¹ Mbyovyoshi kwato ovyo ngavikakupopero, muntu, wakupangura vaghunyendi mwene ana kukupanguro. Anwe vapanguli muna hepa kutikitamo navintje yira moomo mwapanguranga vapeke. ² Atwe twayiva ashi lipanguro lyaKarunga lya ghuhunga kuvyukita navantje ava varughanango vyaweno. ³ Yivenu vino, ove muntu, wakupangura vaunyoye ngoli ove nove mbyo warughananga. Ove kughayara ashi kuvhura ngaghukashenduke mpanguro yaKarunga ndi? ⁴ Ndi ove kuna dini ufe nkenda waunene waKarunga, nalididimiko, ntani nalikeverero lyendi. kapi ghuna dimburura ashi ghufe nkenda waKarunga kuna shana ghukutware ghuku shighure mutjima? ⁵ Ove kwakara namushima waghukukutu wakupira kukushighura naghumoye ghuna kukuvhukitiro lishandu, olyo ngalikuwano, muliyuva olyo ngalishoroka lishandu nalipanguro lyaKarunga lyaghuhunga. ⁶ Ghuye ngakafuta kehe muntu kutwara muvirughana vyendi: ⁷ Vakurughana ghuwa naghupampi vashane ghuyerere nalifumano navi vyakukarererapo ghuye ngakavapa monyo wanaruntje. ⁸ Ano ngoli vakukutumba, vapire kulimburukwa kughushili ngoli valimburukwa tupu kughudona, makura lishandu nalipanguro lyaKarunga ngaliva vyuka. ⁹ Karunga ngayita runyando nakukora mumonyo davantu kwakehe ghuno wakuruwana ghudona, ngahova kuvaJuda ntani kuva pagani. ¹⁰ Ngoli wakurughana ghuwa ngawana ghuyerere, lifumano nambili, ngahova kuvaJuda ntani nakuvaPagani. ¹¹ Karunga kwato kunyokoma. ¹² Vavangi ovo vadjono vahana veta mo ngoli ngava kombana pahana veta, vavangi ovo vadjono ngoli vavo vayiva veta ngava kava pangura paveta. ¹³ Vano vakuyuvha tupu veta, kapishi mbo vahungamo kushipara shaKarunga, ano ngoli mbovo vakutikitamo veta mbo ngahungameka. ¹⁴ Ngoli vaPagani, ovo vapiro kukara naveta, ntjene valimburukwa kulishito ovyo yahepa veta, vavo ko vene mbo veta, nampili ngoli vapira kukara naveta oyo vatjanga. ¹⁵ Ghukaro wavo kuneyeda ashi ovyo yahepa veta kwavi tjanga mudimushima davo. Liywi lyamudimushima davo nalyo kutapa ghumbangi kukwavo, mbyovyoshi maghayaro ghavo pamwe kuvapangera pamwe kuvapopera kuva vene ¹⁶ ntani naku kwaKarunga. Mukukuyenda nambudi yaRuhafo oyo nayuvitanga Karunga ngakatapa nkondo kwaJesus Kristus ngaka pangure vihorama vyamumaghayaro ghamu dimushima davantu muliyuva lyampanguro. ¹⁷ Ntjene shi anwe kukutwenya ashi muvaJuda mbyo mwahuguvara muveta muna hepa kukupandayikira mwaKarunga, ¹⁸ anwe mwayiva ovo ahora Karunga ashi muvirughane ntani anwe vamuronga kutoghororapo veta yayiwa po; ¹⁹ anwe mwayiva ashi anwe mwapitilirango vatwiku, ntani anwe ramba yakutapa ghukenu kwavo vana karo mumundema, ²⁰ Ntjeneshi ghukonentu naghushili kughuwana kuveta yaKarunga, anwe kuna kughayara ashi kuvhura mukare vatapi maghano kuvantu vavagova ntani mutape marongo kuvanuke ndi, ntani weni ghano marongo ghenu omo awapeka maghukaro ghaliparu lyenu? ²¹ Weni omo ghuronga vantu, ghupire kukuronga pamuhovo naghumoye? Ove kuyuvitira vantu ashi, nakuvaka shi, ngoli ove naghumoye kuna kuvaka? ²² Ove kughamba shi nakushondera shi, ngoli ove naghumoye kushondera? Anwe kwanyenga vaKarunga vavimpempa, ngoli ove kuvaka virughanita vyamuntembeli? ²³ Ove kukupandayikira muveta yaKarunga, ngoli ove naghumoye kushwaghura Karunga mukupira kulimburukwa kuveta dendi? ²⁴ Matjangwa kwatanta shi,'' Mukonda yenu vaJuda mo vana kushwaghulira lidina lyaKarunga, kuna kulishwaghulira mukatji kavaPagani.'' ²⁵ Ntjeneshi ove kwakurughana vyavamba lipuro lyoye kuvhura likwafe ntjeneshi ove kutikitamo veta, ngoli ove ntjeneshi ghumurunde kapi watikitangamo veta, ove kwafana tupu yira ndjeghu vapira kurughana vyavamba. ²⁶ Ntjeneshi ogho vapira kurughana vyavamba atikitemo veta, nane Karunga nakumutura shi akare yira ndjeghu varughana vyavamba? ²⁷ Oghu vapira kurughana vyavamba ghuye kutikitamo veta nawa-nawa ndje ngakamupanguro anwe varughana vyavamba mwakaro naveta oyo vatjanga, ngoli anwe muvarunde kapi mwatikitangamo veta! ²⁸ Kapishi mpo dapantunda darenkitango muntu akare mujuda mwene-mwene; kurughana vamba yaparutu tupu, kapishi liruwano vamba yene-yene. ²⁹ MuJuda mwene-mwene po ndjegho akaro naghuJuda wamunda. Liruwano lyavamba vyene-vyene shininke shamumutjima shapa mpepo, kapishi shapa veta oyo vatjanga. Litangaghuko lyamuntu waweno kapishi kwavantu lyatundanga, ngoli kwaKarunga.