¹ Galatia ataea lale tilogoaevelu olela la seleavege o lai uvu ige. Daa memila loaleu IESU KELISOu idiu dole voeleale nona ke loui la haivege laa nonake evisi luleleavelu isito ole igalila loi la seleavege la koto ke kalevalu. ² Daa koto vole igali loui la lavigei evie la oleve kateila ai DILAVA munanau tuvu agievelu, au la Diuia basuale ke lovalai ke agilu. Be la DILAVAu nonau tuvu ko evila aive munanave tuvu ke agievelu. ³ Iale la oleve kateai tilogotea avale ke late la ava. La memila DILAVAu nona evige munanave tuvu la agigei la siauiavelu, isito au la olai ke kalevai lai siaute ulale meliai ui. ⁴ Laa IESU lovai vateu tuvu agiale keu oleve katealu. Momai ke huhuai IESU kalevalive, meliai avoti tiso. ⁵ Vadeuluga DILAVAu munanau tuvu lamei lai minale ivai teteivale aveve ketaga ke lamelu. Au la huhuige la Diuia basu lovala aga DILAVAu au munana tuvu lamelu, bela kotove evila age. ⁶ Eibolahamu avale keu bukau tuvu loui avoe Eibolahamu, DILAVAu nona evisi au uvu vai avoele vaeavalu, kelega DILAVAu loui avoe, Eibolahamu keu dii nile ata vaite, atau dua. ⁷ Iale da la lavigei la olea abo uvu vai DILAVA vileo vaeavale kea Eibolahamu eseala kea. ⁸ Memila bukau kotole DILAVAu vaoe vadeuia loiveve ke ivai loui avoe, Diu ata oliesoliale abo uvu vai daele vaeavage dale abolai loui koseai laa kea lilikata ualeala kea. Iale koto kele DILAVAu Eibolahamu loui avoe au ai uvu vai damuale kele dale vatau ata bahata hoeaseavei. ⁹ Eibolahamu au uvu vai DILAVA vavuale kelate oleu au uvu vai DILAVA vavuge DILAVAule ata ke hoeaseavei. ¹⁰ Isege ata vadeuia Diuia basute o loeabe huhuai meliai lovai tige ke nohovu, kosealelu bukau kotou loui avoe ata olea DILAVAu basu love keneni huhuai to igaliave leguvage DILAVAule kavei IESU loivale kela. ¹¹ Lai luleleige ata olea Diuia talavatuiabe lovai tiale keu bae DILAVAu nile dualivelu bele. Kosealelu bukau loui avoe olea abo uvu vai DILAVA vavui nivele duai uale keale abo evievi kele ui tigei. ¹² Isege ata olea abo uvu vai talavatule vaeavai to DILAVA vileo vaeava savalu, Bukau kotou loui avoe ata lolea abo uvu vai talavatule vaeavale keale kele kateai ui. ¹³ Isito IESU KELISOu lailoi toela ibilavelu voelealu, bukau kotou loui avoe ataea ata vole vai idile umuvai kavage voelealu. Ige DILAVA ke ivai ata ke aule kavei iale IESU idiu dole voeleale keu lailoi toela ibilavelu voeleage DILAVAu lailo kave solilu. ¹⁴ IESU KELISOu voelage DILAVAu olai Diuia ata keneni hoeaseavei Diu ata oliesoliale keta hoeaseavei. Dilavau memila Eibolahamu laviai avoe ai aveve dua kelu dale vatau ata ko neni hoeaseavei. Iale IESU voeleale kele DILAVAu loui avoe dale di munanau tuvu ke lamei ige lailoeale lailoi uvu vai DILAVA vavuge aule au munana tuvu lailoamei. ¹⁵ Dii kakoluvuia lai vali bahata avale kele dale koto vole loui la haivege evisi luleleave. Isoho ata abutiu vale vole loui vai lelevetisi bebale toleage kisaiavige atabeu ba ke iae loi kotoeabe ke kosalivelu bele. ¹⁶ Memila DILAVAu Eibolahamulu nona vole lou vaeavalu isi laviai avoe dale ata isi ai atateta hoeaseavei bukau koto kele DILAVAu koto koseale loulu dale ai ata hoeaseavai ige keu IESU KELISOu lau ke loulu. ¹⁷ Daa koto louale ke baivela kou DILAVAu au vadeu alivelu ale koto ke loui Eibolahamu haivulu isi laviai avoe da ba louale ke kalevalivelu bele. Iale lahani vohadeleti teti vesusege DIALVAu au lo vai Mousese vavulu ige lo keu memila DILAVAu louale ke bavue solilu ige koto keu ui egealu. ¹⁸ DILAVAu Eibolahamulu loui vaeavale kele lai ba Mouseseu lou valale haube agilivelu bele isito DILAVAu Eiboloahmulu louale kele lai lole DILAVAu louale ke agisi. ¹⁹ Iale vadeuluga DILAVAu loo vai Mousese vavulu, DILAVAu loo vai Mousese vavuale keu kosealu, ataea loo kele abo aveve toela avale ke ivai isi olale loo keu uvaga Eibolahau atate keu loigeto ba keu vesui. ²⁰ Memila DILAVAU Eibolahamu laviale atave kela da louva. Isito DILAVAu loo ke vai ANELU vavege ea vai Mousese vavuge Mouseseu vai ata vavelu Mousese keu atata DILAVAta minale lavilu isito DILAVAu Eibolahamulu louale kea minale atabeu lavie solilu isito DILAVA igaliu Eibolahamu lavialu. ²¹ Au laa huhuige DILAVAu loo vai Mousese vavuale keu memila DILAVAu Eibolahamulu louale ke bavulu. Ba keu kate solilu au kateige ataeau loo kele ukolikoli agilu. Isito loo kele ataea DILAVAu nile nenie solilu. ²² Katealelu bukau loui avoe aveve toelau ata bahata vabugelu vata kole isito olea abo uvu vai IESU KELISO vavuale keale DILAVAu louale ukolikoli mauli agisi. ²³ Isito evievi aveve keu loie solisege lo keu lailo agigelu keu lailo umuvei agisi dibulae otoveale kelate alu. ²⁴ Evievi vali keu loie solisege lai loea lou valale ulu. Ige IESU KELISOu loige lai lailoi uvu vai avoele uvu vai aveoel vaeavage DILAVAu lailo hoeasevelu. Isi olale lailoi aveve keu nivele nenive olisi ui. ²⁵ Katealelu loo keu lailo nalige solisi ulu, loo keu celemonielo loo, mamoe kavei vauvale isito lai, lailoi uvu vai aike IESU KELISO vileo vaeavale kele eu lailo nimabigei uva. ²⁶ Laa lai uvu vai IESU KELISO vavuale kelega la bahata kea DILAVAu ese olievelu. ²⁷ Laea bahata babatisoale kelega laa IESU luvita avo late olisi aveveve dua ke late ai uva. Ige lai aveve keu duai ulu. ²⁸ Katealelu Diuia ata isi Diuia ata olie soliale kea nii vole olie solilu isito kea volelate oo ata igaliala kea. Ige ukavavale keta isi loviavale ata keta isi abo ola ai okavavale keta isi malahaea keateai vole late. Ige laa bahata IESU KELISO luvita igali toai atave olilu. ²⁹ Laa IESU KELISO atave oliluaga laea Eibolahamu ese oo atate olive. Isi DILAVAu memila Eibolahamulu hau louale ke lale ba agive 'AMENI'.