¹ IESU kotou ioni kateale louge ue solisege au Disaibolo lavige avoe vali bahata aveve toelaule atali loigei. Isito oleu louge ataeau aveve toela age ata ke nohoma. ² Ata vadeu di evievi ese voleavelu loui vai oelati au toela keage ata ke nohoma ataeau vule isute vai gobeveta umuvai vai davalale kavatuge keu duave. ³ Iale laa biagea lamiga ive dua ave lai kakolo voleu toela vole ai toelale tige. Tai sovaeavai kuikavai love isito toelave ke huhualive. ⁴ Isoho au vali igalikele la agisi toelatiale seveniato tota kuialai au aveve toela ke louge momai toelave ke huhuaevevale. ⁵ Ige Abositolo vea loui avoe IESU loi evievi letatavage kitaea. ⁶ Ige IESU lavigei avoe idi vole masitedi keu ieveu eseieve baua isito keu laviluaga idi ko leivigei. Lai evieviu idi kelate olige lale idi ko laviage aule galata soai tai eu nile lavisi lai koto evisive. ⁷ IESU loui avoe da koto vole louge evive lai voo voleu vule hauale oo ovo mamoe nikoveloho kuialai oe loisege lalevalivelu avolu loui koseai solekai tai lovi iso. ⁸ Ba laba katealivelu bele isito laeale louge eule lai lovi vaui kavai lamei lai vavale usege la lovi ivaga vesuge toba vaola lovi isi. ⁹ Lai voo keu vali bahata ke ava iale laba ke hoeaseavalivelu bele. Keu hauvela keu. ¹⁰ IESU avoe kelate laea dii hau ese lala kea da vadeu louge laeale ke ave ige vesuge loui koseai loea hauve avale ata lola koea. ¹¹ IESU kateai louito kalei Dielusalema kuvala tilu isi tiale Galileia ta Samaliata vatau tamagale tilu. ¹² Au taito ovoleave tige ata teni kea hatiti vole lebelasi vale kea ogela leleisi toai avoe. ¹³ IESU, lolai uvuai loo hoeaseave. ¹⁴ Ige IESU ivei loui avoe talivelu lai vava agisi dubu bulisiti haive. Ige ea tievelu isege kuvau tavae vavaeabe keu doadoalu lebelau vesulu. ¹⁵ Ige ata igaliu au vava ivai kuialai sisilata loi DILAVA hoeaseavalu. ¹⁶ Isi loalelu au kome bokoai vata bisi IESU hoeaseavalu. Ata keu Samalia atala. ¹⁷ Ige IESU au Abositolo lavigei avoe au daa ata teni laa hoeaseavelu, iale volea oleveo. Isege igali kou kuialai lolu. ¹⁸ IESU lavigei avoe vadeuluga vata vole atate kou kuialai loi DILAVA hoeaseavalu, isege Diu ata naini kea kuiakavai loie solilu. ¹⁹ IESU kateai louito malaha ke lavia avoe da ai evievile aa hoeaseavalu kobelai te ai oe. ²⁰ Vali voleo Balisese ata volea IESU laviai avoe oleveo vali kenila DILAVAu vatava dogave keule loi, ige IESU lavigei avoe vali keu loiveve ataeau ba huhualivelu bele. ²¹ Atabeu ba loui kosealive bele. Iva avola kokeu lolu, o avola lekoveo lolu. Lalabo ke seleaveva isito lamemila koto ke evige lai uvue ulu. ²² IESU kateai louito Abositolo lavigei avoe vali vole toelaule ba loige la olai atau ese ivai, isito laba ivalivelu bele. ²³ Vali kela ataeale lalai loui koseai ivave avola okola ke o isoho avola kou. Abo kateai loui la lavigege tivale, selela abo ke aeviva momai evisi kaoai talive. ²⁴ Atau eseu loiveve keu kosealu vaelau leage atagaveule vata kole atagai ui, kelate IESU loiveve keu ataga kitaetagau loiva. ²⁵ Isito luta au vata koveo loige ata moeagaea homasiavai vai toela tisi aule vateu tuvu kitae vai voeleai. ²⁶ Ataea memila NOAU valite nila avale kelate ave IESU loiveve kole abole kelate ai. ²⁷ NOAu boutiu uvue tisege ee kitaeu loi ata bahata kaveatilu. ²⁸ LOTA valitele abo avale keta katealu abo ee isi lovi isi volela hau voigei vuai o koueviva. ²⁹ Isege vali vole LOTAu Sodoma o ke kalei tisege veneu Otogole dobai loi oo bahata ke vaulu. Ige nai vesulu ata moeagata. ³⁰ Iale atau esu lolively asege ataeale ui kateigei. ³¹ Vali keu loige ata voleu ou benoe uale keu ba dobai ou uvue tai au hau agilivelu bele. Isege ole vula uale keu loi au oe hau agilivelu bele. ³² Ialelu lota ivu ke huhuave. ³³ Oleu amiga ula huhualuaga aule lelevai ukolikoli mauli isege oleu au mauli oo amiga huhue soliale keule au mauli vai. Keu kosealu IESU nona vai evea uvale holoea uvale vatava keveo huai tiale keala kea. Abole uveve dua agisi. ³⁴ Iale dala lavigei evive valike nila ata abutiale ama tedisi navai uvaga IESU vole vasege voleule ui. ³⁵ Isege keate abutiale lovi amuvai uvaga IESU loi vole vai vole kalevai. Ige oleveala IESU kalevelu, ke loui lamiga sesiave belalaive oloivaga be uva lailoi uvule. ³⁶ Isege malaha abutiale vue hauivaga IESU loi vole vai vole kalevai kelu lai bahata nenialivelu bahata Otogoe taevei. ³⁷ IESU kateai louge Abositolovea belai avoe kosive aule agisi oleveo tai ige iESU lavigei avoe mesia voleu voeleai kisia uge ugu Duna keale ke ilivelu vole laluvei loale kelate toela moeaga moeagaeale daiai loige di loiveve keu vuguvugualu.