¹ Mukughulilira, vaunyande, karenu narughafo mwaHompa. kukwandeko me mukutjanga vininke vino vyakukufana nka kukwenu kudereko vyavidona kukwande, ntani kumukunga vyavyo. ² Kengerenu ku mbwa. kengerenu nka waro kuvaruwana vavadona. Kengerenu nka kuvapukiti. ³ Mposhi atwe vakavamba- twa karerango mumpepo mupongoki yaKarunga, ntani na kuwanamo likuto mwaKristusi Jesusi, ntani nakupirashi kukara naghunankondo panyama. ⁴ Nampili ngoli, Ame naumwande nakara naudami panyama. Nangeshi mpwali ghumwe anakughayaro ashi akara naudami panyama, ame kuvura nipitakanepo. ⁵ ame napwa kunduwana vyavamba muliyuva lyautano nautatu, kuvantu vaIsrael, kumuhoko waBenjamin, mu Hebeli wavaHebeli; mukutwara mumpo, yavaFaliseyi. ⁶ Yira moomo tupu napura, Ame nahepikire vakankirishe; yira moomo tupu ghuhungami kutwara muveta, Ame kapi nakalire naundjoni wangandi. ⁷ Mara kehe vino vininke vyakaliro mulyo kukwande, Ame navihupire ashi likombano mwaKristusi. ⁸ Kunakutanta ashi, weno Ame navarura vininke navintje vikare vyakombana morwa unandunge wakuwedererako mwaKristusi Jesusi Hompa wande. Mumwendi Ame nakutapa muvininke navintje-ntani Ame kuvimona kwato mulyo-mposhi Ame nuwane Kristusi ⁹ ntani nikuwane naumwande mumwendi, mukudira kukara naghuhungami wanaumwande kutwara mumpo, mara vinya vinakaro mulipuliro mwaKristusi-ghuhungami waKarunga mulipuliro. ¹⁰ Mpo ngoli ashi Ame weno nahoro numuyive na ghunankondo wamulivumbuko lyendi ntani naghukareli wendi warunyando, mukukara yira ndje mumfa dendi, ¹¹ nampili ngoli kuvhura nipite mughuyivi walivhumbuko kughufe. ¹² Kapishi walye Ame nawana kare vininke ovyo, ndi Ame ashi nahungama, mara Ame natininika mukuwana kovyo vyakwatakanito Kristusi Jesusi. ¹³ Vaunyande, Ame kapi nakughayara Ame naumwande ashi nahamenako kare. Mara shininke shimwe narugha: Mukuvurama vyakunyima na kurwamena vyakughuto, ¹⁴ Ame natwara kughuto lirwameno na kukengurura mfuto yapawiruwiru muliyito lya Karunga mwaKristusi Jesusi. ¹⁵ Kwanatuvantje atwe twapyo, tughayarenu ndjira yino; ntani nange ashi kunakughayara mwapeke kuvininke vimwe, Karunga kwavishorora kukoye. ¹⁶ Nampili ngoli, kwavi twatikitamo, tukwatererenu kukwavyo. ¹⁷ Karenu shihonena mumwande, vaunyande. Kengerenu kovo vanakutikitomo vihonena kovyo mwakara navyo mumwetu. ¹⁸ Vayingi kunakutikitamo- vakughamena kovo namutantilire, ntani weno Ame kunakumutantera namaruntjodi-yira vanankore vashilivindakano shaKristusi. ¹⁹ Kughuhura lidjonauko. Karunga wavo mapumba ghavo, ntani ghuyerere wavo muntjoni. Vavo kughayara vyapantunda yalivhu. ²⁰ Mara shirongo shetu muliwiru, omo mo natwe ngatutaterera muyowoli, Hompa Jesusi Kristusi. ²¹ Ogho ngakatjindjo marutu ghetu ghapalivu ghakakare marutu varuwanita yira rutu rwendi rwakumpayima, varuwanita kughunankondo wendi mposhi vininke navintje viye mwanaumwendi.