¹ Vali voleo IESU donau nona vole loui au Abositolo lavigei ige abo guligulilu homase kalevai. ² Koto keu kosealu oo volele ataea kota avivale malaha voleu ulu, diadi keu ba DILAVA vabuiavai ata vabuiavalivelubele siauivale ata tuvute, ata hoeaseavalivelu bele. ³ Iale oke igalile malaha voleu voeleige ivuveu gobu olisi ulu. Gobu keule vali bahata lolivelu kota naliavale ke oe loi olea avolu loui vai toela tivale kele au duluai. ⁴ Isito vali moeaga kotau kosi kitae keu gob u ke koto evie soliva isi ata duluge soliva. ⁵ Isito keate keu melitavai avoe timoeagage dale duluai isuve ke vesuiavage au ba daeo lolivelu bele. ⁶ IESU kateai louito tota lavigei avoe lale kosive toelau louale ke evilu keu kosiu toela isito gobuke bavuiavai dulualu. Aule kalegaule gobu keu avoe loi moeagagei kelu duluage au loi moeagavale ke kalevai ui. ⁷ Iale la huhuige DILAVAule au atate kea valile, vavile, alio kavai laviage au aule valivelu ke daiulogo ba olaeabe ke vavei. ⁸ Be da la lavigei DILAVA keu ata outelu loui aa vadeulu laviale ke aule solekata vai amui au ba kedalivelu bele. Ige atau uu dua ai. Isito atau eseu loluaga au aule valivelu evievi ata moeaga ivei? bela atgau ue solilu. ⁹ IESU tota donau nona vole loui ata haivelu ataea abobiga agisi katui avoe da avalela isi vole homasiavei volelai ola solivale kelai nona ko alu. ¹⁰ Isi loui avoe ata abutitaea dubue guliguli tievelu. voleu Balisese isege voleu takesi moni agivale ata. ¹¹ Ige Balisese ata keu tai lavisi guliguliai loui avoe DILAVA, daa alu sisila kitaealu. Ata volea vavoloai moni agisi keateali navai aveve toela moeaga aeviva. Isito dau kateale asoliva dau takesi agivale kelate ai moni vavolo soliva. ¹² Dale bula igali uvule aa hoeaseavai vali abutita uvule lovi ie soliva anivagaive isi dale taiti amugei. ¹³ Isege takesi agivale keu ata ke iae lavisi sekiai tuholuai avoe DILAVA, dau atau toela, dalu uvuai da dulua. ¹⁴ IESU kotou ionive ke loui lavigei to tota loui avoe da la lavigei, evive DILAVAu takesi agivale ke hoeaseavage uvu duale oe tilu. Isito Balisese ata kele kalave toelau ulu. Kosealelu olei amiga letatavai hanivavage DILAVAule ke letolevai isege oleu amiga letolevai sekiai uge DILAVAule ke letatavai. ¹⁵ Vali kela keate volea abo ese agisi IESU vileo loevei olale IESU vatagei hoeaseavei isito Disaiboloea ola solisi loui avoe ke kalevai teve. ¹⁶ Kateosege IESU ivei loui avoe la bea eseu se ke kelugelive. Kalege abo daeo loevei la olea eseuese kea uvu late ale keale Otogou uvue tai DILAVAu adau vuvunevele ue vei. ¹⁷ Nona lelevela da ko loui laa lavigelu. Olea huhuiabe keu eseu ese koea huhuiabe alte asolige kea ba Otogoe talivelu bele. ¹⁸ Ige Diuia kosi voleu IESU lavia avoe Tisa au atau dua, dale vadeu dua ai avole ukolikoli mauli vai. ¹⁹ Ige IESU lavia avoe a vadeuluga dalu loui kosealu, atau dua atabe duau ue solilu isito DILAVA igaliu atau duave. ²⁰ Ige IESU lavia avoe a DILAVAu au basu ai vaevale ke ale dodavelu, basu keu loui avoe momai ai kakolou keateti o malahati navai tebalive ata kavage voelealive, vavoloalive, seleai oigelive isi ai mamata ai aiata hoeaseave. ²¹ Ige malaha keu IESU laviai avoe da eseu eseta basu ke lovai loivalela ake loulu. ²² Ige IESU kotove ke evisi lavia avoe a louale ke bahata a alu. Isito a aveve igali ko asolilu talivelu ai hau keneni agisi tai voiai moni agisi aliai ata hauiabea ue soliale ke vaveito ba loi da lova ilivelu otogoe ibilave dua agiso. ²³ IESU koto kateai louge malaha keu ke evisi uvu kitaeai kalei tilu. Kosealelu, keu hau moeagate, atalu louive. ²⁴ Kateige IESU ke ivai loui avoe, hau moeagate kea Otogoe tiveve keu isu kitaealu. ²⁵ Ovo vole ivive kamela keu nidulu vale velevai tiveve keu gigialu, iale kelate hau moeagate ata keu Otogoe tiveve keu avoele isualu. ²⁶ Ige ataea ke evisi lavia avoe hau moeagate kea Otogoe tie solige oleveo ata katealeale tai Otogoe. ²⁷ Ige IESU lavigei avoe aveve katealu ataele toloalu, isito DILAVA vileo keu toloe solilu. ²⁸ Ige Bitau avolu loui avoe da louge evi loea loi vale vile kalevai aa lovalu. Isi aluvita DILAVA au ava. ²⁹ Kateai louge IESU bahata au mohoho bahata lavigei avoe koto kou lelevela kou. Oleu olai DILAVAu adau vuvunele ulivelu aluaga, aule au o kalei au ivu kalei, au kovuvu kalevei au mamata aiata kalevei au ese kaleveluaga. ³⁰ Aule vata koveo hau moeaga agisi ige vaoe DILAVAule ukolikoli mauli egete ke vavuge aule agisi. ³¹ IESU kateai to au mohoho tuelo ke lohomei aboili abo uveveteai lavigei loui avoe, evievi lai Dielusalemae tivale koveo belovetaea memila kisaiale koto keule bahata atau esele loi. ³² Ataeale ke vai Diu ata olie soliale ke vavei ige abole koeleavai, tioeavai, visukaeavai. ³³ Keu vesusege abole vai idile kavagau voeleai ige vali nii abutita igalitau vesusege aule kobelai. ³⁴ Kateai louge Abositoloea koto ke evisi malomaloalu abo kotove ke evisito huhue savalu. ³⁵ Abo tialea Dieliko ou vavae tisege malaha vole nikelote keu loi kuvale ugulumai ui monilu ata imiliaveva. ³⁶ Iale keu usege ata moeagaea loi leiviai tiva. Ige eu ke evisi loui avoe la vadeui. ³⁷ Ige ea laviai avoe ata vole Nasaleta biage la keu lai loela loiva. ³⁸ Ige nikelote keu toai avoe IESU Deividi voo dalu uvuai da hoeasava. ³⁹ Kateai louge vavavele uale kea keluai avoe kalei sekiai u. Ige malaha keu kotoeabe ke evie solisi genuhamai toai avoe, IESU Deividi vo dalu uvuai da hoeaseava. ⁴⁰ Kateisege IESU velevai loi lavigei avoe nikelote ke vai daeo love ige abo nikelote vai avoe loige IESU laviai avoe aa olale dale vadeu alu ai. ⁴¹ Ige eu loui avoe a olale dale vadeu alu ai. Ige eu loui avoe Kosive da olai niai. ⁴² Ige IESU laviai avoe niaso ai evieviu a hoeaseavalu. ⁴³ Isege soleka ulale, eu nialu isi DILAVA hoeaseavai IESU lovai tilu. Ige ata kenenia ke ivai sisilai DILAVA hoeaseavaevelu.