¹ Kosealu Sabati bula volele Balisesea kosi kitae voleu IESU lavia tai oveo ui avoti lovi isege ataea ui nimabisi malihai uviva. ² Isege IESU uninainoe malaha voleu genaveu adaveti uvuale keta ugulumai uva. ³ Ige IESU ke ivai Diuia talavatu avale isi Balisese atake belagei avoe au lai talavatu louale lai ba Sabatile ata dulugelivelu bele 'a'? ⁴ IESU kateai belage atabeu koto loue solige malahale ke hoeaseavai hanavage au oe tilu. ⁵ Isege ba lavigei avoe au lai esebeu o bolomakau bulale gulile o abatale dobage au lale solekata butuhai vai loi o kavai. ⁶ IESU kateai louge ata kitae kea kotove ibila louveve keu abouele malomaloage abo kalevai koto solisi ulu. ⁷ IESU kateaito ivasege lovi ilivelu loale kea olai o isiviale loi kosi kitgae ivitea vouvu dua kele ugulelemai. Ige IESU ke ivai koto koseale loulu. ⁸ Loui avoe malaha voleu au vau lovi abo age ilivelu louge laa tiluaga momai tai voumu dua kele ugulumalive isito tai voloa adale ugulumai uso. ⁹ Isito laa voumu dua kele usege ou kosi voleu loige abo lalai loui koseige laea otolovai kaie koveo loi ugulelemave isege kosi kou kele ui. Ige lale matita loi gabu toela kele ugulelemave. ¹⁰ Labeu momai ke alive tai kaie usege ou kosi keu laa ivegei loui koseige dii kakolo loi eue koveo uguluma ige ba tai aboili eue keveo uguluma. Ige ataeale laa ivei loui koseai ata kitaeala kea. ¹¹ Iale oleu amiga letolevage DILAVAule ke letatavai isege oleu amiga letolevage DILAVAule ke letatavai. ¹² IESU koto kateai loui ata haiveito kalei au avoti lovi iale ke laviai avoe aa lovi aluaga momai ai kakoluvu ai ata ivite isi hau moeagate ke toiavevale ale kateige eale vaoe aboele ai aa toiavai. ¹³ Isito aa iveve kitae aluaga hau moeaga site gena keukate nii kelote ke toiavei aboili lovi ive. ¹⁴ Ale kateai lovi aboili ige kea ba lovi ke ibilave ai amulivelu bele ige ale kele sisila kitae aso. Kosealelu vaoe DILAVAu nile aveve dua avale kea kobekavai abo ibila agivale kela aleba aele vaso. ¹⁵ IESU kateai louge malaha voleu lovi isi uale keu ke evisi loui avoe ata vadeu DILAVAu vatava doga keveo tiale keule avoti lovi isi sisilai. ¹⁶ Ige IESU huhui vole loui lavia avoe malaha voleu lovi vole kitae ai au kakoluvulai ionalu. ¹⁷ Iale au lovi iale vali niu loige au hau mohohoke hanavei avoe taevei atalai daa ionale ke lavigegabo loi loviu ledialu. ¹⁸ Ige mohoho lea tievealea kakoluvuiabe keneni lavigei avoe love loviu lediaalu. Ige kenenia homasiai uevelu isehe voleu loui avoe daa vatau doga voialelu dale ave tai ivai, kelu daba lolivelu bele talivelu kateai loui ai kosive lavia. ¹⁹ Ige voleu loi esele ke lavia avoe daa ovo ada vaki vole isi vaki vole '10' ke voigei otoveale da aike talivelu ke ivei iale daba lolivelu bele kateai kosive lavia. ²⁰ Ige voleu loi laviai avoe soli kitae da aike ivuale kele daba lolivelu bele kateai lavia. ²¹ Ige ese lekea loaleu kotoeabe keneni loui au kosive lavialu ea kelega loie savalu. Ige Kosiabe le keu abolai tuaiulu isi au memelo hanavei loui avoe kuva kola taevelivelu ata toela nii kelote, geina keukate, ata hauiabea ue site ke lohomegei love ige abo lovi ko isi. ²² Ige esele keu tialeu atake lohomegei lolu loi kosive ke laviai avoe daa aa louale keneni age vesulu isito ai oo kou ililoho solilu. ²³ Ige Kosiveu laviai avoe talivelu botou ata ke lohomei loige ou vuluai, ou gigiai ui voleta daivei. ²⁴ Koto leleve ula daa aa lavialu aa luta lavigeale kebe ba dii lovi ko ilivelu bele. ²⁵ Vali voleo IESU tige ata moeagaea lovai avoluvita tige eu kuialai abolai loulu. ²⁶ Isi loui avoe olea da lovai loluaga aule memila amiga momaeavai au mauli huhualivelu bele. Isi abo mama, aia, au ivu au ese au kovuvu abo mahoho abo mohoho huhuievelivelu bele. ²⁷ Olea da lovai vateu tuvu vale kea daeleteala kea isehe olea da lovai vateu tuvu valivelu ola soliale keale oleve kateai dii ata olisi. ²⁸ Isoho malaha voleu olai oo koulivelu aluaga au luta ugulumai au valevile ke huhuai ke toleai oo kisaiavai ke monila voiveve ke huhuai au monive keule hau keali nenive olisi ige aule ke agiatisi bela aule sotiai. ²⁹ Isito aule vale kea davana diba solisito au oo koulu aga aule hade ula uluvei tatavele ou ilida tedisi to oo letatava solige ataeale ke ivai evasiavai koele hamai. ³⁰ Ataeale loui koseai malaha keu au oo kouito koui vesuiava solilu. ³¹ Kelate voleu kosealu isoho vatau kosive voleu au tuvali ata teni taoseni lohomei vatava vole kosiveta tuvali atave tueniti taoseni keali tuvalialivelu aluaga aule luta huhuai koseai, au dale valivelu kosive keta solodiabe keta kavei lovegei o nunuvege abo tai. ³² Isito aule huhuige avoele isuage aule au ata vole hanavege abole talivelu oge volela kosiabe ke laviai koseai loi kosiveu loui avoe lai vole kave kalevaito voleali igali toai kakoluvuai udua ai sisilale uevei. ³³ IESU kotou ioni kateai loui to abolai loui avoe kelate laa daa lovai lolivelu aluaga luta ai huhui vadeu ke kalevaito ba loi daa lovave. ³⁴ Madoea keu duave isito au toelage koeve keule ue solige aule ba oleveo kateai koeai atau aile, keu toelalu. ³⁵ Lailoea madoeala, ige IESU keta madoeala iale olea DILAVAu nona dua ko loui ata haivege madoea late aboele koeai ulu, iale olea golemaveu uale ke koto ko evi.