¹ Ghuwa munke wakaropo ntjene ghukare muJuda? Vamba ne mulyo wayo munke? ² Mulyo wayo ne ghunene ngudu. Shakuhova, nkango daKarunga kwadi huguvarera nakudishorora kuvaJuda. ³ Vinke vivhura kutanta ntjeneshi vaJuda vamwe kapi vapura? Kupira lipuro mumwavo ne kuvhura vaghupepo ghulimburuki waKarunga ndi? ⁴ Nampili kuna manga. Nampili ngoli, Karunga ndje tupu muna ghushili, nampili vantu navantje vakare vana vimpempa. Yira moomo vavitjanga ashi,'' Ntani ngava yiva ashi ove ghumuhungami munkango doye, ove kehe pano kufunda ntjene kuna kukupangura.'' ⁵ Virughana vyetu vyavidona ntjeneshi avi shoroka kughuhungami waKarunga, atwe vinke vyakuvhura kughamba? Tughambe ashi Karunga ne lipuko ntjene agarapa natwe ndi? (Ame kuna kughamba pashina ghuntu.) ⁶ Nampili kuna manga! Ntjeneshi mo ngoli Karunga weni omo ngapangura-pangura Udjuni? ⁷ Ntjeneshi vimpempa vyande kushorora ghushili waKarunga awane ghuyerere, mukonda munke vakantulira kughundjoni? ⁸ Ndi turughane tupu ngoli, yira moomo vatushwaghuranga nakuturundira vamwe ashi,'' turuwanenu ghudona ghuwa ntani ngaushoroka'''? Vano vakughamba weno ngava vapangura mughuhunga, yira moomo vawapera. ⁹ Makura weni ngoli? Atwe vaJuda ne twapitakana vaPagani ndi? Nampili kuna manga. Ame naghamba kare ashi akare muJuda ndi muGereka, navantje, ndjo dava pangerango. Yira momu tupu vavitjanga ashi: '' Kwato muhungami, nampili ghumwe. ¹⁰ Omu mo vavitjanga. "kundereko wamuhungami, nampiri ghumeshi: ¹¹ Kwato ogho ankwato lighano. Kwato ogho ana kushano aye kwaKarunga. ¹² Navantje vatunda kwaKarunga. Navantje vapuka. Naghumweshi arughanango vyaviwa, kwato, nampili ghumwe.'' ¹³ Dimulighu davo kwafana yira ntoko yakuyashama. Vimpempa kwakara mumaruraka ghavo. Ngoli dimurungu davo kwakara naghushungu yira waliyoka.'' ¹⁴ '' Mutunwa twavo kwayuramo mafingo na lishandu.'' ¹⁵ Mpadi davo dalyata muhonde yayingi. Vavo nakukukata-kata shi kudipagha. ¹⁶ Kehe kuno vana kalyata kudjonaghura ntani ruhepo mundjira yavo rwakara. ¹⁷ Vavo kapi vayiva ndjira yampora.'' ¹⁸ ''Vavo kapi vatrjira Karunga mumantjo ghavo.'' ¹⁹ Weno tuna yiva kehe vino yatanta veta, yayo kutantera ovo vakaro kuntji yaveta. Mposhi tushayikitepo makupopero ghavantu navantje, Makura Karunga ngaka pangure navantje. ²⁰ Kwato muntu ogho ahungamo kushipara shaKarunga mukonda yakutikitamo veta. Muveta kuyamo virughana vyaghundjoni. ²¹ Ntantani ndjira yaKarunga oyo atapa kuvantu vakare naghuhunga vayi yuvita. Ngoli kapi yahamena kuveta ntani vaporofete navo vatanta, ²² ashi, Karunga kuhungameka vantu morwa lipuro lyavo mwaJesus Kristus, kwanavantje ovo vapuro. Mposhi papire likushuvo. ²³ Mbyovyoshi navantje kwadjona makura ghuyerere waKarunga mbyo watunda papavo, ²⁴ Karunga kwavapa ghuhungami wamaghoko-ghoko mukonda yankenda yendi mwaJesus Kristus ogho ava yoghoro. ²⁵ Karunga kwatapa Jesus Kristus ashi mumfa dendi vavhure kuwanamo lighupiropo na lidongonono lya ndjo davo vakupura mumwendi. Mo ngoli ashorora Karunga ghuyerere wendi, pakare kwashuvire vantu mundjo davo ahana kudidjonaghurapo mughudidimiki waghu Karunga wendi. ²⁶ Navintje kuna vihepa paruvede rwantantani ashi Karunga ashorore ghuhungami wendi. Ghuye mwene kwahungama, makura atape ghuhungami kwakehe ghuno wakupura mwaJesus. ²⁷ Vinimbyo po ovyo tukunenepekera po? kwato. Mukonda yaveta munke? Virughana? Hawe, mukonda yalipuro. ²⁸ Weno atwe kuna kughamba ashi lipuro ndyo lyakutapa ghuhungami waKarunga kumuntu, lipuro nakukuyukashi mundiro naveta. ²⁹ Ndi Karunga kwahamena tupu kuvaJuda pentjavo? Nane kapishi ndje Karunga wava Pagani nka? Nhii, mo ngoli naye Karunga wavapagani nka waro. ³⁰ Ntjeneshi, mo ngoli, Karunga ghumwe tupu ahuru, ghuye lipuro ndyo lyakumurenkita arughane vaJuda vyavamba, momo mulipuro nka mo vahungamena ovo vapira kuruwana vyavamba. ³¹ Nane ngoli atwe twadongonona po veta mukonda yalipuro? Lyambo lyenu! Atwe kukoreka veta nalipuro.