¹ Yira momu twahungama kwaKarunga mukonda yalipuro, motwakarera mbili na Karunga mwaHompa wetu Jesus Kristus. ² Mumwendi mo twawanena mpito tuyende munkenda omo tuna kara, natwe mbyo tuna kukupanda mulihuguvaro lya Karunga ashi natwe ngatuwana ghuyerere. ³ Kapishi mbyo vino tupu, atwe nka kukara naruhafo nkene tuna kara muma ghudito ghamangi. Atwe twayiva ashi maghudito kuyita lididimiko. ⁴ ngoli lididimiko kuyita ghukoli wamumonyo, ghukoli wamumonyo kuyita lihuguvaro, ⁵ lihuguvaro lyetu na kutuyitirashi ntjoni mukondashi Karunga kwatura shihoro shendi mudimutjima detu kupitira mumpepo yakupongoka, oyo atapa kukwetu. ⁶ Opo twa kalire atwe twahana nkondo, mpo aya felilire Kristus vadini Karunga pashirugho shaghuhunga osho atulirepo Karunga. ⁷ Kurenka ghufere muntu wamuhungami kuditopera ghunene muntu, mukufera muntu wamuwa pamwe hashako kuvhura kushetekerako. ⁸ Ngoli Karunga kwatu neyeda shihoro shendi shashinene ashi, opo twa kalire atwe shimpe tuvakandjo, Kristus mpo ayatufelilire. ⁹ Vyavinene po, ghunene, momo twahungama mukonda yahonde yaKristus, ngayitu yoghorora mo mughugara waKarunga. ¹⁰ Kumeho ko, atwe kwakalire vana nkore vaKarunga, nampili momu twa kalire ngoli Karunga mpo atuyita, tugwanekere kumwe na monendi, mu mfa damu yogholi, tuvhure kugwanekera kumwe na Karunga, ghunene po ngatu parukire mwaKristus ogho akaro na monyo. ¹¹ Ntani kapishi mbyo vino tupu hawe, atwe kukara na ruhafo mwaKarunga mukonda yaHompa wetu Jesus Kristus, ogho atuyito tugwanekere na Karunga. ¹² Yira momu tupu ashi, ndjo kwaya mughudjuni kupitira mumuntu ghumwe tupu, makura ndjo yendi mbyo yayita mfa. mfa mbyo dakuhanena mu vantu navantje, morwa vantu navantje vadjona. ¹³ Ndjo kwakalire mughu djuni, yayo veta shimpe pandere, makura ndjo nakuyivarurashi nkene kapi pana kara veta. ¹⁴ Nampili ngoli, kutunda kwaAdamu dogoro naku kwaMoses, mfa kadipangeranga navantje na mbovo vapiliro kudjona yira momu adjonine Adamu mukupira kulimburukwa ku veta da Karunga, Adamu kwakalire lifano lyagho ngayo. ¹⁵ Ano ngoli, ghushwi waKarunga wankenda kapi wakufana na ndjo yaAdamu. Ndjo yamuntu ghumwe tupu ndjo yayitiro mfa mu vantu navantje, Nkenda yaKarunga nayo mbyo yanenepa ghunene ntani maghushwi ghendi nagho mushikwavo mumuntu ghumwe tupu, Jesus Kristus, ogho ayitiro vantu vavangi matungiko ghamanene. ¹⁶ Ghushwi waKarunga kapi wakufana na ndjo ntani navi yayita ndjo mumuntu ghumwetupu. Kutunda tupu opo adjona muntu ghumwe tupu, mpo lyatunda lipanguro laya mfa, mu ghushwi waKarunga wakudongonona po ndjo da vantu vavangi moya tunda mbili yaKarunga. ¹⁷ Nkeneshi mukonda yandjo yamuntu ghumwe tupu, mbyo da vhura kupangera mfa mughudjuni, weni tupu ngoli omo ngava pangera mwamunene mumonyo wavo vawano nkenda yayinene na ghushwi waughungami mumuntu ghumwetupu, Jesus Kristus. ¹⁸ Ngoli, yira momuyatikita ndjo yamuntu ghumwetupu yiyitire vantu vavangi lipanguro, shiruwana shaghuhunga shamuntu ghumwetupu mbyo shayita ghuhungami na monyo kuvantu navantje. ¹⁹ Yira momu tupu vakara vantu navantje vandjoni mukonda yakupira kulimburukwa muntu ghumwe tupu, mukonda yakulimburukwa muntu ghumwe tupu mo vatunda vahungami vavangi. ²⁰ Veta kwaya mposhi ndjo divyuke. Ngoli nkeneshi ndjo adivhuka ghunene, nkenda yaKarunga ntani nayo yivhuka ghunene. ²¹ Vino kwashoroka mposhi, yira momu tupu dapangera ndjo mughudjuni ditware vantu kumfa, na nkenda yaKarunga mo yina kupangera ntantani weno, yiva tware kughuhungami wamonyo wanaruntje mwaJesus Kristus, Hompa wetu.