¹ Kakoluvuia ivage ata voleu kalau toelale tai dobage laea munana tuvu vuvune uale kea tai duluai vai ekalesia kuvae loove. Au amigata neniave toelave aavage dobava ai evievile. ² Katealelu lai vole dulugei volea isu katealele lailole hauai goadai DILAVA loo vaitilugaga lai loo talavatu lega kelai tiva. ³ Ata voleule amiga letatavai loui koseai dau kateivale ata dalau. Vaoe abo ivage keu amigalau vai ata seleavei oiva. Matitela keu iale keu toelalu. ⁴ Iale kelu abiageu amiga iva. Au, au hauivale ata alau? bela haulu homasiavale ata alau au oleve ke ata hauivale oo homasiavale ata alu. Amiga ivai sesiai duave ai toelave kaleva. ⁵ Lai lole igaligaliai lailoi isu kevai kabaisi oigei. ⁶ Ata vadeu ata haiveluaga kotou dua haivegeisege oleu tisa luaga ai ese kotou dua ula haive. ⁷ Momai ba malomaloagelive atabeu da DILAVA seleavalivelu bele. Lai luleleige lai haba vuule kale ke lailole baive lovoi haba agisi. ⁸ Kelate ata vadeu au vavale eve, holo, teba ke ii otovei kai uale keule, keule toela kitae valetai voeleai. Isehe oleu au vavale munana tuvu ii kale keule munanau tuvu baive agisi ukolikoli mauli vai voelealivelu bele. ⁹ Aveve dua ke homasiavalive keu taemiveu loige lailole baive agisi. Lai gologolo soliluaga lailole mauli vai. ¹⁰ Katealelu DILAVAu kuva alavage lailole lailoi kakoluvu dulugei vale vile vavei hoeaseavei kea uvule lailoi evievi igali ata ke dulua kitae vave. ¹¹ Iva daa levaleva vole kitaela daa dii adateta kisaiavai lala hanavalu. ¹² Daa lalai levaleva vole toleale kela daa tota louge evive, ata kea olai lai vudiu vate ke boige ea valivelu Diuia ivi letatavai. Too IESU kolosi ke kaleva keluga ke laele meliava kelu kotoeabe eviva. ¹³ Ata vadeui vudiu vate boiale ke talavatu lova solilu, isito olaeabe ata kava kenenia abo vate boisi valivelu Diuia ivi vai letatavai IESU vile kalevaive. ¹⁴ Kea kateai abobika letataeviva, isito dau katesolilu isito daule IESU KELISO ivi loui letatavai kosealu. IESU KELISOu idiu dole voeleale koto ke ula loui ivive letatavai. Kosealelu IESU voeleale kele vatau aveve keu daa valivelu bele isi da vatau ola alivelu bele, dau IESU vile. ¹⁵ Isoho lai lailoi vudiu vate boie solige o boige kea kitae solialeala kea. ¹⁶ Iale ata olea abo uvevele aveve kateale aluaga abole uu duai DILAVAu ata olisi. Ige DILAVAule abolai uvua hoeaseavei dulugei. ¹⁷ Dii koto kele kateai ulu iale momai daa kavaevale kosealelu daa IESU hau asege ataea da kavai dii vate vai oketisi vai samagutisi kateale ale kele dau IESU vile olilu. ¹⁸ Dii kakoluvua daa olalela lai kosive IESU KELISOu vali bahata laa huhugei laa hoeaseavei, dii kotou loi kele katealu.