¹ IESU KELISOu lailo agigealelu lai ba Diuia loo, talavatute lovalivelu bele, isito lailole IESU olate aevei kelu Diuia loo te ke aevivale, isito meliai IESU olate ke ola ave. ² Evive dau Bolo dala kou la lavigeva. Diu ata koea olai lai veuivale vate boilivelu age homasiave, abole koseai loko age laeale DILAVAu nile lilikata uve. IESU KELISOu kele la dulugelivelu bele. ³ Da tota lalai louge evive, laa oleu keage ale loeabe keneni lova, aba vole kalei vole lovalivelu bele. ⁴ Iale laa olea huhuai kosea loo koage DILAVAule lo hoeaseavei. Lai huhui kelega la IESU KELISO kalevalivelu bele. ⁵ Lai kate kalevaito laloi evievi kele meliai nenia uge DILAVAu munana tuvu vuvunele lai meliai uge DILAVAule lailo hoeaseavei. ⁶ Keu lailo hoeaseavege lai IESU KELISO luvita igali toai ulu. Iale kele vudiu vate boiale ke hau kitae oliesolilu. Isito lai IESU lovai lailoi evievile meliai vole hoeaseavei keu nenivela keu. ⁷ Koto leleveu memila laeo loige lake eviu alu. Isito olela louge lake kalevalu. ⁸ La toiaveale DILAVA keu kateai lali loue solilu isito isoho atau toelaeala lalai kateai loulu. ⁹ Ataeale beikini bauda vai valavale vaeavai ee kosai levutivage keule uvui loi bosiai ui. Kelate ataeale lae loi sele nona loui laa haivei isito nona keule lai huhuile ui kitaeai laa agigei tolovele tai. ¹⁰ Isito da huhuige laea DILAVA luvita igali toai uale kele laba sele nona ke valivelu bele oo evilivelu bele. Ige ata vadeu laa seleaveale keule DILAVAu ibilave toela vavui. ¹¹ Di kakoluvuia dau vudiu vate voiveve ke nonate loui laa haive soliale keluga Diuia ata kea dalu tuvuai da vai toelativa. Isito da IESU sataulole voeleale ke loui haivege ea ke evisi dalu tuvuai da vai toelativa. ¹² Iale da olale ata ole olai au vate boisi au uvu isi ata kea memila abo vate boige vesula age laea ba aveveabe alivelu bele. ¹³ Dii kakoluvuia DILAVAu laa toiavei laa agigeale kele laba Diuia loo lovai olaeabe alivelu bele, isi au la olale lai olateai vavau isivi keta aevigei. Be DILAVAu olale laea volelai olai vole dulugei uve. ¹⁴ DILAVAu loo keneni loi igali toai loui avoe ai kakolulai olale keu au amigalu olale kelate aso, momai huhui toelabe abolai alive, DILAVAu nita. ¹⁵ Volea vavala budia nona loui oagelive avolu kotou toela be loulive DILAVAu nita, ai nona ai aveve kealeto ba vali vaola kotale loi kelu DILAVA vabuiavai ataveta vabuiava. ¹⁶ Daa louale keu kosealu DILAVAu munanatuvu vuvunele uve kele laleba lai vavau ola alivelu bele. ¹⁷ Lai loi vavau isivive keu ba munana tuvu isivi ke alivelu bele. Ige munana tuvu isivi keu ba lailoi tebau isivi kealivelu bele. Kea voleali ugologoloalu ale munana tuvu isivi age tebau isivive keu aa kalevai tai, ale vavau isivi age munanau tuvule aa kalevai tai. ¹⁸ Isito lailoea munana tuvu lailoili uge lailoea ba Diuia basuale ke valale ulivelu bele. ¹⁹ Lai luleleige vavau isivi kela koea, volea keateali navai, tebahami, huhui toela huhuai. ²⁰ Seleivale kaivakuku dilava hoeaseavai eveai volelai tuvuai abobiga letatavai kele vole aegei, volelai loui vole kavei. ²¹ Isi volea hau ivai volelai mainai isi eu toela isi kuku toela isi, tilogoai kavu toela ai kele iveve toela agei. Daa memila lalai louale ke daa tota lalai loui. Ata olea aveve toela kateale avale kea ba DILAVAu vatavau dogave louale keveo talivelu bele. ²² Isito munanau tuvu baive oo aveveve keu kosealu olea munanau tuvu vuvunevele uale keale kosea volelai olai voleali kalevai. Vole dulugei kele abole evievile meliai tigei. ²³ Isi abobiga neniavei volelai tuvu kalei saiale voleali nonagei, katealelu ataea talavatu keuke bavue solilu. ²⁴ Olea IESU KELISOu atate oliale keale abo vavau isivi ke kalevai IESU idiu dole voeleale huhuai aveve toela ke kalevalu. ²⁵ Munana tuvu uveve dogave lai loameale kele lai vuvunevele ui tigei. ²⁶ Katealelu lai ba lailoi uveve kele lailomiga agisi katui hanivavai oalivelu bele.