¹ Weno ntantani kwato nka lipanguro lya kudjona-ghura kwavo vakaro mwaJesus Kristus. ² Mbyovyoshi veta yapa mpepo oyo yaturango monyo mwavo vakaro mwaJesus Kristus ndjo yatumangurura muveta yandjo na veta yamfa. ³ Ovyo yapira kutikitamo veta mukonda yaghupiro nkondo warutu rwamuntu, Karunga avi manapo. Ghuye kwapangulira maghundjoni naghantje pakutuma monendi akare murutu rwaku fana marutu ghetu ghandjo, aya ghupepo ndjo detu. ⁴ Karunga kwarughana vino mpo ashi ghuhungami ogho yahepa veta ghutikiliremo mumwetu, mposhi atwe twakaro mughukaro waparutu, tukare ngoli naghukaro wapa mpepo. ⁵ Ovo vahameno kughukaro wapa rutu kuruwana vyapa marutu ghavo, ntani ovo vahameno kughukaro wapa mpepo kuruwana vyapa mpepo. ⁶ Ghukaro waparutu kuyita mfa, ntani ghukaro wapa mpepo kuyita liparu nampora. ⁷ Ghukaro waparutu kuyita ghunkore naKarunga, nakulimbururkwashi kuveta yaKarunga, ntani nakuvivhurashi. ⁸ Ovo wapangeranga ghukaro waparutu nakuvhurashi kukuyenda namutjima waKarunga. ⁹ Ntjeneshi, mpepo yaKarunga ayikara mumwenu, kutanta shi mpepo ndjo yakumupangera, kapishi ghukaro waparutu. Ngoli ntjene ghumwe apiri kukara nampepo yaKristus, ogho kapi ahamena nka kukwendi. ¹⁰ Ntjene Kristus akara mumwenu, marutu ghenu ghana hepa kufa mukonda yandjo, mposhi mpepo yimupe monyo mukonda shi Karunga ghamupa ghuhungami. ¹¹ Ntjeneshi mpepo yaKarunga oyo yavhumburo Jesus Kristus kughufe ayi kara mumwenu, ngayitura monyo mumarutu ghenu ghakufa, morwa mpepo oyo yakaro mumwenu. ¹² Vakwetu, mpo ngoli shi, atwe tuna kara nashinka, ashi kapishi tukare mughukaro waparutu ogho ahora marutu ghetu. ¹³ Ntjene atukara mughukaro waparutu, atwe tuna kona kufa, ani ngoli ntjene shi amu dipagha ghukaro wenu waparutu, anwe ngamukara namonyo. ¹⁴ Mbyovyoshi mbovo yapititiranga mpepo yaKarunga, mbo tupu vana vaKarunga. ¹⁵ Mbyovyo shi mpepo yaKarunga oyo mwatambura kapishi yakumutura mukare muvapika ashi mukare naghoma; nani ngoli atwe kwawana mpepo yaKarunga tukare vana vaKarunga vapa mpepo, tuvhure kushungida kwaKarunga ashi,'' ABA, Vava!'' ¹⁶ Mpepo yaKarunga yene kugwanekera naMpepo yetu mpo ashi yitape ghu mbangi kukwetu ashi atwe tuvana vaKarunga. ¹⁷ Enengoli nkeneshi atwe tuvana vaKarunga, natwe tuna kara vapingi kumwe tupu na Kristus, nkene atu kara mumahepeko kumwe naye natwe nka ngatukawana ghuyerere kumwe naye. ¹⁸ Ame nayiva ashi runyando runo tuna kumona paweno na kuvhura shi kurushetakanita na ghuyerere ogho ngaghuka shoroko kukwetu. ¹⁹ Lishito lya Karunga nalintje kuna kutaterera nalihuguvalito ashi vana vaKarunga vashoroke. ²⁰ Mbyovoshi lishito lya Karunga kuna kara mulidjonaghuko, kapishi mushihoro shawene, nani ngoli muvipanga vyamwene Karunga, na lihuguvaro lino ashi, ²¹ Lishito lyaKarunga ngava ghuyoworamo mughupika walidjonaghuko, ngaghuyende muliyoghoro lya ghuyerere wavana vaKarunga. ²² Tuna yiva ashi lishito mudima kuna shanda dogoro weno ntani kuna kuyuvha kukora yira mukadi ogho ana kushano kuwana mukeke. ²³ Kapi lishito tupu, nampili natwe twakaro naghushwi waKarunga wapa mpepo wakuhova, kuna kupya munda yetu, shirugho osho tuna kutaterera ashi tukare vana vaKarunga, ngaya yoghore marutu ghetu. ²⁴ Mbyovyoshi atwe kwaparuka mukonda yalihuguvaro. Ntjeneshi ove aghuwana ovyo wataterera kutanta shi ove kwato nka lihuguvaro. Are wakutaterera ovyo awana kare? ²⁵ Ene ngoli ntjeneshi atuhuguvara kovyo twapira kuwana shimpe, atwe kuvitaterera nalididimiko. ²⁶ Mundjira yimwe nka Mpepo yaKarunga nayo kutukwafa mughupira nkondo wetu. Ntjeneshi kapi tunayiva shi weni tuvhura kukanderera, mpepo yene ndjo yakutushungidirapo atwe twahana kuyiva ashi vinke tuna hepa pashirugho osho. ²⁷ Mukonda shi ogho akona-konango mudimutjima davantu, kwayiva ovyo yaghayaranga mpepo, mukonda shi mpepo kukandererapo vapongoki kutwara momu ghashanena Karunga. ²⁸ Atwe twayiva ashi kwavo ahora Karunga, Vininke navintje kuvi varughanena mwamuwa, ghuye kuviva rughanena navintje mwamuwa, matjangwa ghamwe ghaRugereka kwatanta ashi, vininke navintje kuviyendita mwamuwa, kwavo atoghorora Karunga mukukuyenda nashitambo shendi. ²⁹ Kwavo akoneka Karunga kutunda kuntundiliro, mbyo ava pongora vafane monendi, ngakare mbeli yalira lyalinene ghuye ngakare mbeli wava ghuni vendi. ³⁰ Ovo atambura, mbovo atoghorora mo. Ovo atoghorora mbo vahungamo. Ovo vahungamo, mbyo nka vayererepeka. ³¹ Weni ngoli omo tuvhura kughamba kwavino? Ntjeneshi Karunga natwe ana kara, are ghumwe wakuvhura kupitakana papetu? ³² Karunga ogho apiro kuguva monendi wamwene mbyo amutapa akare ndjambo yanavantje, ngapire kutupa navintje moghoko-ghoko ovyo tuna hepa kumwe nayendi? ³³ Are ogho ngavhuro kutapa ghundjoni kwavo atoghorora mwene Karunga? Karunga mwene ndje ava po ghuhungami. ³⁴ Muntu kuvhura ava pangure ndi? Jesus Kristus ndje afo-ghunene po, mbyo aka vhumbuka kughufe-mbyo akashungira kurulyo rwaKarunga ntani mbyo ana kutushungidirapo natwe. ³⁵ Vinke walye vyakuvhura kutughupa mushihoro shaKristus? Maghudito, ndi ruhepo, ndi runyando, ndi ndjara, ndi nkagi, ndi viponga, ndi rufuro rwamudipaghi? ³⁶ Yira momu tupu ghatanta matjangwa ashi,'' Mukonda yendi atwe kugwanekera namfa liyuva nalintje. Atwe kuna kara yira ndjwi da kukatomeno.'' ³⁷ Mwanavintje vino atwe tuva fundi twapitakano kupitira mwagho atuhoro ghunene. ³⁸ Ame nayiva nawa-nawa ashi navimweshi vyakuvhura kutughupamo mushihoro shaKristus dikare mfa, ndi vaEngeli, ndi lipangero, ndi vino vina karopo, ndi vyakumeho, ndi ghuna nkondo, ³⁹ navyo shi vyakuliwiru, ndi vyakuntji-ntji, ndi kehe shishitwa osho vashita, nakuvhura shi kutughupamo mushihoro shaKarunga, osho shakaro mwaJesus Kristus Hompa wetu.