¹ Valivoleo takesi agisi oi vale isi aveve toela avale moeagaea IESU vileo loevelu nonave evievelivelu. ² Ige Balisese ata isi Diuia basu loui tolea vale o kisaiavale loui haivevale kea ke ivai loui avoe IESU keu aveve toela lake ai atau toela keali lovi ilu. ³ Kateai louge IESU abolai koto koseai loulu. ⁴ Avoe isoho laa voleu mamoe bahata uani hadeleti agiale ke uvue igaliu itaitai tebuige aule vadeuai aule mamoe moeaga ke kalevei igaliave ke kaoai tilogo ke ivai. ⁵ Aule ke ivai sisilai ai lemugai vai au betakale vaeavai tai. ⁶ Isi aule ke kabaisi vai kuialai au oe loi au kakoluvu lavigei avoe. Di ovo kou itai tige da kaoai vai lolu iale loevige lai sisilaeavai o avolu sisilai. ⁷ IESU koto kateale louito lavigei avoe, iale kelate atau dua nainiti naini kea bebai tie solisito aveve dua age. Otogoe ANELUIA sisilaeabe avaea udua age isito ata igaliu toelale tiloho tota kuialai DILAVA vileo loige otogou Aneluale sisila kitae ai. ⁸ Kelate keate voleu moniu bai vate ke teni kina ke agilu ivaga igaliaveu dobalu. Ige eu ke kaoai lameba ke vaui atagavele ou uvula niai kaoai oalogo ke ivai valu. Ai ese suneta amiga buliai ou uvule nai usege au ai ese voleali misini ali oivaga aa neu isage ati tai DILAVA hoeaseavalu dubue. ⁹ Ige au ibilalu guliguliu vesusege ai kakoluvu lavigei kosealu dii ese lekela kou loige ivai avolu sisila kitae ai Otogoe ANELUIAle abota avolu sisila kitae ai. ¹⁰ Daa louale kelate ata voleu au avale toela ke kalevai loi lailoi mama DILAVA hoeaseavai ui guliguliavage Otogou ANELUiale ke ivai avolu sisila kitae aevei. Kelu ata avale ke kalevai lo ANELUIAla kea aa malihai ueviva ai inohole uive. ¹¹ IESU koto kateale louge vesusege tota au nona vole loui Balisese ata ke lavigelu. ¹² Isi loui avoe malaha voleu vove abutiu ulu vove vaola uale keu au mama laviai avoe, ai hau vole aliai damu ige mamave ke evisi au hau aliai vole kakavelu otovei vole avolu otovelu isi ee vile vavulu. ¹³ Ige koo veu uloho au hau ke vole agisi ataeale voia moni agisi au mamau oo kalei oge voleo tilu. Tiale keveo aveve toela moeaga ai kele au moni moeaga katuatilu. ¹⁴ Isi keveo ui au moni ke neni katui usege vata keveo vagala kitae lolu. Ige hauveu vesusege avolu beu ue solilu. ¹⁵ Ige eu tialeu malaha vole laviai avoele hauai ovove lovi vaveva. ¹⁶ Ataea lovi vavue solilu ige eu kele vagalai ovoea loviu vate ke iva. ¹⁷ Katealogo ba huhuai avoe di mama vileo hau ivale ese keale abou olau lovi ke ivaga gogoeabe keule haniai ui. Isege daule koveo vagalata uloho voeleai. ¹⁸ Iale dale talivelu dii mama laviai koseai, mama dau DILAVAu nile toela aveve moeaga ai, ai ivita vai toela tilu. ¹⁹ Iale momai dalu loui koseivale di voo isito loui kosea di haukala avale voo volela. ²⁰ Kateai huhualoho ba kuialai au mama vileo lolu isege mamaveu kuva kela niai uva iloho ivage voveu oge volela loige ivai uvuve keu aliou kavage viliviliai tialeu au vo vatalai uniuniavaloho vai oe lolu. ²¹ Ige voveu loui avoe mama dau DILAVAu nile aveve toela alu. Isi ai ivita vai toelatilu iale dalu loui koseivale dii voo. Isito koseai lou dii hau avale voo. ²² Kateai louge mamaveu au hau ese lavigei avoe ogona dua vai kolovai, lini vole vai adavele katui, samaka vai genavele katuve. ²³ Isi tai ovo mamoe batate vole vai loi kavage lai lovive ai isi sisilaeavai, avolu sisilai. ²⁴ Kosealelu dii voo kou voeleale late aloho tota ulu memila lailoili ulu iloho uesolilu, iale ave avola kou lai ivalu. Mamave kotou loi vesusege abo lovive aevelu. ²⁵ Abo kateisege voo ke kakaveu vue hauale keu loaleu ou vavae loi evisege abo sale kavai kavuiaviva. ²⁶ Ige au au voo vole belai avoe abo vadeula ko aeviva. ²⁷ Ige ese keu laviai avoe ai kou tialeu uu dua aloho loalela ke ai mamau ivai au ovo batate kavai lovive ai isi sisilava. ²⁸ Ige kakaveu koto ke evisi sivai, homasiai oe lolivelu isi uge mamaveu ba tai sovaeavaloho meilemei oe lolu. ²⁹ Ige eu a mama laiai avoe da koto ko louge eviso. Vagala moeaga ko uvule da aa duluai ai hau moeaga alu ava, igeto au ai ovobe ese vai damuge daa dii kakoluvuiali lovibe ai isi sisila solilu. ³⁰ Isito ai voo keu tialeu moni aa vavualeke agisi keate vavei aboili tebai oivaga moniu vesulage keu kuiala aeo loige aa avolu ovo batate kavai lovive alu ige eu isi sisilalu. ³¹ Ige mamaveu avolu loui avoe dii voo au vali bahata datiu ulu. Ige dii hau kea ai hauiala kea dale voeleige hauke nenia aelela keu. ³² Isito lai sisilage keu duave. Ai koo keu tiale atau voeleale kelate alu iloho tota kuialai loale keu nita ui lolu. Kelate oleu mama DILAVA kalei tiluaga kuialai lo. Otogoe lovi kitae sisila kitaeu ata data inohole ulu.