¹ Weni omo tuvhura kughamba? Tutwikire ngoli kudjona nakutura ndjo mpo ashi kenda yaKarunga ntani yivhuka ndi? ² Nampili kuna manga, kapishi mo ngoli. Nkeneshi atwe twa fa kumbinga yandjo, weni nka omo tuvhura kukaramo? ³ Nani kapi mwayiva ashi navantje ovo vawaneno liyoyero mwaKristus Jesus, kwatu kushira mu mfa dendi? ⁴ Atwe kwatu vhumbika, naye muliyoyero lya mfa. Vino kwashoroka mposhi yira momu varambwita Kristus mughufe nankondo daghuyerere waVashe, mposhi natwe tukare mughukaro na mumonyo waghupe. ⁵ Atwe nkeneshi kumwe tupu twa kalire naye mumfa dakufana yira dendi, momka ngatu kara naye kumwe tupu naye mulivhumbuko, yira momu avhumbuka ghuye akare namonyo. ⁶ Atwe twayiva vino ashi, muntu wetu wamukuru-kuru kwamupamparera kumwe na Kristus ku shilivindakano mposhi nkondo da rutu rwandjo ruhanaghukepo. Vino kwashoroka mposhi atwe tupire kukara nka vapika vandjo. ⁷ Mbyovyoshi nkene muntu ana fu makura ana manguruka mo ngoli munkondo da ndjo. ⁸ Nkeneshi twa fa kumwe na Kristus, Atwe tuna huguvara ashi ngatu kakara nka na monyo kumwe naye. ⁹ Atwe twayiva ashi momu vavhumbura Kristus kughu fe, kapi ngavhura nka ku fa; mfa kapi nka dakara na nkondo da kumupangera. ¹⁰ Mfa odo afire Kristus kwafelilire ndjo rumwe tupu makura. ngoli, monyo oghu ana kara nagho weno, kuna karere nagho mwaKarunga. ¹¹ Nanwe shi, kughayarenu na ghumwenu ashi mwafa kumbinga yandjo, mbyo munakarere na monyo waKarunga mwaKristus Jesus. ¹² Mposhi, kapishi mupulitire ndjo dipangere marutu ghenu ghaku fa mulimburuke kuma dogho ghenu ghaparutu. ¹³ Kapishi mutape maruha ghamarutu ghenu ku ndjo, ghakare viruwanito vyaghudona. Ngoli kutapenu marutu ghenu kwaKarunga yira momu vafera vantu ovo vavhumbuko kughufe vakare na monyo, tapenu maruha ghenu naghantje kwaKarunga ghakare viruwanito vyaghuhunga. ¹⁴ Kapishi mupulitire ndjo dipangere marutu ghenu. Mbyovyoshi anwe kapi mwakara munda yaveta, anwe kwakara munkenda yaKarunga. ¹⁵ Weni tuvhura kughamba? Atwe tutwikire tupu ngoli kudjona mukonda kapi twa kara kuntji yaveta, atwe kwakara kuntji yankenda? nampili kuna manga! Kapishi mo ngoli. ¹⁶ Kapi mwayiva ashi nkene amutapa marutu ghenu anwe kukara vapika, anwe vapika kwavo mwalimburukanga nakumukarera? Vino kutanta ashi anwe muvapika vandjo, odo ngadi mutwaro kumfa, ndi anwe vapika vakulimburukwa ogho ngaghu mutwaro kughuhungami. ¹⁷ Tapenu mpandu kwaKarunga! Mbyovyoshi anwe kwakalire vapika vandjo, ntantani muna limburuka mumutjima naghuntje kumarongo ghaghushili ogho mwatambura. ¹⁸ Anwe kwamuyoghora mundjo, mbyo vamutura mukare vapika vaghuhungami. ¹⁹ Ame kuna kughamba yira mukafumu mukonda yalipiro unankondo mumarutu ghenu. Virugho vyakapito anwe kwatapire marutu ghenu ghakare vapika vyanyata vyakupira kulimburuka, mbyo wakuwederera ghukorokotji wenu, weno ntantani, kutapenu mukare vapika vaghuhungami mukare vapongoki. ²⁰ Mbyovyoshi opo mwakalire anwe vapika vandjo, kapi mwakalire naghulimburuki waKarunga. ²¹ Virugho vyakapito, ghuwa munke mwawana mo muvinke ovyo kamuruwananga ovyo vina kumuyitiro ntjoni paweno? kughuhura vyavyo kumutwara ku mfa. ²² Momu vamuyowora mundjo weno muna kara ngoli vapika vaKarunga, Viyimwa vyaghukaro wenu kumutwara kughupongoki. Makura ngamukawane liparu lya naruntje. ²³ Mukondashi mfuto yandjo ne mfa, enengoli ghushwi wankenda yaKarunga wakuwana monyo wanaruntje mwaKristus Jesus Hompa wetu.