. ¹⁷ Ige kosiveu avolu loui avoe au atau dua igali aa hau eseve kole hau dua alelu loui dale siau amuge ale oo kitae ada vole isi ada vole kenalige. ¹⁸ Kateisege iavele voleu velevai loi laviai avoe dii kosive aa moni damuale kela daa hauai ai vai taoseni kina ko valu, ai moni. ¹⁹ Ige kosiveu laviai avoe a haudua ale kelu oo kitae ada igali vai nalige. ²⁰ Kateisege iavele atave voleu velevai loui avoe Kosive ai monila kou. Aa vai damuge da ogonata buliai vai mahogovage uale kela daa vai amulivelu lolu. ²¹ Kosealelu au malaha melite au ai hau olie soliale ke ale agigei isi aa lovi kaa soliale ke ale lovogei katealeluga da aa vabuiavai. Ai moni vai tai mahogo valu. ²² Ige kosiveu laviai avoe a keu eseu toela a koto louale ai koto keule avai toelatisi. A loui kosealu keu ata melite keule au hau olie soliale ke aule agigei isi au lovi kasoliale ke aule agigei. ²³ A huhui katealeluga di moi vai banikae vaeavage abota tatavele moni voleta vaeava savalu. ²⁴ Au kateai louito au vavale lavisi uale ke lavigei avoe adavele moni ke agisi teni taoseni ale ke vavuve. ²⁵ Ige abo ke evisi avolu loui avoe be kosive, ata keu moni kitae agiale keu nenivela keu. ²⁶ Ige eu loui avoe da la lavigei evive oleu moeaga agiale keule moeaga agisi, isito oleu agie soliale keu ba valebe valivelu bele. ²⁷ Kateai loito tota loui avoe ata lea da vai toelativale, dalu loui tuvui vale da kosive olilivelu asege. Ke lohomegei agisi loi di vudile otovei kavegabo vovoi. ²⁸ IESU kotou ionive ke louito kalei unila Dielusalemae tilu. ²⁹ tialeu tala vole Oliveta kele tige oo vole abutitau ulu Betebage isi Disaibolo abuti hanavei. ³⁰ Lavigei avoe taevelivelu ologo kele daiai ivaga abo ovo doniki dogave atau ele ugulumai o soliale ke biageveu vai idile kunabeale ke vaveai vai love. ³¹ Ige biageale la belagei koseige la vadeulu doniki vai otiva. Ige lavigei koseave IESU kolu olalu ila age lo vai otiva. ³² Ige IESU hanaveale kea tiale au louale keneniu nenive ula avelu. ³³ Ea loi doniki vaveisege biageveu lavigei avoe lavadeuluga doniki vaveiva. ³⁴ Ige ea loui avoe IESU avolu olalu. ³⁵ Ige ea doniki vai IESU vileo loevelu isi abo ogona dua ke agisi doniki inule dedisege IESU ele ugulumalu. ³⁶ Isege ea ogona ke tedisi tisege IESU ke tatala doniki ta dai lolu. ³⁷ Tialea Oliveta tala la daiai tavaioai taito keva tiveve kele leleisi Dielusalema malihai oo Niseleai usege Disaibolove kenenia sisila kitae ai DILAVA hoeaseavai loui avoe ata kou au vuvunele hau moeaga ivai teteivale o vikoivale ke age lo ivalu. ³⁸ Isi loui avoe Otogou kini o loia kitaela kou au mama DILAVAu ivile lolu loevige lai hoeaseavei Otogoe uveve dua kitae ige ataga kitae. ³⁹ Igeto Balisese volea ata keali loalea laviai avoe, Tisa ai Disaibolo lavige ige abo kaleva. ⁴⁰ Ige IESU lavigei avoe abole kalei sekiai uge vule ko neniale genuhamai kotoisege atagaeabe ke neniale adavoto votoai DILAVA hoeaseavai. ⁴¹ Ige IESU loi vuguta siti ivai avolu alioalu. ⁴² Isi loui avoe Dielusalema ataea lai uveve dualu kotou loivaleke la evisi vage duave. Isito la homasialu. ⁴³ Iale vali volele atau toelaea loi lai o ko vovovai vai voleta dai laa ko neni kaveatisi lai oo ko neni kosai lelevai. ⁴⁴ Isi laa ko neni kaveatisi lai ou vule ko neni kavai kosagei vule voleu ba voleu kobole ulivelu bele. Kosealelu DILAVAu olai laa agigei isito laea ke huhuai lulele solilu. ⁴⁵ Kateaito IESU loi Diuia Dubu kitae kevae tilu. Tai ivage ataea ui Dubu uvule maketiave ige IESU tai ke kavei lovegei hauiabe ke kosai katulu. ⁴⁶ Isi abolai loui avoe DILAVAu bukau uvule loui avoe da olale ataea dii okole guliguliai da hoeaseavai isege laea kate savai avoele vavolo aveve avoele ava. ⁴⁷ Isi tialeu dubu vue ata haiveva. Au ke haivesege dubu naliavale kea Diuia basu talavatu loui haivevale isi ou loia kitae kea olale kavage au voeleai. ⁴⁸ Isito abo kavalivelu age toloalu abo ba oleveo kateai vai kavai ata moeagaea kotove evisi uge ataea olasavalu, kotoiebeu doba kavalivelu ea olateu kotove keneniu uvuiabeo dobai ui. Ukolikoli maulilu. Amen.