¹ Vakwetu, mwayiva nawa-nawa ashi (Ame kuna kughamba kuvantu ovo vayivo veta), veta kupangera muntu shirugho nashintje osho ana kuparuka. ² Mukadi kwara kumumanga veta yankwara na vyendi shirugho nashintje osho ana kuparuka vyendi, nkeneshi ana dohoroka mukafumu wendi, mukamali makura kumumangururamo mu veta yankwara. ³ Nkene ahoro mukafumu nayepeke ghuye vyendi shimpe kuna kuparuka, vakare kumwe tupu naye, ogho mukamali ngava mutwenya rukeshe. Ngoli nkeneshi vyendi adohoroka, kumangurukamo mu veta, kapi ngava mutwenya rukeshe nkene akwara mukafumu wapeke. ⁴ Vakwetu, anwe ngoli, Anwe mwafa kumbinga yaveta mbyo muna kara maruha gharutu rwaKristus. Vino kwashoroka mposhi muhamene kukwendi, ogho, vavhumbura kughufe, nalighano lino ashi muyime viyimwa vyaviruwana vyakukuyenda na nkango da Karunga. ⁵ Opo twakalire na maghukaro ghetu ghapa rutu, veta kwayitire madogho amadona ghakuyita ndjo ghayaruwane pa marutu ghetu, viruwana vyetu mbyo vyatu yitiliro mfa. ⁶ Pantantani twa mangurukamo mu veta. mbyovyoshi atwe twafa kuveta oyo yatu mangiro tukare mughupika. Vino kwashoroka mposhi atwe kapi tuna kuruwanena nka mughukaro wakapito wapa veta oyo vatjanga, nani ngoli mughukaro waghupe wapampepo. ⁷ Weni omo tuvhura kutanta? Tughambe ashi veta kuyita ndjo ndi? Hawe. Nampili kuna manga. Veta ndjo yaturongo tuyive ghundjoni. Ndi kapi nayiva lidogho ashi ghundjoni. ⁸ Veta ndjo yatapango nkondo ku ndjo, yirambwite madogho ghakukushuva-shuva murutu rwande. Ndi kapi pakara veta, ndjo ndi da fa mo. ⁹ Shirugho shakapito ame kani parukanga tupu liparu, ngoli kapi nayivire veta, ngoli opo nayivire veta, ndjo nado mbyo da shoroka, ame makura mbyo na fa kundjo. ¹⁰ Veta oyo hambara yiyite monyo mumwande makura yayo ayiyita mfa mumwande. ¹¹ Mukondashi ndjo kwawanena nkondo mulivhango lya veta mposhi niyive maghundjoni ghande. mukonda yaveta ame mbyo na fa. ¹² Veta yene-yene yapongokanka, dimuragho nado kwapongoka, kwahungama ntani diwa. ¹³ Nani vyaviwa pone mbyo vyayito mfa mumwande ndi? Hawe, nampili kuna manga. Ndjo ndjoyaviruwano, ndjo kwaruwanita veta yiyite mfa mumwande, ghukaro waghudona ghukushorore, veta yishorore ndjo ashi yidona ghunene. ¹⁴ Atwe twayiva ashi veta kwakara pa mpepo, ame muntu na karo parutu rwanyama. Ame kwangulita nikare nimupika wandjo. ¹⁵ Mbyovyo shi ame nakukwatashi lighano ovyo naruwananga. Mukondashi ovyo nahoro kuruwana, nakuviruwanashi, ovyo nanyenga mbyo vyakuruwana. ¹⁶ Nkene aniruwana ovyo napira kuhora, mbyo napulira nani ashi veta yiwa. ¹⁷ Ntantani nayiva ashi kapishi ame naviruwanango, nani ndodino ndjo dakaro mumwande. ¹⁸ Ame kwayiva ashi mumwande mwato ghuwa, rutu tupu rwamaghoko-ghoko mwato mutompo. Shihoro shakushana kuruwana ghuwane mposhilimo, mukuruwana ashi vitikemone kwato. ¹⁹ Ghuwa ogho nahora ashi ndi nighuruwane, kapi naghuruwananga, Enengoli ghudona ogho nanyenga po, ngo naruwananga po. ²⁰ ngoli nkene ame kuruwana ovyo napira kuhora, vino kuna kutanta ashi nani kapishi ame naviruwanango, nani ngoli ndodino ndjo dakaro mumwande ndo daviruwanango. ²¹ Mpo ngoli, ame kwawanapo shihonena pa veta ashi: Ame kwahora kuruwana ghuwa, enengoli ghudona nagho kapi watundangapo pa pande. ²² Mumutjima wande ame kwapandura ghunene veta yaKarunga. ²³ Shimpe ame kumona nka ashi veta yapeke yaruwanango murutu rwande. Oyo veta yayo kukurwanita naveta yamumutjima wande. Yino veta kwantura mughupika wandjo do dapangerango murutu rwande. ²⁴ Ame muntu waruhepo! Are ogho ngandjoghororomo muno murutu runo runa kuntwaro ku mfa? ²⁵ Ame kupandura Karunga kwaJesus Kristus Hompa wetu! Mposhi, mumutjima wande kuna shana kutikitamo veta yaKarunga. Ngoli, rutu rwapanyama kuna shana rutikitemo veta yandjo.